සිය වත්කම් සහ බැරකම් ප්‍රකාශ දිවුරුම් ප්‍රකාශයක් මාර්ගයෙන් ලබන දෙසැම්බර් මස 30 වැනිදා හෝ ඊට පෙර ඉදිරිපත් කරන ලෙස හිටපු ජනාධිපති මෛත්‍රීපාල සිරිසේන මහතා ඇතුළු සිවුදෙනකුට ශ්‍රේෂ්ඨාධිකරණය ඊයේ (02) නියම කළේය.
බුද්ධි තොරතුරු ලැබී තිබියදීත් පාස්කු දින ත්‍රස්ත ප්‍රහාරයන් වළක්වා ගැනීමට කටයුතු නොකිරීම මඟින් ජනතාවගේ මූලික මිනිස් අයිතිවාසිකම් උල්ලංඝනය වී ඇති බවට තීන්දු කරමින් ඒ වෙනුවෙන් ගෙවන ලෙස නියම වූ වන්දි මුදල් හිටපු ජනාධිපතිවරයා ඇතුළු එම සිවුදෙනා සම්පූර්ණයෙන් නොගෙවා සිටීම සම්බන්ධයෙන් ගොනු කළ මෝසම් සම්බන්ධයෙන් කරුණු සලකා බැලීමෙන් අනතුරුව සත් පුද්ගල ශ්‍රේෂ්ඨාධිකරණ විනිසුරු මඬුල්ලක් විසින් මෙම නියෝගය කරන ලදි.
අදාළ මූලික අයිතිවාසිකම් පෙත්සම්වල වගඋත්තරකරුවන් වන හිටපු ජනාධිපති මෛත්‍රීපාල සිරිසේන, හිටපු ආරක්ෂක ලේකම් හේමසිරි ප්‍රනාන්දු, හිටපු පොලිස්පති පූජිත් ජයසුන්දර, රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන යන අය සතුව ඇති වත්කම් සහ බැරකම් ප්‍රකාශ ගොනු කිරීමට මෙලෙස නියම කෙරිණ.
පාස්කු ප්‍රහාරය සිදුවූ 2019 අප්‍රේල් මස 21 වැනිදා සිට 2022 නොවැම්බර් මස 02 වැනිදා වන විට පැවති වත්කම් බැරකම් ප්‍රකාශ ගොනු කරන ලෙස නියම විය.
අදාළ නඩු තීන්දුව මඟින් නියම කරන ලද වන්දි මුදල් ගෙවීම සඳහා වගඋත්තරකරුවන්ට 2024 ජුනි මස 30 වැනිදා තෙක් කල් ලබා දීමට ශ්‍රේෂ්ඨාධිකරණය එහිදී තීරණය කළේය.
එසේම අදාළ තීන්දුව මඟින් නියම කළ පරිදි රාජ්‍ය සේවයේ හිටපු ප්‍රධානී නිලන්ත ජයවර්ධන මහතා සම්බන්ධයෙන් ගනු ලැබූ විනය පියවර කවරේද යන්න සහ වින්දිතයන්ට වන්දි ලබා දීම සම්බන්ධ ප්‍රගති වාර්තාවක් දෙසැම්බර් මස 30 වැනිදා වන විට අධිකරණයට ඉදිරිපත් කරන ලෙස නීතිපතිවරයාට නියම කෙරිණ.
අගවිනිසුරු ජයන්ත ජයසූරිය මහතා සහ බුවනෙක අලුවිහාරේ, මුර්දු ප්‍රනාන්දු, එස්. තුරෙයිරාජා, ඒ.එච්.එම්.ඩී. නවාස්, කුමුදුනී වික්‍රමසිංහ සහ ශිරාන් ගුණරත්න යන සත් පුද්ගල ශ්‍රේෂ්ඨාධිකරණ විනිසුරු මඬුල්ල හමුවේ මෙම පෙත්සම් කැඳවන ලදි.
