පාසල නිම වී නිවෙසට යමින් සිටි 15 හැවිරිදි බාලවයස්කාර දැරියක කුරුණෑගල කුඹුක්ගැටේ ප්‍රදේශයේදී බස් රථයක බරපතළ ලිංගික අපයෝජනයකට ලක්කිරීමේ සිද්ධිය සම්බන්ධයෙන් සැකපිට අත්අඩංගුවට ගෙන අධිකරණ නියෝග මත දින 24ක් රිමාන්ඩ් කර සිටි සැකකාර පෙම්වතකු ඊට ආධාර අනුබල දුන් බව කියන පෞද්ගලික බස් රථ රියැදුරකු සහ කොන්දොස්තරවරයකු දැඩි ඇප කොන්දේසි මත මුදාහරින ලෙස කුරුණෑගල ප්‍රධාන මහේස්ත්‍රාත් බන්දුල ගුණරත්න මහතා නියෝග කළේය.
ඒ අනුව සැකකරුවන්ට වෙන් වෙන් වශයෙන් මුදලින් රුපියල් දස දහස බැගින් ඇප නියම කළ ප්‍රධාන මහේස්ත්‍රාත්වරයා ඊට අමතරව සැකකරුවන්ට වෙන් වෙන් වශයෙන් රුපියල් ලක්ෂයක් වටිනා ශරීර ඇප දෙක බැගින් නියම කෙරිණ. සෑම මසකම අවසන් ඉරු දින කුඹුක්ගැටේ පොලිසියේ ළමා හා කාන්තා කාර්යාංශයට වාර්තා කරන ලෙසට ද සැකකරුවන්ට තවදුරටත් නියෝග කළ ප්‍රධාන මහේස්ත්‍රාත්වරයා යළි 2014 වසරේ ජනවාරි මස 11 වැනි දින අධිකරණය හමුවේ පෙනී සිටින ලෙසට ද නියෝග කෙළේය. මෙසේ නියෝග කළේ මෙම සැකකරුවන්ට ඇප ලබා ගැනීම සම්බන්ධයෙන් ජ්‍යෙෂ්ඨ නීතිඥ කීර්ති දුනුසිංහ මහතා දීර්ඝව අධිකරණයට කළ කරුණු දැක්වීමක් සැකිල්ලට ගනිමිනි. මෙසේ ඇප මත මුදාහැරියේ කුරුණෑගල පාර කුඹුක්ගැටේ ලිපිනයේ හෂාන් ප්‍රියන්ජිත් නන්දන සහ පෞද්ගලික බස් රථ රියැදුරකු වන කුරුණෑගල නෙල්ලිය වෙල්ගල ලිපිනයේ නුවන් කුමාර ප්‍රේමරත්න, පෞද්ගලික බස් රථ කොන්දොස්තරවරයකු වන පෙරියකඩුලෑව වාසනාගම ලිපිනයේ කවිඳු කවිශ්ක යන සැකකරුවන්ටය.
සැකකරුවන් තවදුරටත් රිමාන්ඩ් කරන ලෙස පොලිසිය අධිකරණයෙන් ඉල්ලා සිටි අවස්ථාවේ සැකකරුවන් වෙනුවෙන් කරුණු දක්වමින් ජ්‍යෙෂ්ඨ නීතිඥ කීර්ති දුනුසිංහ මහතා පැවසුවේ මෙම සැකකරුවන් අතුරින් පළමු සැකකරු පැමිණිලිකාර 15 හැවිරිදි දැරියගේ පෙම්වතා බවයි. මෙම සිද්ධිය සිදු වූ බව කියන අවස්ථාවේ දෙවන සැකකරු රියැදුරු ලෙස බස් රථය පදවමින් සිට ඇති බව ද අධිකරණයට කියා සිටි නීතිඥවරයා, තුන්වැනි සැකකරු කොන්දොස්තර වශයෙන් මගීන්ට ටිකට් නිකුත් කරමින් සිටි ඇති බව ද කීවේය.
එවන් පසුබිමක බස් රථය පදවමින් සිටි රියැදුරු සහ ටිකට් නිකුත් කරමින් සිටි කොන්දොස්තර එකී වරද සඳහා ආධාර අනුබල දුන් බවට චෝදනා කරන්නේ කෙසේද? යන්න නීතිඥ දුනුසිංහ මහතා ප්‍රශ්න කර සිටියේය. ඒ අනුව සැකකරුවන් ඇප මත මුදාහරින ලෙස ද නීතිඥවරයා අයැද සිටියේය.
මෙම සැකකරුවන් විසින් අදාළ 15 හැවිරිදි බාලවයස්කාර දැරියට පෞද්ගලික බස් රථයක් තුළදී බරපතළ ලිංගික අපයෝජනයට ලක් කළ බව කියන සිද්ධියෙන් අනතුරුව දැරිය ඒ බව මුලින්ම පාසලේ සිය පන්ති භාර ගුරුවරියට දැනුම්දී ඇත.
දැරියගේ මව විසින් කුඹුක්ගැටේ පොලිසියට සිද්ධිය පිළිබඳ පැමිණිලි කිරීමෙන් පසුව සැකකරුවන් අත්අඩංගුවට ගෙන කුරුණෑගල අතිරේක මහේස්ත්‍රාත් නුවන් කෞෂල්‍ය මහතා හමුවට ඉදිරිපත් කිරීමෙන් අනතුරුව රිමාන්ඩ් බන්ධනාගාරගත කෙරිණ. සැකකරුවන් වෙනුවෙන් ජ්‍යෙෂ්ඨ නීතිඥ කීර්ති දුනුසිංහ මහතා පෙනී සිටි අතර පැමිණිල්ල වෙනුවෙන් කුඹුක්ගැටේ පොලිසියේ ළමා හා කාන්තා කාර්යාංශයේ නිලධාරීහු පෙනී සිටියහ.
