සියලුම ප්‍රාණ ඇපකරුවන් නිදහස් කරන තුරු ගාසා තීරයේ ‘තාවකාලික සටන් විරාමයක්’ ක්‍රියාත්මක නොකරන බව ඊශ්‍රායල අගමැති බෙන්ජමින් නෙතන්යාහු සදහන් කරයි.
සිකුරාදා ටෙල් අවිව් හි සංචාරයක නිරත වෙමින් එක්සත් ජනපද රාජ්‍ය ලේකම් ඇන්ටනි බ්ලින්කන්, අවම වශයෙන් ටික කාලයකට හෝ මිලිටරි ප්‍රහාරය අත්හරින ලෙස ඊශ්‍රායල අගමැතිගෙන් ඉල්ලා සිටියේය.
කෙසේ වෙතත්, හමාස් සංවිධානය ප්‍රාණ ඇපකරුවන් 240කට වැඩි ප්‍රමාණයක් නිදහස් නොකළහොත් ඊශ්‍රායලය “පූර්ණ බලයෙන්” ඉදිරියට යන බව නෙතන්යාහු පවසා සිටියි.
මේ අතර හමාස් ක්‍රියාකාරීන් විසින් භාවිතා කරන බව පවසමින් ඊශ්‍රායලය ගාසා තීරයේදී ගිලන් රථයකට පහර දී තිබේ. ගාසා තීරයේ සෞඛ්‍ය අමාත්‍යාංශය පැවසුවේ ඊශ්‍රායලය අල්-ෂිෆා රෝහලෙන් පිටත ද ඇතුළුව විවිධ ස්ථාන දෙකක ගිලන්රථ පෙළක් ඉලක්ක කර ප්‍රහාර එල්ල වී ඇති බවයි
ඊශ්‍රායල හමුදාව කියා සිටියේ ඔවුන් ගාසා නගරයේ දී “හමාස් ත්‍රස්තවාදී කණ්ඩායමක් විසින් භාවිතා කරන ලද” ගිලන් රථයකට පහර දුන් බවයි. එම ප්‍රහාරයෙන් හමාස් සටන්කාමීන් ගණනාවක් මිය ගිය බවත්, ගිලන්රථවලට සටන්කාමීන් සහ අවි ආයුධ මාරු කළ බවට චෝදනා කරන බවත් එහි සඳහන් වේ.
ගසා ප්‍රදේශයේ සිවිල් වැසියන්ට ඔවුන්ගේම ආරක්ෂාව සඳහා දකුණට ඉවත් වන ලෙස නැවත නැවතත් දැනුම් දෙන බව ඊශ්‍රායල හමුදාව පැවසීය.
ගාසා තීරයේ හමාස් පාලන ප්‍රදේශයේ පිහිටි සෞඛ්‍ය අමාත්‍යාංශය පවසන්නේ ඔක්තෝබර් 7 වැනිදා සිට පුද්ගලයින් 9,000 කට වැඩි පිරිසක් මෙම ගැටුම්වලින් මිය ගොස් ඇති බවයි.
