Home » ගුරු අමරසර පදනමේදී අද

ගුරු අමරසර පදනමේදී අද

by mahesh
November 3, 2023 1:00 am 0 comment

ඇන්ටන් ජේ. ප්‍රනාන්දු, පසිඳු මිහිරාන් රැටියල, සුදත් මලවීර, සාරංග-තිළිණි

ආචාර්ය, පණ්ඩිත් අමරදේවයන්ගේ 7 වැනි ගුණ සමරුව වෙනුවෙන්, ‘ගුරු අමරසර සමර’ ප්‍රසංගය අද (3) සවස 3ට කොළඹ පදනම් ආයතනයේදී පැවැත්වේ. විශාරද ජගත් වික්‍රමසිංහ, නාලක අංජන කුමාර, ක්‍රිශාන්ත එරන්දක, අසිත් අතපත්තු, සුභානි අමරදේව, රංජන අමරදේව, සුනීර සුමංග ආදීහු ගයති. සංගීතයෙන් මහින්ද බණ්ඩාර ඇතුළු වාද්‍ය වෘන්දය එක් වන මෙදින දෙසුම්, ආචාර්ය සරත් අමුණුගම, ආචාර්ය ඩබ්. ඒ අබේසිංහ, ජ්‍යෙෂ්ඨ මාධ්‍යවේදී තිලකරත්න කුරුවිට බණ්ඩාර, ආචාර්ය රෝහණ වීරසිංහ, දිලීප අබේසේකර, අරුණ ගුණවර්ධනගෙනි.


සන්නාදයාණෙනි 6දා

ප්‍රවීණ සංගීතාචාර්‍ය, ගුවන් විදුලි ගායන ශිල්පී, කලා භූෂණ සම්මානලාභි ජේ.එන්.දයාපාල කලාකරුවාට උපහාර පිදීමේ උත්සවයක් 06 වැනිදා පෙ.ව. 9 ට කොළඹ, මහවැලි කේන්ද්‍රයේ දී පැවැත්වේ. ” සන්නාදයාණෙනි-2023 උත්තම ගුරු පූජා ” නමින් මෙය නම්කොට ඇත. පුලතිසිපුර සහ අකුරැස්ස සිසු සහෘදයන් සංවිධානය කරයි. මෙදින සංගීතය සංගීතවේදී දර්ශන රුවන් දිසානායකගෙනි.


ලියනාඩෝ රඟපෑ කිලර්ස් ඔෆ් ද ෆ්ලවර් මූන්

ටයිටැනික් සිනමා වෘත්තාන්තයේ ජැක්ගේ චරිතයට පණ පෙවූ ලියන‍ාඩෝ ඩිකැප්රියෝ ප්‍රධාන චරිතය හොබවන නවතම හොලිවුඩ් චිත්‍රපටය කිලර්ස් ඔෆ් ද ෆ්ලවර් මූන් මේ වන විට ලෝ පුරා තිරගත වෙනවා. වසර 4කට පසු ලියනාඩෝ හොලිවුඩ් තිරය හා සබැඳුණු කිලර්ස් ඔෆ් ද ෆ්ලවර් මූන් පසුගිය 29 වනදා වන විට ඩොලර් මිලියන 84.7ක ආදායමක් උපයා තිබුණා. ඔක්තෝබර් 20 වනදා රිදී තිරයට මුදාහැරුණු කිලර්ස් ඔෆ් ද ෆ්ලවර් මූන් අධ්‍යක්ෂණය කෙරුණේ ප්‍රවීණ හොලිවුඩ් සිනමා අධ්‍යක්ෂ මාටින් ස්කෝර්සෙසි විසින්.


සුනිල් තිරිහන් වෙලා!

ප්‍රවීණ නාට්‍ය අධ්‍යක්ෂ සුනිල් සමරකෝන්ගේ කලා දිවියට වසර 45ක් පිරීම නිමිත්තෙන් ඉකුත්දා සුදු ලිහිනියෝ නාට්‍යය වේදිකා ගත කිරීමෙන් පසු එහි ආරාධිත අමුත්තා ලෙස පැමිණි රාජ්‍ය අමාත්‍ය ජානක වක්කුඹුර මහතා සමඟ කලාකරුවන් සතුට බෙදා ගත් අයුරු.


කමෝන් ප්‍රසන්න කමෝන්!