ශ්‍රේෂ්ඨාධිකරණය විසින් ගෙවන ලෙස නියම කළ වන්දි මුදල් ගෙවීමට ඇති නොහැකියාව පිළිබඳව කරුණු ඉදිරිපත් කරමින් සහ වගඋත්තරකාර පාර්ශ්වය මෝසම් කිහිපයක් සහ අදාළ තීන්දුව අනුව කටයුතු නොකිරීම සම්බන්ධයෙන් වගඋත්තරකරුවන්ට එරෙහිව පියවර ගන්නා ලෙස ඉල්ලා පෙත්සම්කාර පාර්ශ්වය විසින් ඉදිරිපත් කළ මෝසම් සම්බන්ධයෙන් එහිදී කරුණු සලකා බලන ලදි.
එහිදී නීතිපතිවරයා වෙනුවෙන් පෙනී සිටි ජ්‍යෙෂ්ඨ අතිරේක සොලිසිටර් ජනරාල් ප්‍රියන්ත නාවාන මහතා සඳහන් කළේ ශ්‍රේෂ්ඨාධිකරණය විසින් නියම කරන ලද වන්දි මුදල් සම්පූර්ණ වශයෙන් ගෙවීමට රජය සහ ජාතික බුද්ධි ප්‍රධානී සිසිර මෙන්ඩිස් මහතා මේ වන විට කටයුතු කර ඇති බවය.
ඒ අනුව ඔවුන් මෙම පෙත්සම් විභාගයෙන් නිදහස් කිරීමට විනිසුරු මඬුල්ල තීරණය කළේය.
එහිදී ජනාධිපති නීතිඥ චන්දක ජයසුන්දර මහතා සඳහන් කළේ ශ්‍රේෂ්ඨාධිකරණය කළ නියෝගය අනුව රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතාට එරෙහිව විනය කමිටුවක් මඟින් මූලික විනය පරීක්ෂණයක් සිදු කළ බවය.
ඒ සම්බන්ධ වාර්තාවක් ජාතික පොලිස් කොමිසම වෙත යොමු කර ඇති බව ඒ මහතා සඳහන් කළේය.
ජාතික පොලිස් කොමිසම එම වාර්තාව සම්බන්ධයෙන් අවධානය යොමු කළ අතර, එහිදී සොයා බැලිය යුතු තවත් කරුණු කිහිපයක් සම්බන්ධයෙන් විමර්ශනය කිරීම සඳහා නැවත එය අදාළ විනය කමිටුව වෙත යොමු කළ බව එහිදී ජ්‍යෙෂ්ඨ අතිරේක සොලිසිටර් ජනරාල් ප්‍රියන්ත නාවාන මහතා සඳහන් කළේය. අනතුරුව මැල්කම් කාදිනල් රංජිත් හිමිපාණන් වෙනුවෙන් පෙනී සිටි ජනාධිපති නීතිඥ ෂමිල් පෙරේරා මහතා සඳහන් කළේ අදාළ ශ්‍රේෂ්ඨාධිකරණ තීන්දුව මඟින් නියම කළ වන්දි මුදල් ගෙවීමට හිටපු ජනාධිපති මෛත්‍රීපාල සිරිසේන මහතා විසින් වසර 10ක කාලයක් අධිකරණයෙන් ඉල්ලා ඇති බවය.
එවැනි දීර්ඝ කාලයක් ලබා දීම ප්‍රායෝගික නොවන බවද එය අදාළ ප්‍රහාරය නිසා පීඩාවට පත්වූ පාර්ශ්වයට සහනයක් ලබා දීමට බාධාවක් විය හැකි බව ද ඒ මහතා සඳහන් කළේය.
රටේ හිටපු ජනාධිපතිවරයකු අධිකරණ නියෝග නොතකා කටයුතු කිරීම සෙසු අයට වැරදි පූර්වාදර්ශයක් විය හැකි බව ඒ මහතා සඳහන් කළේය. මෙහිදී පෙත්සම්කාර පාර්ශ්වයක් වෙනුවෙන් පෙනී සිටි නීතිඥ ගාමිණී පෙරේරා මහතා සඳහන් කළේ අදාළ ශ්‍රේෂ්ඨාධිකරණ නියෝගයන් අනුව කටයුතු නොකළ වගඋත්තරකරුවන්ට එරෙහිව අධිකරණයට අපහාස කිරීම යටතේ පියවර ගත යුතු බවය.
