නොකඩවා ඇද හැලෙන වර්ෂාවත් සමඟ පුත්තලම දිස්ත්‍රික්කයේ පවුල් 2790ක පුද්ගලයන් 9902ක් පීඩාවට පත්ව ඇති බවත්, එක් මරණයක් වාර්තා වූ බවත් පුත්තලම දිස්ත්‍රික් ලේකම් එච්. එම්. එස්. පී. හේරත් මහතා පවසයි.
මේ පිළිබඳව වැඩිදුරටත් අදහස් දැක්වූ දිස්ත්‍රික් ලේකම්වරයා මෙලෙස ද කීවේය.
“පුත්තලම දිස්ත්‍රික්කයේ ප්‍රාදේශීය ලේකම් කොට්ඨාස දහසයෙන් වැඩි බලපෑම් එල්ල වී ඇත්තේ මුන්දලම, වනාතවිල්ලුව සහ හලාවත ප්‍රාදේශීය ලේකම් කොට්ඨාසවලටයි. සුරක්ෂිත මධ්‍යස්ථානවල ලැගුම් ගෙන සිටින සහ නිවෙස් ජලයෙන් යටවී මුළුතැන්ගෙයි ආහාර පිස ගැනීමට නොහැකිව පීඩාවට පත් වූ පවුල් සඳහා වියළි ආහාර, පිසූ ආහාරත් දීමට අදාළ නිලධාරීන් කටයුතු කරනවා.
ඊයේ (09) දිනයේ ඇද හැලුණු වර්ෂාව හේතුවෙන් මාදම්පේ සහ මහවැව ප්‍රාදේශීය ලේකම් කොට්ඨාසවල හැමිල්ටන් ඇළත්, කඩුපිටි ඔය පිටාර ගැලීමෙන් එම ඉවුරු දෙපස නිවාසවලට දැඩි බලපෑම් එල්ල වුණා. පැවති දැඩි සුළං තත්ත්වය හේතුවෙන් ප්‍රදේශ කිහිපයක ගස් කඩා වැටීම් වාර්තා වෙනවා.”
