නැවත පත්වන ක්‍රිකට් පාලක මණ්ඩලයට වංචා දූෂණ කළ නොහැකි නීතියක් සැකසිය යුතු බව ශ්‍රී ලංකා පොදුජන පෙරමුණේ මහනුවර දිස්ත්‍රික් මන්ත්‍රී මහින්දානන්ද අලුත්ගමගේ මහතා පාර්ලිමේන්තුවේදී ඊයේ (09) පැවසුවේය.
ශ්‍රී ලංකා ක්‍රිකට් පාලක මණ්ඩලය ඉවත් විය යුතු බවට වන ඒකාබද්ධ යෝජනාව පිළිබඳ විවාදයට එක්වෙමින් ඒ මහතා මේ බව කියා සිටියේය.
ඒ මහතා මෙසේද පැවසුවේය.
ක්‍රිකට් තුළ ජයග්‍රහණ රැසක් ලබා ගත්තා. ක්‍රීඩාව වෙනුවෙන් ගත් තීන්දු ඒවාට බලපෑවා. 2012 වසරේදී ක්‍රිකට් ගැන කතා කරන්න ගිහින් මහනුවර දිස්ත්‍රික්කයෙන් දෙවැනි ස්ථානයට පත් වෙන්න මට සිදු වුණා. පවතින ව්‍යාවස්ථාවට අනුව ක්‍රිකට් පාලක මණ්ඩලයේ සභාපති ධුරයට පැමිණිය නොහැකියි. මුදල් තිබෙන ඕනෑම අයෙකුට මේ තුළට පැමිණ මුදල් සෙවිය හැකි ආකාරයේ ව්‍යවස්ථාවක් තමයි මෙහි තිබෙන්නේ. පාලක මණ්ඩලය තුළට දක්ෂයන්ට ඒමට අවස්ථාවක් හැදිය යුතුයි. ක්‍රීඩාවට ආදරය කරන අය නොවෙයි ගොඩක් එන්නේ. ක්‍රීඩාවට දක්ෂ අයට මේ පුටුවලට ඒමට හැකි පරිදි නීති අපි හැදිය යුතුයි. කඩිනමින් නව ව්‍යවස්ථාවක් ගෙනා යුතුයි. ක්‍රිකට් පාලක මණ්ඩලයේ ආදායමෙන් සියයට 70ක් මම ඇමැතිවරයාව සිටියදී ගෙවමින් තිබුණා. අපි ඒක වෙනස් කළා. එය සියයට 40කට අඩු කළා. ජයග්‍රහණ පදනම් කරගෙන අපි ක්‍රීඩකයන්ට ගෙවීම් සිදු කළා. ඒකට ක්‍රීඩකයන් විරුද්ධ වුණා. විරුද්ධ වුණාට මම ගත් තීරණය වෙනස් කළේ නැහැ. රුපියල් මිලියන 400ක් 2013 වසරේදී එක් ක්‍රීඩකයකුට ගෙවා තිබුණා. අද දින්නත් ක්‍රීඩකයාට ගෙවන මුදල එකයි. පැරදුණත් ගෙවන මුදල එකයි. නමුත් දක්ෂතා කුසලතා මුල්ව ක්‍රීඩකයන්ට ගෙවිය යුතුයි.