වගඋත්තරකරුවන් තමන්ට නියම වූ දඩ මුදල් නොගෙවීම නිසා වින්දිතයාට වන්දි ගෙවීම සිදු කරන්නේ කෙසේද යන්න ඒ මහතා එහිදී ප්‍රශ්න කළේය.
ඒ අනුව වන්දි මුදල් මෙතෙක් නොගෙවූ වගඋත්තරකරුවන්ට එරෙහිව ආණ්ඩුක්‍රම ව්‍යවස්ථාවේ 105 (3) යටතේ අධිකරණයට අපහාස කිරීම සම්බන්ධයෙන් පියවර ගන්නා ලෙස අධිකරණයෙන් ඔහු ඉල්ලා සිටියේය.
මෙහිදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ මනෝහර ද සිල්වා මහතා සඳහන් කළේ ශ්‍රේෂ්ඨාධිකරණ නියෝග අනුව කටයුතු නොකළ වගඋත්තරකරුවන්ට එරෙහිව අධිකරණයට අපහාස කිරීම සම්බන්ධයෙන් පියවර ගැනීම මඟින් වින්දිතයන්ට සාධාරණයක් ඉටු නොවන බවය. ඔවුන්ට සාධාරණයක් ඉටුකර ගැනීමට නම් අදාළ වගඋත්තරකරුවන්ගේ වත්කම් හරහා අදාළ වන්දි මුදල් අය කර ගැනීමට කටයුතු කළ යුතු බව ඔහු සඳහන් කළේය. මෙහිදී පෙත්සම්කාර පාර්ශ්වයක් වන ශ්‍රී ලංකා නීතිඥ සංගමය වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා සඳහන් කළේ අදාළ වන්දි මුදල් ගෙවීමට තමන්ට හැකියාවක් නොමැති බවට වගඋත්තරකරුවන් සාධක සහිතව ඔප්පු කළ යුතු බවය.
මෙම වගඋත්තරකරුවන් විසින් එවැනි කිසිවක් ඉදිරිපත් කර නොමැති බැවින් ඔවුන් සහ ඔවුන්ගේ පවුල්වල සාමාජිකයන්ගේ වත්කම් සහ බැරකම් ප්‍රකාශ ඉදිරිපත් කරන ලෙස නියෝගයක් සිදු කළ යුතු බව ද ඒ මහතා සඳහන් කළේය.
මෙහිදී වගඋත්තරකාර රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතා වෙනුවෙන් පෙනී සිටි ජනාධිපති නීතිඥ චන්දක ජයසුන්දර මහතා සඳහන් කළේ සිය සේවාදායකයාට අධිකරණය විසින් නියම කළ දඩ මුදල් ගෙවා ගැනීමට නොහැකි තත්ත්වයක් ඇති බවය.
සිය රැකියාවෙන් උපයාගත් මිලියන 25ක මුදල සහ කැනඩාවේ මහ කොමසාරිස්වරයා ලෙස සේවය කිරීම වෙනුවෙන් ලැබුණු කැනේඩියානු ඩොලර්වලින් උපයාගත් මිලියන හතරක මුදලක් ඔහුගේ සම්පූර්ණ වත්කම බව ඒ මහතා සඳහන් කළේය. රුපියල් බිලියන 300 බැගින් ඉල්ලමින් මීගමුව සහ කොළඹ දිසා අධිකරණවල පාර්ශ්වයන් කිහිපයක් විසින් සිය සේවාදායකයාට එරෙහිව සිවිල් නඩු පවරා ඇති බවද ඒ මහතා සඳහන් කළේය. ඕනෑම පුද්ගලයකුට මුදල් ගෙවීමට ධාරිතාවක් ඇති බවත් සිය සේවාදායකයාට මෙම මුදල කිසිසේත්ම ගෙවීමට හැකියාවක් නොමැති බවත් ඒ මහතා සඳහන් කළේය.
එහිදී වගඋත්තරකාර හිටපු ජනාධිපති මෛත්‍රීපාල සිරිසේන මහතා වෙනුවෙන් කරුණු ඉදිරිපත් කළ ජනාධිපති නීතිඥ ෆයිසර් මුස්තාපා මහතා සඳහන් කළේ සිය සේවාදායකයා ජනාධිපතිවරයා ලෙස රාජකාරිය පැහැර හැරීමක් සිදු කර නැති නමුත් මෙම ශ්‍රේෂ්ඨාධිකරණ තීන්දුව භාර ගන්නා බවය.
