ලාංකේය සිනමා ඉතිහාසයේ 609 වැනි චිත්‍රපටය වශයෙන් තිරගත වූ ‘වත්සලා අක්කා’ චිත්‍රපටය ඇරඹෙන්නේ මහාචාර්යවරයකු වූ දනුක‍ගේ බිරියගේ අසනීප තත්ත්වය උත්සන්න වීමත් සමඟිනි. ඇය නමින් තිලකාය. චිත්‍රපටයේ කතා තේමාව ගලා යන්නේ තම බිරියන් දෙදෙනකුම මියගිය මහාචාර්යවරයා හා ඔහුට පෙම් බඳින පාසල් ගුරුවරියකගේ සිදුවීම් මාලාවක් ද සමඟිනි. මෙහි අධ්‍යක්ෂවරයා වන්නේ සරත් ගුණරත්නයි. මීට පෙර කලාව හා සම්බන්ධ වී කරුමක්කාරයෝ, මහගෙදර මෙන්ම නවසීලන්ත චිත්‍රපටයකට ද සහාය අධ්‍යක්ෂණයෙන් සම්බන්ධ වූ සරත් ගුණරත්න තම මංගල චිත්‍රපට අධ්‍යක්ෂණයට අත්පොත් තැබුවේ තම සිනමා ගමන් මඟේ ගුරුවරයා වූ තිස්ස අබේසේකරයන්ගේ සහයෝගය මතයි. එම චිත්‍රපටයේ ප්‍රධාන චරිතයට අබේසේකරයන් සම්බන්ධ වූයේ ද මේ නිසාවෙනි. අධ්‍යක්ෂවරයා මේ ආකාරයට වන විට චිත්‍රපටයේ නිෂ්පාදන කටයුතු වෙනුවෙන් බර පැන දැරුවේ වාග්දේවී ෆනෑන්ඩු සහ අසංකා මොනරවිලයි.
චිත්‍රපටයේ ගලායාම අනුව තම දෙවැනි බිරිය ද මියගිය පසු හුදෙකලා වන මහාචාර්යවරයාට පෙම් බඳින්නේ පාසල් ගුරුවරියක වූ වත්සලා ය. ඇය මහාචාර්යවරයාගේ නිර්මාණයන්ට බොහෝසෙයින් ප්‍රිය කරන්නියකි. ඉන් එහා මෙම බැඳියාව වැඩි වන්නට හේතුව වන්නේ මහාචාර්යවරයාගේ පළමු විවාහයේ දියණිය හා වත්සලා මිතුරියන් වීමය. ප්‍රේමය විවිධාකාරය. උස්මිටිකම්, රූප සොබාව ආදිය ප්‍රේමයට වලංගු කාරණා නොවේ. එය ඒ හැටි වෙතත් ප්‍රේමය බිඳී යන්නට ද මෙකී කාරණා වලංගු වන අවස්ථාවන් ද නැතුවා නොවේ. එහෙත් වත්සලාගේ ප්‍රේමයට බාධක පැමිණියේ මහාචාර්යවරයාගේ දියණිය වූ තම මිතුරියගෙනි. එතැන් පටන් ඇය තම ජීවන ගමනේ වෙනස්ම වූ ඉසව්වක් කරා පා තබන්නට සූදානම් වේ. එය කවරක් ද කියා අද ජාතික රූපවාහිනියෙන් රාත්‍රී 10.00ට විකාශය වන ‘වත්සලා අක්කා’ චිත්‍රපටයෙන් නැරඹීමට හැකිවනු ඇත.
1985 ජුනි මස 28 වනදා විකාශය වූ වත්සලා අක්කා චිත්‍රපටය 35mm ප්‍රමාණයේ කළු සුදු චිත්‍රපටයකි. මෙකී චිත්‍රපටයේ ගීත කිහිපයක්ම අන්තර්ගත වන අතර, විශේෂත්වය වන්නේ එහි වඩා ජනප්‍රියත්වයට පත් ගීතයේ ගීත රචකයා මෙන්ම, ගායිකාව ද මේ වන විට ජීවතුන් අතර නොමැති වීමයි. මාලනී බුලත්සිංහල ගායනා කළ මෙම ගීතයේ රචකයා වූයේ තිස්ස අබේසේකරයන්ය.
“සඳ මෝරා උඩු ගුවනට
එන කලට
ඔබේ රුව පෙනෙනවා
කවුළු දොරින් මට
ඉකිලන හදින්
තනි යහනේ ඉන්න විට
හැමටම වඩා මා ගැන
දුක හිතේ මට”
චිත්‍රපටය සඳහා තවත් ගීත කීපයක් අන්තර්ගතව පැවති අතර, ඒවා රචනා කරන ලද්දේ සරත් ගුණරත්න විසිනි.
වත්සලා අක්කා චිත්‍රපටය සම්මාන රාශියක්ම දිනාගැනීමට සමත් විය. 1986 පැවති 14 වැනි සිනමා සම්මාන උලෙළේදී ජනප්‍රියම චිත්‍රපට අංශයෙන් පස්වැනි ස්ථානය දිනාගැනීමට සමත් වූ අතර, එම සම්මාන උලෙළේදීම හොඳම කැමරා අධ්‍යක්ෂණයට මෙන්ම හොඳම ගායිකාවට හිමි සම්මානය ද ලබා ගත්තේය. එමෙන්ම 8 වන ජනාධිපති සම්මාන උලෙළේ දී හොඳම සංස්කරණය, හොඳම කැමරා අධ්‍යක්ෂණය හා 1986 පැවති 13 වන OCIC සිනමා සම්මාන උලෙළේදී හොඳම අධ්‍යක්ෂණය, හොඳම නිළිය, හොඳම තිර රචනය, හොඳම සංස්කරණය, හොඳම සංගීත අධ්‍යක්ෂණය, හොඳම කාර්ය සාධන සම්මාන දෙකක් ද දිනා ගැනීමට සමත් වූ අතර, 8 වන ජනාධිපති සම්මාන උලෙළේදී කුසලතා සම්මාන දෙකක් ද දිනා ගැනීමට සමත් විය.
දේවි චිත්‍රපට ඉදිරිපත් කළ වත්සලා අක්කා චිත්‍රපටය වෙනුවෙන් තිස්ස අබේසේකර, ශ්‍රියානි අමරසේන, නදීකා ගුණසේකර, ඉනෝකා අමරසේන, ඩග්ලස් රණසිංහ, දයා අල්විස්, අසංකා මොනරවිල, සීතා කුමාරි ඇහැලේපොල, අනුරාධා සෙනෙවිරත්න සම්බන්ධ වූ අතර, සංගීතය කාලෝ විජයසිරිගෙනි. දයාරත්න රටගෙදර සහ සෝමරත්න මල්දෙණිය චිත්‍රපටයේ කලා අංශයෙන් සම්බන්ධ විය.
අද රාත්‍රී චිත්‍රපටය නැරඹීමට පෙර සිනමා විචාරක ගාමිණී වේරගම මහතා කරනු ලබන සිනමා විචාරයක් ද ඔබට නැරඹිය හැකිවනු ඇත.
