පාසල වෙත යමින් සිටි දරුවකු ඊයේ (09) පෙරවරුවේ ක්ලාන්තයක් සෑදී මහමඟ ඇදවැටී හොරණ මූලික රෝහලට ඇතුළත් කිරීමෙන් පසු මිය ගොස් තිබේ.
මේ දරුවා පාසලට යෑම සඳහා බස් රථයක් ගැනීමට මීටර 500ක පමණ දුරක් යා යුතු අතර, එසේ යමින් සිටියදී ඇදවැටී තිබේ.
මෙසේ මියගොස් ඇත්තේ ප්‍රබුද්ධ ප්‍රභාෂ්වර හඳපාන්ගොඩ නමැති හොරණ විද්‍යාරතන විද්‍යාලයේ 06 වැනි ශ්‍රේණියේ ඉගෙනුම ලබමින් සිටි කොබවක ජනපදය, ගෝවින්න ලිපිනයේ පදිංචි සිසුවෙකි.
මෙම දරුවාගේ පියා ඊයේ නොසිටීම හේතුවෙන් පාසලට යෑම සඳහා තනිව පැමිණෙමින් සිටියදී නිවෙස ආසන්නයේදී මේ අනතුරට මුහුණපා තිබේ.
මෙම සිසුවාගේ මරණය සම්බන්ධයෙන් වූ පරීක්ෂණය ඊයේ (09) පැවති අතර එහිදී දරුවාගේ ඥාතියකු වූ වෙලේගෙදර අනුර රත්න බණ්ඩාර (49) මෙසේ කීවේය.
“මම බලන විට දරුවා පොත් බෑගය උඩට ඔළුව තියාගෙන මුණින්අතට පාර මැද බිම වැටිලා හිටියා. වතුර බෝතලයත් කැප් එකත් පාරේ තණකොළ බිස්සේ තිබුණා. මම පුතේ කියලා කතා කළත් ඔහු කතා නොකළ නිසා දරුවා ඔසවාගෙන අසල තිබෙන රංජි අයියලාගේ නිවෙසට ගියා.
මම වඩු කාර්මිකයකු ලෙස රැකියාව කරනවා. මිය ගිය දරුවා මාගේ ඥාතියකු වන පුතෙක්. මම නිතරම ඒ ගෙදරට යනවා එනවා. මා දන්නා තරමින් ඒ දරුවාට කිසිදු අසනීපයක් තිබුණේ නෑ. ඊයේ (09) උදේ 5.30ට විතර මම ස්කූටි වර්ගයේ යතුරුපැදියෙන් රැකියාවට යෑමට ආවා. මා එන අතරමඟදී රංජි යන අයගේ ගෙවල්වලට එහාදි මම දුටුවා දරුවකු පාර මැද බිම වැටිලා ඉන්නවා. මම යතුරුපැදිය නවතා ඔහුව බැලුවා. එවිට ධම්මික ධර්මප්‍රි යන අයගේ ලොකු දරුවා කියලා මම හඳුනා ගත්තා. ඉන් පසුව මම බැහැලා බැලුවා. එවිට දරුවා පොත් බැගය උඩට ඔළුව තියාගෙන මුණින්අතට බිම වැටිලා හිටියා. වතුර බෝතලයත් කැප් එකත් පාරේ තණකොළ බිස්සේ තිබුණා. මම පුතේ කියලා කතා කළත් ඔහු කතා නොකළ නිසා දරුවාව ඔසවාගෙන අසල තිබෙන රංජි අයියලාගේ ගෙදරට ගියා. ඒ ගිහිල්ලා ගේ ඉස්සරහ තිබුණ හාන්සි පුටුවේ තිබ්බා. ඉන් පසුව ඔවුන්ට දරුවාව බලන්න කියලා මම ධම්මිකලාගේ ගෙදරට පණිවුඩය ලබා දීමට ගියා. ගිහිල්ලා දරුවාගේ අම්මාවත් දාගෙන ඒ ගෙදරට ආවා. මම ඇයව දාලා රැකියාවට ගියා. මම රැකියාව කරමින් සිටියදී අපේ ගමේ ලාල් යන අය දුරකතන ඇමතුමක් ලබාදී දරුවා මියගොස් ඇති බව පැවසුවා.”