ඒ අනුව තමන්ට නියම කළ වන්දි මුදලෙන් මිලියන පහළොවක් ගෙවීමට මේ වන විටත් ඔහු කටයුතු කර ඇති බව ජනාධිපති නීතිඥවරයා සඳහන් කළේය. ඉතිරි මුදල වාරික වශයෙන් ගෙවීම සඳහා වසර 10ක කාලයක් ඔහු ඉල්ලා ඇති බවද ඒ මහතා සඳහන් කළේය.
හිටපු ජනාධිපතිවරයා ලෙස සහ පාර්ලිමේන්තු මන්ත්‍රීවරයකු ලෙස තමන්ගේ ආදායම් මාර්ග පිළිබඳ අදාළ මෝසම් මඟින් පැහැදිලි ලෙස කරුණු ඉදිරිපත් කර ඇති බව ඔහු පෙන්වා දුන්නේය. ඒ අනුව සිය සේවාදායකයාට එරෙහිව අධිකරණයට අපහාස කිරීම සම්බන්ධයෙන් පියවර ගත නොහැකි බව ජනාධිපති නීතිඥවරයා සඳහන් කෙළේය.
කෙසේ වුවද පාස්කු ත්‍රස්ත ප්‍රහාරය සම්බන්ධයෙන් බ්‍රිතාන්‍ය චැනල් 4 නාළිකාව මඟින් නව කරුණු අනාවරණය කර ඇති බව ඒ මහතා සඳහන් කළේය. එම කරුණු සම්බන්ධව විමර්ශනය කිරීමට ජනාධිපතිවරයා විසින් පාර්ලිමේන්තු තේරීම් කාරක සභාවක් පත් කිරීමට තීරණය කළ බව ද ජනාධිපති නීතිඥවරයා කියා සිටියේය.
එහි කටයුතු අවසන් වන තෙක් මෙම නඩු කටයුත්ත බහා තබන ලෙස ඔහු අධිකරණයෙන් ඉල්ලා සිටියේය. මෙහිදී වගඋත්තරකාර හිටපු පොලිස්පති පූජිත් ජයසුන්දර මහතා වෙනුවෙන් පෙනී සිටි නීතිඥ ශාමල් කොල්ලුරේ මහතා සඳහන් කළේ සිය සේවාදායකයාට ගෙවීමට නියම වූ වන්දි මුදලෙන් කොටසක් ගෙවීමට මේ වන විට කටයුතු කර ඇති බවය.
ඉතිරි මුදල ගෙවීමට නොහැකි බවද ඒ මහතා සඳහන් කළේය.
ඔහු සතුව ඇති කුඹුරු සහ පොල් ඉඩම් හැර වෙනත් ආදායම් මාර්ගයක් නොමැති බවද ඔහු සඳහන් කළේය.
මෙහිදී පෙත්සම්කාර පාර්ශ්වයන් වෙනුවෙන් පෙනී සිටි ජනාධිපති නීතිඥ සාලිය පීරිස් මහතා සහ ජනාධිපති නීතිඥ සංජීව ජයවර්ධන යන මහත්වරු ද හිටපු ජනාධිපතිවරයා වෙනුවෙන් ඉදිරිපත් කළ කරුණු සම්බන්ධයෙන් විරුද්ධත්වය පළ කරන බව ප්‍රකාශ කළහ.
දෙපාර්ශ්වයේ කරුණු සලකා බැලීමෙන් අනතුරුව ඒ සම්බන්ධයෙන් සිය තීන්දුව ප්‍රකාශ කරමින් අගවිනිසුරු ජයසූරිය මහතා සඳහන් කළේ අදාළ නඩු තීන්දුව අනුව කටයුතු කිරීම සම්බන්ධයෙන් වගඋත්තරකරුවන් අධිකරණයට අපහාස කිරීමට එරෙහිව මේ අවස්ථාවේදී කිසිදු පියවරක් නොගන්නා බවය.
