නීති විරෝධි මත්පැන් ජාවාරමක් වැටලීමට වාකරේ පොලිසියේ නිලධාරීන් පිරිසකට පහර දුන් කාන්තාවන් පස් දෙනකු වාකරේ පොලිසියේ නිලධාරීන් විසින් අත්අඩංගුවට ගෙන තිබේ. මේ අතරින් කාන්තාවන් තිදෙනකු පෙරේදාත් (25), දෙදෙනකු ඊයේත් (26) අත්අඩංගුවට ගෙන ඇත.
වාකරේ පොලිස් ස්ථානයට අනුයුක්ත පොලිස් පරීක්ෂක අනිල් ඇතුළු කණ්ඩායමක් විසින් වාකරේ කදිරවේලිහි පිහිටි නිවෙසක් පෙරේදා (25) පරීක්ෂා කරනු ලබන්නේ එම නිවසේ නීති විරෝධි මත්පැන් ජාවාරමක් සිදු වන බවට ලද තොරතුරකට අනුවය. අදාළ නිවෙසට ගොස් කළ පරීක්ෂාවේදී එහි නාන කාමරයක තිබී ගෝඩා මි.ලී. 26,250ක් ඇතුළු පෙරීමේ උපකරණ රැසක් සොයාගෙන තිබේ. මේ මත්පැන් හා උපකරණ පොලිස් භාරයට ගැනීමට යෑමේදී නිවෙසේ හිමිකාරිනිය කෑගසා ඇති බවත්, එහිදී එම ස්ථානයට අසල්වැසි කාන්තාවන් සිව් දෙනකු පැමිණ නිවෙස් හිමි කාන්තාව සමඟ එක්ව පොලිස් නිලධාරීන්ට පරුෂ වචනවලින් බැණවැදී පහර දී ඇති බවත් පොලිසිය කියයි.
පොලිස් නිලධාරීන්ගේ රාජකාරියට බාධා වන ආකාරයට හැසුරුණු මේ අයගේ පහරකෑමකින් පොලිස් කොස්තාපල්වරියකද තුවාල ලබා වාකරේ රෝහලට ඇතුළත් කර ඇත. ඒ අවස්ථාවේ පොලිසිය ක්‍රියාත්මක වෙමින් සිය බලය යොදා තත්ත්වය පාලනය කර කාන්තාවන් තිදෙනකු අත්අඩංගුවට ගෙන ඇත. ඔවුන් තිදෙනා කදිරවේලිහි පදිංචිකරුවන් වන අතර අවුරුදු 47, 43 හා 27 යන වයස්වල පසුවන්නන් බව පොලිසිය කියයි. සෙසු දෙදෙනා අත්අඩංගුවට ගෙන ඇත්තේ ඊයේය. මේ සැකකරුවන් 5 දෙනාම අධිකරණයට ඉදිරිපත් කිරීමට නියමිතව ඇත.
