2017 වසරේදී සාවද්‍ය ලේඛන ඉදිරිපත් කරමින් යම් පිරිසක් රාජ්‍ය උකස් හා ආයෝජන බැංකුවෙන් ණය ලබා ගැනීම හේතුවෙන් එම බැංකුවට රුපියල් මිලියන 68ක මුදලක් අලාභ වීම සම්බන්ධයෙන් පොදු ව්‍යාපාර පිළිබඳ කාරක සභාවේදී අවධානය යොමුව ඇත.
බැංකුවේ ඇතැම් නිලධාරීන්ගේ ද සහයෝගය ඇතිව අයැදුම්කරුවන් 49ක් සඳහා බැංකුව අදාළ ණය මුදල දීමෙන් මෙම වංචාව සිදුව ඇති බව ද හෙළි වී ඇත.
එමෙන්ම මේ වෙනුවෙන් දැනටමත් ගෙන ඇති නෛතික කටයුතු අනුව රුපියල් මිලියන 8ක් ලැබී ඇති බවත් ඉතිරි මුදල ගැනීම සඳහා නෛතික ක්‍රියාමාර්ග ගෙන ඇති බවත් කාරක සභාව වෙත පැමිණි නිලධාරීහු සඳහන් කළහ. කෙසේ වුවද මෙම සිදුවීම, සිදු වී වසර හයක් ගතවුවද නිලධාරීන්ට දඬුවමක් ලබා දී මෙම මුදල් අය කර ගැනීම පමා වීම පිළිබඳ මෙහිදී විශේෂ අවධානය යොමු විය. මේ අනුව අදාළ සිදුවීම සම්බන්ධයෙන් සති දෙකක් තුළ වාර්තාවක් ලබා දෙන ලෙස කෝප් සභාපතිවරයා නිලධාරීන්ට නියෝග කළේය.
රජයේ ගිණුම් පිළිබඳ කාරක සභාව එහි සභාපති, පාර්ලිමේන්තු මන්ත්‍රී මහාචාර්ය රන්ජිත් බණ්ඩාර මහතාගේ ප්‍රධානත්වයෙන් පාර්ලිමේන්තු සංකීර්ණයේදී පැවැති අතර කාරක සභාව වෙත රාජ්‍ය උකස් හා ආයෝජන බැංකුව කැඳවා තිබිණ.
මෙහිදී රාජ්‍ය උකස් හා ආයෝජන බැංකුවේ 2020,2021 වර්ෂවල විගණන වාර්තා පරීක්ෂා කිරීම සහ වත්මන් කාර්ය සාධනය පිළිබඳ විමර්ශනය කිරීම සිදු විය. මුදල් අමාත්‍යාංශය නියෝජනය කරමින් නිලධාරීන් ද රාජ්‍ය උකස් හා ආයෝජන බැංකුවේ සභාපතිවරයා, සාමාන්‍යාධිකාරිවරයා ඇතුළු නිලධාරීන් ද මේ අවස්ථාවට කැඳවා තිබිණි.
රාජ්‍ය උකස් හා ආයෝජන බැංකුවේ පරිපාලන දුර්වලතා මඟහරවා නව මුහුණුවරකින් තරගකාරී බැංකුවක් ලෙස පවත්වාගෙන යෑමට ද මෙහිදී කෝප් කමිටුව නිර්දේශ කර ඇත.