එහෙත් අදාළ වන්දි ගෙවීම් කටයුතු සම්බන්ධයෙන් ඉහත නියෝගයන් සිදු කරන බවද ඒ මහතා සඳහන් කළේය. මේ සම්බන්ධයෙන් කරුණු නැවත සලකා බැලීම සඳහා මෙම පෙත්සම් 2024 ජූලි මස 15 වැනිදා නැවත කැඳවීමට තීරණය කෙරිණ. බුද්ධි තොරතුරු ලැබී තිබියදීත් පාස්කු ත්‍රස්ත ප්‍රහාරය වළක්වා ගැනීමට කටයුතු නොකිරීම මඟින් මූලික අයිතිවාසිකම් උල්ලංඝනය කර ඇති බවට තීන්දු කරමින් ඉකුත් ජනවාරි දොළොස් වැනිදා සත් පුද්ගල ශ්‍රේෂ්ඨාධිකරණ විනිසුරු මඬුල්ලක් විසින් නඩු තීන්දුවක් ප්‍රකාශයට පත් කරන ලදි.
මූලික අයිතිවාසිකම් පෙත්සම් දොළහකට අදාළව දෙන ලද එම තීන්දුව මඟින් අදාළ පෙත්සම්වල වගඋත්තරකරුවන් ලෙස නම් කර තිබූ හිටපු ජනාධිපති මෛත්‍රීපාල සිරිසේන, හිටපු පොලිස්පති පූජිත් ජයසුන්දර, රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන, හිටපු ආරක්ෂක ලේකම් හේමසිරි ප්‍රනාන්දු, හිටපු ජාතික බුද්ධි ප්‍රධානී සිසිර මෙන්ඩිස් යන අය විසින් වන්දි ගෙවිය යුතු බවට නියෝග කෙරිණ. අදාළ වන්දි මුදල් එදින සිට මාස හයක කාලයකදී ගෙවන ලෙස ඔවුන්ට නියම විය.
ඒ අනුව ශ්‍රේෂ්ඨාධිකරණය විසින් නියම කළ රුපියල් මිලියන 100ක වන්දි මුදලින් රුපියල් මිලියන 15ක් ගෙවීමට හිටපු ජනාධිපති මෛත්‍රීපාල සිරිසේන මහතා කටයුතු කළ අතර, මිලියන 85ක ඉතිරි වන්දි මුදල රුපියල් ලක්ෂ 85 බැගින් වාරික 10 කින් ගෙවීමට අවසර ඉල්ලා මෝසමක් ඉදිරිපත් කර තිබිණි. 2024 වසරේ ජුනි මස 30 වැනිදා සිට 2033 වසරේ ජුනි මස 30 වැනිදා දක්වා වසර දහයක කාලය තුළ සමාන වාරිකවලින් එම වන්දි මුදල ගෙවා අවසන් කිරීමට අපේක්ෂා කරන බව එහි සඳහන් විය. හිටපු ආරක්ෂක ලේකම් හේමසිරි ප්‍රනාන්දු මහතා තමන්ට ගෙවීමට නියම වූ මිලියන 50ක වන්දි මුදලින් කොටසක් ගෙවා තිබේ.
හිටපු පොලිස්පති පූජිත් ජයසුන්දර මහතා සහ රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතා තමන්ට නියම වූ මිලියන 75 බැගින් වන මුදලින් කොටසක් ගෙවා ඇත.
හිටපු ජාතික බුද්ධි ප්‍රධානී සිසිර මෙන්ඩිස් මහතා තමන්ට ගෙවීමට නියම වූ රුපියල් මිලියන 10ක වන්දි මුදලෙන් කොටසක් ගෙවා අවසන් කර ඇති බව සඳහන් විය.
ඊට අමතරව රජය වෙනුවෙන් මහා භාණ්ඩාගාරය විසින් රුපියල් මිලියනයක වන්දියක් ද ගෙවා තිබේ.
දරුවන් අහිමි වූ පියෙකු සහ එයින් පීඩාවට පත් වින්දිතයන් ඇතුළු පිරිසක් විසින් අදාළ මූලික අයිතිවාසිකම් පෙත්සම් 12 ගොනුකර තිබුණි.
