මෙරට තේ වගාව සඳහා අවශ්‍ය පොහොර, රුපියල් 8400ක් වන නිෂ්පාදන මිලටම ලබා දීමට රජයට අයත් පොහොර සමාගම් දෙක එකඟතාව පළ කර තිබේ.
මෙම පොහොර මිටියක් සාමාන්‍ය වෙළෙඳපොළේ රුපියල් 12,000ක් පමණ මිලකට අලෙවි වන අතර එම මිල ගණන් හේතුවෙන් තමන් ගැටලු රැසකට මුහුණපා ඇතැයි තේ කර්මාන්තකරුවන්ගේ ස්වාධීන සංගමය පෙරේදා (01) කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා හමුවී දැනුම් දුන්නේය.
එම සාකච්ඡාවේදී එම සංගම් නියෝජිතයන් ඉල්ලීමක් කළේ තේ වගාව සඳහා අවශ්‍ය වන පොහොර සහන මිලකට ලබා දෙන ලෙසයි.
රජයට අයත් ලංකා පොහොර සමාගම සහ කොමර්ෂල් පොහොර සමාගම මඟින් දැනට තේ, කුරුඳු, පොල් ඇතුළු වැවිලි භෝග වර්ග සඳහා විශේෂ මිශ්‍ර පොහොරක් නිෂ්පාදනය කරනු ලබයි.
මෙම පොහොර තේ වගාව සඳහා ඉතා උචිත වන අතර එම පොහොර සහන මිලකට තේ කර්මාන්තකරුවන්ට ලබා දීම සම්බන්ධව ඇමැතිවරයා රජයට අයත් පොහොර සමාගම් දෙකෙහි සභාපති ආචාර්ය ජගත් පෙරේරා මහතා සමඟ සාකච්ඡා පැවැත්වීය. එහිදී සභාපතිවරයා ඇමැතිවරයාට දැනුම් දුන්නේ දැනට සමාගම මඟින් නිෂ්පාදනය කරන මිලටම තේ වගාව සඳහා අවශ්‍ය වන පොහොර ලබා දීමට හැකි බවයි.
එමෙන්ම කෘෂිකාර්මික අංශයට පොහොර සැපයීම සඳහා ඉදිරිපත් වන කවර ආයතනයකට වුවද අවසර ලබා දීමට කෘෂිකර්ම අමාත්‍යාංශය තීරණය කර ඇති බව සඳහන් කළ ඇමැතිවරයා මෙහිදී අවධාරණය කළේ තේ කර්මාන්තය සඳහා අවශ්‍ය වන පොහොර සම්පාදනයට ඉදිරිපත් වන්නේ නම් තේ කර්මාන්තකරුවන්ගේ සංගමයට ඊට අවසර ලබා දිය හැකි බවයි.
