ශ්‍රී ලංකාවේ ක්‍රිකට් ක්‍රීඩාවේ උන්නතිය සඳහා දූෂිත වර්තමාන ශ්‍රී ලංකා ක්‍රිකට් ආයතනයේ සභාපති ඇතුළු නිලධාරී මණ්ඩලය වහා ඉවත් විය යුතු යැයි ද දූෂණයෙන් තොරව ක්‍රිකට් පරිපාලනය විනිවිදභාවයෙන් යුතුව පවත්වාගෙන යාම සඳහා ක්‍රිකට් පරිපාලනය වෙනුවෙන් නව නීති පද්ධතියක් පනතක් හරහා සම්මත කළ යුතු යැයි ද මෙම පාර්ලිමේන්තුව යෝජනා සම්මත කර සිටිමි.
අද දවසේ මේ ඉදිරිපත් වූ යෝජනා අප දකින්නේ ඓතිහාසික වාර්තාගත යෝජනාවක් ලෙසයි. අගහරුවාදා හා බදාදා දවසේ බොහොම ශක්තිමත් ලෙස විපක්ෂයත් ආණ්ඩු පක්ෂයත් තර්කවිතර්ක කර ගත්තා අපේ රටේ ක්‍රිකට් ක්‍රීඩාවේ අනාගතය පිළිබඳ. ඒ තර්ක විතර්ක තුළ විවිධාකාර වූ අදහස් තිබුණා. එකතුවෙන තැන් තිබුණා. පරස්පර වූ තැන් තිබුණා. නමුත් අගහරුවාදා දවසේ බදාදා දවසේ ඒ උණුසුම් වාද විවාද තුළ අපට පුළුවන් කම ලැබුණා සභාවක් හැටියට විපක්ෂයටත් ආණ්ඩු පක්ෂයටත් පක්ෂ නායක රැස්වීමක් කැඳවා මේ රටේ ක්‍රිකට් ක්‍රීඩාවේ වර්තමානය අනාගතය අභිවෘද්ධිය උන්නතිය තකා එකට එකතු වෙන්න. අපේ ප්‍රාර්ථනාව මේ යෝජනාව විවාදයට ගත්තයින් පසුව අද සවස්භාගයේ පැවැත්වෙන ඡන්දය තුළ පක්ෂ විපක්ෂ භේදයකින් තොවර අපි හැමෝටම එකාමෙන් අත්වැල් බැඳගෙන ක්‍රිකට් ක්‍රීඩාව සුරැකීමේ ගෞරවය එක පුද්ගලයකුට පාර්ශ්වයකට නොවේ අපි හැමදෙනාම එකට එකතු වී ඒ ගන්නා විනිවිධභාවයෙන් යුත් ප්‍රගතිශීලී සාධනීය විසඳුම හරහා අපිට පුළුවන් කම ලැබෙයි රටටත් ලොවටත් වැදගත් පණිවිඩයක් ලබා දෙන්න. ඒ තමයි විශේෂයෙන්ම අපේ ක්‍රිකට් ක්‍රීඩාව සුරක්ෂා කරන්නට අපි අතර විවිධ මතිමතාන්තර තිබුණත් අපි හැමෝම පුළුල් මනසකින් උදාරතර නිර්මල චින්තනයකින් අපි හැමෝම එකට එකතු වුණා එකට අත්වැල් බැඳ ගත්තා කියන තැනට එන්නට අපි අපේ ඡන්දය පාවිච්චි කරලා මේ ක්‍රිකට් පිළිබඳ තිබෙන අපේ කැක්කුම ක්‍රිකට් රකින්නට තිබෙන අපේ ඒ ආසාව බලවත් වුවමනාව අද දිනය අවසානයේ පැවැත්වෙන ඡන්දයෙන් ඉස්මතු වේවා කියා ප්‍රාර්ථනා කරනවා.
ඒ ආරම්භ කිරීමත් සමඟ විවිධ යෝජනා ආවා. විශේෂයෙන්ම අපි ඉල්ලීමක් කළා ක්‍රීඩා ඇමැතිතුමාට මේ සභාවට ඇවිල්ලා තමන්ගේ මතය තමන්ගේ අදහස ඉදිරිපත් කරන්න කියලා. එය ඉතාමත්ව වැදගත් ක්‍රියාවක්. මේ එකතුවීම තුළ අපි ක්‍රිකට් පරිපාලනයට දුෂිත පරිපාලනයට පණ්විඩයක් යවනවා පාර්ලිමේන්තුව ඇතුළේ තියෙන දේශපාලන බෙදීම් ගැන විශ්වාසය තබා ඔබගේ සුරක්ෂිතභාවය ඔබගේ ආයු කාලය ඔබගේ පැවැත්ම තහවුරු කර ගත් යුගය අදින් අවසන්.
ඒ අය හිතනවා ඇති ආණ්ඩුව විපක්ෂ බෙදිලා පක්ෂ ගණනාවක්, මත ගණනාවක් තියෙන නිසා දැනට කර ගෙන යන ක්‍රිකට් වැඩ පිළිවෙළේ සූදුවේ මාෆියාවේ දූෂිත මංකොල්ලකාරි ක්‍රියාදාමය තවදුරටත් යහතින් කර ගෙන යන්න පුළුවන් කියලා. අදින් ඒක අවසන්. පරිපාලනයේ යෙදි ඉන්න අයට කියන්න කැමතියි නම්බුවක් තියේ නම් එය රැකගෙන අද දවසේ ඉවත් වෙන්න. ඉවත් විය යුතු යි. එයයි මේ යෝජනාව.
