ජනමාධ්‍ය අමාත්‍යාංශයේ අධීක්ෂණය යටතේ ජාතික චිත්‍රපට සංස්ථාව මෙහෙයවන 20 වැනි ජනාධිපති සම්මාන උළෙල නොවැම්බර් 14දා සවස 6.30ට කොළඹ නෙළුම් පොකුණ රඟහලේදී ජනාධිපති, රනිල් වික්‍රමසිංහ මහතාගේ ප්‍රධානත්වයෙන් පැවැත්වීමට නියමිතය. ඉකුත්දා (31) ජාතික චිත්‍රපට සංස්ථාවේදී ඒ පිළිබඳ මාධ්‍ය දැනුවත් කිරීමේ හමුවක් පැවැත්විණි. ඒ අනුව, මෙවර සම්මාන ප්‍රදානය සඳහා 2019 සහ 2020 දෙවසරට අදාළ චිත්‍රපට 42ක් සලකා බැලේ. ඒ, 2019 වසරේ තිරගත කෙරුණු චිත්‍රපට 30ක් හා 2020 වර්ෂයේදී තිරගත කළ චිත්‍රපට 12ක් වශයෙනි. ඒ සඳහා විවිධ යටතේ සම්මාන 53ක් සමඟ මුදල් ත්‍යාග මෙවර ද පිරිනැමේ. ඒ අතුරෙන් 44ක් ප්‍රධානය. එනම්, හොඳම චිත්‍රපටය, හොඳම අධ්‍යක්ෂ, හොඳම තිර රචනය, හොඳම නළුවා, හොඳම නිළිය, හොඳම සහාය නළුවා, හොඳම සහාය නිළිය, හොඳම කැමරා අධ්‍යක්ෂණය, හොඳම සංගීත අධ්‍යක්ෂණය, හොඳම ගීත රචනය, හොඳම ගී තනුව, හොඳම පසුබිම් ගායකයා, හොඳම පසුබිම් ගායිකාව, හොඳම සංස්කරණය, හොඳම ශබ්ද සැලසුම් ශිල්පී, හොඳම කලා අධ්‍යක්ෂණය, හොඳම අංග රචනා ශිල්පී, හොඳම නැඟී එන නළුවා, හොඳම නැඟී එන නිළිය, උපරිම ප්‍රේක්ෂක ප්‍රතිචාර ලද චිත්‍රපටය, ජූරියේ විශේෂ සම්මානය, ජූරියේ කුසලතා සම්මානයට අමතරව, අනෙකුත් සම්මාන වශයෙන්, පුරෝගාමී සම්මානය, ස්වර්ණ සිංහ සම්මානය, විශ්වකීර්ති සම්මානය වශයෙනි. එසේම, නර්තන අංග සහ දැනට තිරගත වන චිත්‍රපට ගීත ආදියෙන් එදින උලෙළ රස ගැන්වෙයි.
මේ අනුව 2019 වර්ෂය පාදක කරගෙන, ගින්නෙන් උපන් සීතල, කථා කරන හීන, සිකුරු යෝගය, සංසාරේ දඩයක්කාරයා, මානය, හුස්ම, ෆේස් ටු ෆේස්, තාල, වැලි පවුරු, සුභා තෙරණියෝ, විජයබා කොල්ලය, රෂ්, විෂම භාග, දැකල පුරුදු කෙනෙක්, අසන්ධිමිත්තා, සාම කුමරු කතාව, ජය ශ්‍රී ඇමැතිතුමා, ප්‍රසිඩන්ට් සුපර් ස්ටාර්, යූ ටර්න්, නැති බැරි ටාසන්, ඉස්කෝලෙට මං ආවා, තිත්ත ඇත්ත, ගෝරි, රීලෝඩ්, සංගිලි, සුළඟ අප රැගෙන යාවි, එක රෑනක කුරුල්ලෝ, සකී, parthepaa,උලලේනී චිත්‍රපට ද 2020 වර්ෂය සඳහා, සුපර්ණා, පාංශු, මිස් ජෙනිස්, සුනාමි, ද නිව්ස් පේපර්, රූකඩ පැංචි, ද හෝන්, ඇවිලෙන සුළුයි, සූස්ති, ඊතලය, සේද මාවතේ, සෙලීනා චිත්‍රපට සලකා බැලේ. 
ජාතික චිත්‍රපට සංස්ථාවේ සභාපති නීතිඥ, දීපාල් චන්ද්‍රරත්න මහතා ඉකුත්දා මාධ්‍ය හමුවේදී අදහස් දැක්වූයේ,
‘ මෙවරත් උත්කර්ෂවත් අයුරින් ජනාධිපති සිනමා සම්මාන උලෙළ පවත්වනවා. ජනාධිපති සිනමා සම්මාන උලෙළේ ගෞරවය, අභිමානය, විශේෂතා රැකෙන විදියට උත්කර්ෂවත් පරිදි උසස්ම අයුරින් සම්මාන උලෙළ පවත්වනවා. රංගන හා කාර්මික ශිල්පීන්ට සම්මාන ඇතුළුව රුපියල් හැට නව ලක්ෂ විසිපන් දහසක් ත්‍යාග මුදල් වශයෙන් බෙදා දෙනවා. ඒ, හොඳම චිත්‍රපටයට රුපියල් ලක්ෂ දෙකක් ආදී වශයෙන්. ඒ තැනැත්තන් උපරිම වශයෙන් ඇගයීම මෙහි අරමුණයි. එසේම, ලබන වසර මැද වන විට, 2021, 2022 දෙවසර සඳහාත් ජනාධිපති සිනමා උලෙළ පැවැත්වීමට කටයුතු සූදානම් කරමින් සිටිනවා. ‘ වශයෙනි.
මෙදින, ජාතික චිත්‍රපට සංස්ථාවේ අධ්‍යක්ෂ මණ්ඩල සාමාජික, ප්‍රවීණ සිනමා මාධ්‍යවේදී, දේශීය හා ජාත්‍යන්තර සිනමා උලෙළ රැසක ජූරි සභිකයකු වශයෙන් කටයුතු කළ, ඈෂ්ලි රත්නවිභූෂණ මහතා පැවසුවේ, ‘ දේශීය සිනමා කලා ශිල්පීන් උනන්දු කළ යුතුයි. එහිදී ජනාධිපති සිනමා සම්මාන උලෙළ ඉහළින් තියෙනවා. එය මෙරට ඉතා වැදගත් සම්මාන උලෙළක්. ඉදිරියේදී වාර්ෂිකව එම උලෙළ පැවැත්වීමට කටයුතු යෙදිය යුතු බවයි මගේ අදහස…’ පරිදිය. මෙහිදී ජාතික චිත්‍රපට සංස්ථාවේ අධ්‍යක්ෂ මණ්ඩල සාමාජික, සාමාජිකාවන් වන මහාචාර්ය සමන්ත හේරත් හා ප්‍රවීණ රංගන ශිල්පිනී නදීකා ගුණසේකර මෙන්ම මෙවර උලෙළට අනුග්‍රාහකත්වය දැක්වීමට ඉදිරිපත්ව සිටින ගොඩකන්ද හර්බල්ස් අධිපති, වෛද්‍ය ලේල්වල ගොඩකන්ද යන මහත්ම මහත්මීහු ද අදහස් දැක්වූහ.
