අනුරාධපුර රුවන්වැලි සෑයේ චූඩා මාණික්‍යය සහ එහි පාදමේ මැණික් ඉවත් කර ඒ වෙනුවට ව්‍යාජ මැණික් ඇතුළත් කළ බවට සමාජ මාධ්‍ය ඔස්සේ කළ ප්‍රකාශයක් සම්බන්ධයෙන් අපරාධ පරීක්ෂණ දෙපාර්තමේන්තුව මඟින් සිදු කළ විමර්ශනය අවසන් කර නීතිපති වෙත විමර්ශන උද්ධෘත යොමු කිරීමෙන් අනතුරුව 2023 ඔක්තෝබර් 16 දිනැතිව අනුජ රසන්ත ජයසිංහ නමැති එම ව්‍යාජ තොරතුර ප්‍රචාරය කළ විත්තිකරුට එරෙහිව ගම්පහ මහාධිකරණය ඉදිරියේ නඩු පැවරීමක් කර ඇතැයි පොලිස් නීති දිසාව භාර නියෝජ්‍ය පොලිස්පති නීතිඥ රුවන් ගුණසේකර මහතා සඳහන් කළේය.
බත්තරමුල්ලේ පිහිටි පොලිස් මාධ්‍ය ප්‍රකාශක කාර්යාලයේ ඊයේ (02) පැවති මාධ්‍ය හමුවකදී නියෝජ්‍ය පොලිස්පති රුවන් ගුණසේකර මහතා ඒ බව ප්‍රකාශ කළේය.
“මීට මාසයකට පෙර මාධ්‍ය සාකච්ඡාවක් පවත්වා 2022 වර්ෂයේ මැයි මාසයේ යූටියුබ් නාළිකාවක් එක්තරා පුද්ගලයෙක් වන අනුජ රසන්ත ජයසිංහ සමඟ පැවැත් වූ මාධ්‍ය සාකච්ඡාවකදී ඔහු ප්‍රකාශ කරනු ලැබුවා රුවන්වැලි සෑයේ චූඩා මාණික්‍යය සහ එහි පාදමෙහි ඔබ්බවා තිබෙන මැණික් ගල් ගලවා ඉවත් කිරීමක් කර තිබෙන බව. මේ මාධ්‍ය සාකච්ඡාවේදී ඒ පුද්ගලයා කළ ප්‍රකාශය එක්ක රට තුළ විශාල ආන්දෝලනාත්මක තත්ත්වයක් ඒ හරහා මතු වුණා. විශේෂයෙන් මේ පුද්ගලයා ප්‍රකාශ කර තිබුණේ ඔහුට දැනුණු බලවේගයක් මත කියලා. මේ ඇති වුණ ආන්දෝලනාත්මක තත්ත්වය සමඟ පොලිස්පතිතුමා වෙත පැමිණිලි කර තිබුණා එවකට රුවන්වැලිසෑ අධිපතිව සිටි වර්තමාන අටමස්ථානාධිපති හිමිපාණන් විසින්. ඒ අනුව පොලිස්පතිතුමා ඒ පැමිණිල්ල අපරාධ පරීක්ෂණ දෙපාර්තමේන්තුවට ඉදිරිපත් කරලා විමර්ශනයක් කරලා ඔය කියන පුද්ගලයව අත්අඩංගුවට අරගෙන මහර මහේස්ත්‍රාත් අධිකරණයට යොමු කිරීමට කටයුතු කර තිබුණා. මන්ද මහර රක්ෂණ අධිකරණ කලාපයේදී තමයි මේ පුද්ගලයා ඒ යූටියුබ් නාළිකාව සමඟ ඒ සාකච්ඡාව පවත්වා තිබුණේ. ඉන් අනතුරුව අපරාධ පරීක්ෂණ දෙපාර්තමේන්තුව වැඩිදුරටත් විමර්ශන සිදු කිරීමෙන් අනතුරුව විමර්ශන අවසන් කර නීතිපතිතුමා වෙත විමර්ශන උද්ධෘත යොමු කිරීමෙන් අනතුරුව නීතිපතිතුමා විසින් 2023 ඔක්තෝබර් 16 දිනැතිව අනුජ රසන්ත ජයසිංහ නමැති විත්තිකරුට එරෙහිව ගම්පහ මහාධිකරණය ඉදිරියේ නඩු