මිය ගිය ප්‍රබුද්ධ ප්‍රභාෂ්වරගේ පියා වන හදපාන්ගොඩගේ ධම්මික ධර්මප්‍රිය (48),
“මම රියැදුරකු ලෙස රැකියාව කරනවා. මියගොස් ඇත්තේ මගේ වැඩිමල් දරුවයි. ඔහු හොරණ විද්‍යාරතන විදුහලේ 06 වැනි ශ්‍රේණියේ ඉගෙනුම ලැබුවා. ඔහුට මා දන්නා තරමින් කිසිදු අසනීපයක් තිබුණෙ නෑ. මමත් බිරියත් දරු දෙදෙනාත් මවත් පියත් නිවෙසේ සිටිනවා. මාගේ පුතාව විද්‍යාරත්න පාසලට ගෙනල්ලා දාන්නේ මම මාගේ යතුරුපැදියෙන් හෝ ත්‍රිරෝද රථයෙන්. පෙරේදා (08) පුතා පාසල් ගියේ බස් එකේ. ඔහු තනියම පාරට ඇවිල්ලා තමයි බස් රථයට නැග්ගේ. හවස 5.00ට විතර තමයි පන්ති ගිහිල්ලා ගෙදරට ආවේ. ඒ ඇවිල්ලා පුතා වෙනදා මෙන් හොඳින් හිටියා. ඊයේ (09) උදේ මම හයර් එකක් ගියා. පුතා බස් රථයෙන් පාසලට යන බව මට පැවසුවා. පුතා කිලෝමීටරයක් විතර පයින් ඇවිල්ලා තමයි බස් රථයට නඟින්නේ. උදේ 6.30ට විතර මට දුරකතන ඇමතුමක් දී අපේ ගමේ බන්දුල යන අය පැවසුවා දරුවාට අමාරුයි රෝහලට අරගෙන යනවා, එන්න කියලා. මම රෝහලට එන විට උදේ 7. 20ට විතර වුණා. මම රෝහලට එන විටදී දරුවාට මැෂින් සවි කරලා ප්‍රතිකාර ලබාදෙමින් තිබුණා. ඉන්පසුව මම එළියට ගියා. ටික වේලාවකට පසුව වෛද්‍යවරු පැවසුවා පුතා මිය ගිය බවට. මේ මරණය පිළිබඳ කිසිදු සැකයක් නැහැ.”
දරුවාගේ මව ද මෙහිදී සාක්ෂි ලබාදුන් අතර, හොරණ දිස්ත්‍රික් රෝහලේ විශේෂඥ අධිකරණ නිලධාරි පනිත සෙනෙවිරත්න මහතා විසින් පශ්චාත් මරණ පරීක්ෂණය සිදු කළේය.
ඉදිරිපත් වූ සාක්ෂි සහ වෛද්‍ය වර්තා අනුව විවෘත තීන්දුවක් ප්‍රකාශයට පත් කළ හොරණ හදිසි මරණ පරීක්ෂක සාම විනිසුරු සුමේධ ගුණවර්ධන මහතා මියගිය දරුවාගේ ශරීර කොටස් රජයේ රස පරීක්ෂක වෙත යවා වාර්තාවක් ලබා දෙන ලෙස බුලත්සිංහල පොලිසියට නියෝග කළේය.
හොරණ හදිසි මරණ පරීක්ෂණ උසාවියේදී බුලත්සිංහල පොලිසියේ සැරයන් (62904) ගුණරත්න මහතාගේ සාක්ෂි විමසීම සිදුකළේය.
