මහ ගෙදර නි‍ෙවසින් එළියට බැස යන ලෙස දන්වා දියණිවරුන් දෙදෙනාගෙන් පහරකෑමෙන් තැළීම් තුවාල ලබා ඇති වයෝවෘද්ධ කාන්තාවක් ඉකුත් 24 වැනිදා කෑගල්ල මහ රෝහලට ඇතුළත් කර ඇතැයි කෑගල්ල පොලිසිය පැවසීය.
මෙලෙස කෑගල්ල මහ රෝහලේ අංක 02 වාට්ටුවේ නේවාසිකව ප්‍රතිකාර ලබමින් සිටින්නේ කෑගල්ල මොළගොඩ, කළුගල්ල ග්‍රාමයේ පදිංචිව සිටින 85 හැවිරිදි තිදරු වයෝවෘද්ධ මවකි.
කෑගල්ල මහ රෝහලේ නේවාසිකව ප්‍රතිකාර ලබන වයෝවෘද්ධ කාන්තාවට පිරිමි දරුවෙක් හා ගැහැනු දරුවන් දෙදෙනෙක් සිටියි. ස්වාමිපුරුෂයා කලකට ඉහතදී මිය ගොස් තිබේ. ස්වාමි පුරුෂයා මිය යාමට පෙර ගැහැනු දරුවන් දෙදෙනා පියාගේ ඇඟිලි අත්සන යොදා පදිංචිව සිටින ඉඩම ලියා ගෙන ඇති බව ඊයේ (26) දී ඇති ප්‍රකාශයේ සඳහන් කර තිබේ. දියණියන් දෙදෙනා ඉඩම හොර රහසේ ලියා ගෙන තිබීම නිසා එකම පුතා අමනාප වී කොළඹ පදිංචියට ගොස් තිබේ. දියණියන් දෙදෙනා විවාහ වී වෙන වෙනම දැනට පදිංචිව සිටින අතර මහ ගෙදර නි‍ෙවසේ දැනට පදිංචිව සිටින්නේ 85 හැවිරිදි වයෝවෘද්ධ මව පමණිය.
දරුවන් මෙම මවට නොසලකා හැරීම හේතුවෙන් හා යමක් උපයා ගෙන ජීවත් වීමට ශක්තියක් නොමැති බවත් පොලිසිය පැවසීය. අසල්වැසියන් කරුණාව දක්වා කෑම දෙන බවත් නොමැති නම් කෑම ඉල්ලා ගෙන කා තනියම ජීවත් වෙමින් සිටියි. මවට අසල්වැසියන් සැලකීම හේතුවෙන් දියණියන් දෙදෙනා අවස්ථා ගණනාවක දී අසල්වැසියන්ට සැලකීම අතහැර දමන ලෙස දන්වා බැණ ඇති බවත් වාර්තා වෙයි. දරුවන් නොසලකා හැරීම හේතුවෙන් හා පදිංචිව සිටින මහ ගෙදරින් එළියට යන ලෙස දියණියන් දැන්වූවා යැයි පවසා වයෝවෘද්ධ මව ඉකුත් දිනකදී කෑගල්ල මූලස්ථාන පොලිසියට පැමිණිල්ලක් ඉදිරිපත් කර තිබුණි. පැමිණිල්ලට අනුව පොලිස් නිලධාරි මහතෙකු ඉකුත් 23 වැනිදා පෙරවරුවේ වයෝවෘද්ධ මව පදිංචිව සිටින නි‍ෙවසට ගොස් ආරවුල සම්බන්ධයෙන් විමසීමක් කර නිලධාරියා ආපසු දියණියන් දෙදෙනා සොයා ගෙන ගොස් කරුණු කාරණා පැහැදිලි කර දී තිබේ.
එදින දහවල් 12.30ට වයෝවෘද්ධ මව අසල්වැසියෙකු දී තිබුණු බත් පිඟානක් කුස්සියේ සිට කමින් සිටිය දී යළි දියණියන් දෙදෙනා පැමිණ අතින් පහර දීමක් සිදු කර තල්ලු කර තිබේ. එම අවස්ථාවේ දී කුස්සියේ තිබුණු මඩ වතුර වළට වයෝවෘද්ධ මව විසි වී තිබේ.
පසුව වයෝවෘද්ධ මවට එම අවස්ථාවේ දී සිහිමුර්ජාව සිට ඇති බවත් දියණියන් දෙදෙනා ආපසු හැරී ගොස් ඇති බවත් පියවි සිහිය පැමිණීමෙන් පසුව ඇඳුම් ඉවත් කර මඩ සොදා ගත් බවත් පොලිසියට දී ඇති ප්‍රකාශයේ සඳහන් කර තිබේ.
එදින රාත්‍රි නින්දට වැටී ඇති මව පසුදා 24 වැනිදා කෑගල්ල මහ රෝහලට පැමිණ ඇතුළත්ව තිබේ. ඇය දැනට අංක 02 වාට්ටුවේ නේවාසිකව ප්‍රතිකාර ලබන අතර ජීවත්ව සිටිනකම් නිවසේ රැඳී සිටිමට අවස්ථාව උදා කර දෙන ලෙස වයෝවෘද්ධ මව පොලිසියෙන් කාරුණිකව ඉල්ලීමක් ද කර තිබේ.
සිද්ධිය සම්බන්ධයෙන් කෑගල්ල පොලිසිය විමර්ශන කටයුතු සිදු කරයි.