පැවරීමක් කරා. මෙවැනි ප්‍රකාශ සිදු කිරීම අපරාධ වරදක් වෙනවා. මොහු ප්‍රකාශ කරලා තිබුණේ ඔහුට ආපු බලවේගයක් මත ඒ ප්‍රකාශය කළ බවට. ඒ අනුව නීතිපතිතුමා චෝදනා දෙකක් යටතේ අධිචෝදනා පත්‍රය ඉදිරිපත් කරා. එක් චෝදනාවක් තමයි ඒ ප්‍රකාශය හරහා ශ්‍රී ලාංකේය පුරවැසියන් අතර වෛරීසහගත අදහස් ඇති කිරීම හා ඇති කිරීමට තැත් කිරීම සම්බන්ධයෙන් දණ්ඩ නීති සංග්‍රහයේ 120 වගන්තිය යටතේ මෙය වරදක් වෙනවා. දෙවැනි චෝදනාව තමයි මේ ප්‍රකාශය හරහා මහජනතාව ප්‍රකෝප කරවීමට තැත් කිරීමක් කිරීම හරහා දණ්ඩ නීති සංග්‍රහයේ 490 වගන්තිය සමඟ කියවිය යුතු 484 වගන්තිය යටතේ දඬුවම් ලැබිය හැකි වරදක් වන බව. ඒ අනුව විශේෂයෙන්ම අපි නැවත නැවතත් ඉල්ලා සිටින්නේ මෙවැනි පදනම් විරහිත ප්‍රකාශ කරන පුද්ගලයන්ට මාධ්‍ය අවකාශයේ ඉඩක් ලබා නොදෙන ලෙස. එම පුද්ගලයා සමඟ එම යූටියුබ් නාළිකාවේ සාකච්ඡාව පැවැත් වූ චමුදිත සමරවික්‍රම යන අය මේ නඩුවේ සාක්ෂිකාරයකු වශයෙන් ඇතුළත් කරලා තියෙනවා. මෙවැනි ප්‍රකාශ කිරීමෙන් ඇති වූ ආන්දෝලනාත්මක තත්ත්වය, මහජනතාවට ඇති වූ අහිතකර තත්ත්වය මෙවැනි නඩුවක් පැවරීමෙන් පවා වළක්වාගත හැකි ද යන ප්‍රශ්නය තවදුරටත් ප්‍රශ්නයක්. එවැනි පුද්ගලයන්ට ඔබගේ මාධ්‍ය ඉඩ ලබා දෙන විට නැවත වරක් හිතන්න.
මෙවැනි ප්‍රකාශ සම්බන්ධයෙන් යම්කිසි පුද්ගලයෙකුගෙන් පොලිස්පතිතුමාට, පොලිස් මූලස්ථානයට, අපරාධ පරීක්ෂණ දෙපාර්තමේන්තුවට යම් පැමිණිල්ලක් ලැබුණොත් අපි විමර්ශනය ආරම්භ කරනවා. එසේ නැතිනම් පරිගණක අපරාධ විමර්ශන කොට්ඨාසය එහෙමත් නැත්නම් තොරතුරු තාක්ෂණ කොට්ඨාසය වගේ විශේෂඥ ආයතනවලින් මෙවැනි විඩීයෝපට නිරීක්ෂණයට ලක්වුණහමත් ඒවා යොමු කරනවා විමර්ශනය සඳහා. අදාළ සමාජ මාධ්‍යයෙන් ගිය පණිවිඩය මත අවස්ථානෝචිතව තමයි ඒවායේ හිමිකරුවන්ට එම සිදුවීමෙන් වන බලපෑම තීරණය වෙන්නේ. මාධ්‍ය සාකච්ඡාවක් පවත්වලා ඒක සමාජ මාධ්‍ය වෙත මුදාහරිද්දි දෙපාරක් කල්පනා කර බැලිය යුතුයි මේකෙන් රටට පණිවිඩයක් තිබෙනවා ද පදනම් සහිත කරුණු ඉදිරිපත් කරනවා ද කියලා සැලකිලිමත් විය යුතුයි. ආන්දෝලනාත්මක මෙවැනි විඩීයෝ පළ කිරීමේදී මේවායේ වගකීමක් යූටියුබ් ආයතනය ගන්නේ නැති බව පැවසුවට එය ආරක්ෂිත දෙයක් නෙමෙයි.