දකුණු කොරියාවේදී ඉකුත්දා පැවැති 28 වැනි බූසාන් අන්තර්ජාතික සිනමා උලෙළේදී ප්‍රසන්න විතානගේ අධ්‍යක්ෂණය කළ Paradise මලයාලම් චිත්‍රපටය ආසියාවේ ප්‍රවීණ චිත්‍රපට අධ්‍යක්ෂවරුන්ගේ චිත්‍රපට සඳහා පිදෙන ‘ජීසොක්’ ( jeseok) සම සම්මානයක් දිනා ගන්නා ලදි. ඊට ඉන්දුනීසියාව, කොරියාව, කිරිගිස්තානය, තායිලන්තය, ජපානය, පිලිපීනය, බංග්ලාදේශය, කාම්බෝජය ආදි රටවල් 10ක් නියෝජනය කරමින් චිත්‍රපට ඉදිරිපත් කර තිබිණ. ආර්ථික අර්බුද පැවැති කාලයේදී මෙරට සංචාරයකට පැමිණි කේරළ යුවළක් වටා මෙහි කතාව දිවේ. ප්‍රසන්න විතානගේ 1996 වර්ෂයේදී අනන්ත රාත්‍රිය චිත්‍රපටය උදෙසා ද බූසාන් සම්මාන උලෙළේ විශේෂ ජූරි සම්මානයෙන් පිදුම් ලැබීය.


ප්‍රවෘත්ති මැදිරියෙන් කැදැල්ලට

හිරු රූපවාහිනී නාලිකාවේ ප්‍රවෘත්ති නිවේදක සාරංග පතිරණ සහ නිවේදිකා තිළිණි නදීශා රණසිංහ යුවළ යුග දිවියට පිවිස තිබේ. ජා-ඇළ ‘රම් රිච්’ හෝටල් පරිශ්‍රයේදී පැවති උත්සවයට ක්ෂේත්‍රයෙහි හිතවතුන් ඇතුළු කලාකරුවන් රැසක් එක්ව තිබුණි.


මල් වඩම් අනවශ්‍යයි

ප්‍රියන්ත රංජන්ගේ මල් වඩම් අනවශ්‍යයි නාට්‍ය 11දා සවස 3.30ට සහ 6.45ට බොරැල්ල නාමෙල් මාලිනී පුංචි තියටර්හිදී රඟදැක්වේ. මිහිර සිරිතිලක, කුමාර තිරිමාදුර, සරත් කුලාංග, කුමාරි සේනාරත්න රඟති.


අහිමි තැන් පිරිමැදි මධුරි

නව පරපුරේ ගායිකා මධුරි ප්‍රියංවදාගේ ‘අහිමි තැන්’ කුලුඳුල් ගීත සමුච්චය ඉකුත්දා කොළඹදී එළි දුටුවා. ඒ සමඟ අලුත් වෙනසක් කරන්නත් හැකිවුණු බවයි, මධුරි කියන්නේ. ‘ කෝට්ටේ ආනන්ද බාලිකාවේ ඉගෙන ගන්නා කාලේ ඉඳන්මයි මේ හීනය දැක්කේ. කැසට් සමාගම් හා ගී පද රචකයන් එක්කයි මේ ගමන ආවේ. ඒ එක්කම මවුපිය, නෑසිය හිතමිතුරන්ගේ සහාය නිසයි මාස එකහමාරක් තරම් කෙටි කලෙකදී ගීත 20ක් රූප රචනා සමඟ CD පටයක් එළිදැක්වූ මේ හපන්කම කරන්න ලැබුණේ. පද රචනයෙන්, දිල්කි රොද්‍රිගු, නිලන්ත මාපටුන, නිව්ටන් පෙරේරා, ජයන්ත දිසානායක, ජයමාන්න කැකුළාවල, ආනන්ද බී. නියරේපොළ, සුසිල් කොස්වත්ත, අජන්ත ශ්‍රී ලාල් ෆොන්සේකා, අරුණිකා උඩගම, සරත් වික්‍රමාරච්චි, මධුසංඛ සමරවික්‍රම, දීපානි එපිටහගෙදර, ප්‍රියංග විතාන, සකූ මනෝදර දායක වෙනවා. ගී තනු රචනයෙන් කුසුම් පතිරාජ, නිශානි එදිරිසිංහ, මොහාන් අරුණ කුමාර, මනෝජ් දුශාන්, සුමිත් සුබසිංහ, තිළිණ වීණාධිපති ද නාද සංයෝජනයෙන්, ආචාර්ය, රනුක වික්‍රමසිංහ, ඕෂධ ජයසුන්දර, ඉසුරු එරන්දක ද දායක වෙනවා…’

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT