නිරිතදිග මෝසම් සුළං පහවයාමත් සමඟ වාරකන් සමය නිමවිය. මාස හයකට ආසන්න කාලයක් මුහුදේ පැවති රළු ස්වභාවය පහව ගොස් ඇත. වයඹ මුහුදු තීරයේ මාදැල් කර්මාන්තකරුවන් සුපුරුදු ලෙස සිය රැකියාව පවත්වාගෙන යාමට කටයුතු කරති. මාදැල් කර්මාන්තයේ නියැළෙන්නන්ට මේ දිනවල සැලකිය යුතු මත්ස්‍ය අස්වැන්නක් ද ලැබෙමින් පවතී. මීගමුව සිට කල්පිටිය දක්වා මුහුදු තීරයයේ දෙසීයකට ආසන්න සංඛ්‍යාවක් මාදැල් කර්මාන්තයේ නියැළෙති. මෙමඟින් ඝෘජු හා වක්‍ර රැකියා අවස්ථාවන් පන්දහසක් පමණ පවතී. මාදැල් මසුන් නැවුම් මෙන්ම ගුණාත්මක තත්ත්වයෙන් ද ඉහළය. මේ හේතුවෙන් මාදැල් මසුන් මිලදී ගැනීමට විශාල වශයෙන් ජනතාව මේ දිනවල මුහුදු තීරයට පැමිණෙන අයුරු දක්නට ලැබේ.
මැයි මස මුල සිට ඔක්තෝම්බර් මස මැද දක්වා නිරිතදිග මෝසම් සුළං සක්‍රිය වී වාරකන් සමය ආරම්භ වේ. මෙසේ වාරකන් සමය ආරම්භ වීමත් සමඟ මුහුදේ ඇති රළු ස්වභාවය හේතුවෙන් ධීවර කටයුතුවලටද බාධා පැමිණේ. ඒ හේතුවෙන් වයඹ මුහුදු තීරයේ ධීවර කටයුතුවලින් බොහෝ පිරිස් වැළකී නැඟෙනහිර මුහුදු තීරයට සිය ධීවර යාත්‍රා හා ආම්පන්න රැගෙන ගොස් ධීවර කටයුතුවල නිරත වීමට කටයුතු කරති.
