කසුන් කල්හාර සහ සනුලි පෙරේරාගේ නවතම ගීතය ‘කුරුලු බිළින්දී’ඉකුත්දා කොළඹ කැපිටල් ටුවින් පික්ස් හිදී කලාකරුවන් සහ විශේෂ ආරාධිත අමුත්තන්ගේ සහභාගිත්වයෙන් යුතුව ඉකුත්දා ජනගත කෙරිණ.
වෛද්‍ය ප්‍රභා කුමාර රාජගුරුගේ ගේය පද රචනයක් වන මෙහි සංගීතය, තනු නිර්මාණය කසුන් කල්හාර ගෙනි.
සචිත්‍රගෙන් ආදරයේ පියාපත්
සචිත්‍ර රාහුබද්ධගේ ‘ආදරයේ පියාපත්’ ළමා නාට්‍ය 2දා සවස 3.30 සහ 6.30ට මරදාන ටවර් රඟහලේදී. හසිත් වෙත්තසිංහ, වරංගනා කුඹලාතර ආරච්චි, තුෂී සමරසේකර, මලීෂ ජයසිංහ, ප්‍රභාත් බස්නායක, නිමාෂි ගමගේ ආදිහු රඟති. වේශ නිරූපණයෙන් වාරු රාජතේව ද සංගීතයෙන් හේෂාන් කුරුප්පු ද වේදිකා අලංකරණයෙන් රංග සමරකෝන් ද වේදිකා පරිපාලනයෙන් ප්‍රභාත් බස්නායක, නිමාෂි ගමගේ, සහන් බණ්ඩාරනායක ආදිහු එක්වෙති.
ඩරියුෂ්ව ලොවට අහිමි කරලා
ඉරාන ජාතික ප්‍රවීණ චිත්‍රපට අධ්‍යක්ෂවරයෙක් වන ඩරියුෂ් මෙහර්ජුයි සහ ඔහුගේ බිරිඳ පසුගියදා සිය නිවසේදී නාඳුනන පුද්ගලයකුගේ පිහි ඇනුම් හේතුවෙන් ඝාතනයට ලක් ව තිබෙනවා. ඩරියුෂ්, ජාතික සහ ජාත්‍යන්තර සම්මාන රැසකින් පිදුම් ලැබූ අධ්‍යක්ෂවරයෙක් වන අතර ඔහු භාෂා පරිවර්තකයකු ලෙස ද දෙස් විදෙස් පැසසුමට පාත්‍ර වූවෙකි. ඔහුගේ බිරිය ද චිත්‍රපට ගණනාවකටම රංගනයෙන් දායක වූ රංගන ශිල්පිනියකි.
ලෝක සාමය, සහයෝගිතාව අයදිති
භාරතීය ගායක පද්ම ශ්‍රී හරිහරන් සමඟ මෙරට සම්මානනීය සංගීත අධ්‍යක්ෂවරයකු වන දර්ශන රුවන් දිසානායක ගයන ‘සංජීවනී ලේ ආ රේ’ ගීතය ඉකුත්දා ඉන්දියාවේදී එළිදැක්විණි. මෙහි ගී පද, මාධ්‍යවේදිනී, වත්සලා සමරකෝන්ගෙනි. සංගීතයට දායක වී ඇත්තේ මෙරට සංගීත වෘන්දයක් වන අතර මෙය කලාපීය සාමය, සහයෝගිතාව අරමුණු කර ගත්තකි.
අශෝක ආදර අන්තයේ
අශෝක අතාවුදහෙට්ටි අධ්‍යක්ෂණය කරන ආදර අන්තය චිත්‍රපටයේ මුහුරත් උලෙළ ඉකුත්දා (22) සවස කොළඹදී පැවැත්විණ. වීණා ජයකොඩි, යශෝධා රාධක්‍රිෂ්ණන්, ජනක කුඹුකගේ, හර්ෂ තෙන්නකෝන්, ධර්මප්‍රිය ඩයස්, රජීව් ආනන්ද, සකුන්තලා පීරිස් ආදිහු රගති. සහාය අධ්‍යක්ෂණයෙන් චතුරංගි රශිකලා පතිරගේ, කැමරාවෙන් සිසිකිරණ පරණවිතාන, අංග රචනයෙන් වසන්ත පූර්ණවංශ, කලා අධ්‍යක්ෂණය හා රංග වස්ත්‍ර නිර්මාණයෙන් සංජීව කරුණාරත්න, සංගීත අධ්‍යක්ෂණයෙන් සමනල අතාවුදහෙට්ටි, සංස්කරණය රවීන්ද්‍ර ගුරුගේ, ගැයුමින්, රූකාන්ත ගුණතිලක, චතුරිකා නිර්මාණි, ලක්ෂ්මන් මෙන්ඩිස්ගෙනි. නිෂ්පාදනය, ප්‍රශාන්ත දිසානායක, එච්. ඩී. පී හඳපාන්ගොඩ, අභයපාල පෙරේරා, ඩී තෙන්නකෝන්, ඉසුරු යාපා විසිනි.
අනුරාධා මුණගැසෙමු
අනුරාධා පෙරේරා මෙරටට අමුත්තියක නොවේ. ගුවන් විදුලි නිවේදිකාවක් විදියට විවිධ නාළිකා ඔස්සේ හපන්කම් පෙන්වූ අනුරාධා මේ දිනවල මෙරට විවිධ නාළිකා වලින් විකාශය කෙරෙන ටෙලි නාට්‍ය, කාටූන් වැඩසටහන් රැසකටම හඬ කැවීමෙන් දායක වෙනවා. ඒ අතර දෙරණ රූපවාහිනියේ සදහටම ඔබ මගේ ( දිශා), ඔබත් මමත් ඇයත් ( සාංචි), රාවණා ( කෛකේෂී) ආදී ජනප්‍රිය චරිත පසුබිමෙන් ඇසෙන්නේ අනුරාධාගේ හඬයි. එසේම, හිරු රූපවාහිනී නාළිකාවේ ශේරෝ, බැලරිනා, තාමත් ආදරය නැත්නම් ( ඉපෙක්), රූම් ( රූමා) විදියටත්, ස්වර්ණවාහිනියේ ඇලඩින්හි යස්මින් කුමරියට හඬකවන අනුරාධා කලාවේ නිරත වන අතරේම ඇයගේම ව්‍යාපාරයක නිරත වෙනවා. එවන් ඇය ගුරුහරුකම් දුන්, විපුල් ධර්මප්‍රිය, ලාල් සරත් කුමාර, ප්‍රගීත් විජේසූරිය, සුරංග මහේෂ් මෙන්ඩිස් ආදීන්වත් නිතර සිහිපත් කරනවා.
මං තවම තනිකඩයි
– නුවන් විජය ශ්‍රී
රංගනය, ගායනය, නාට්‍යකරණය ආදී කලාවේ විවිධපැතිවලින් හපන්කම් පෙන්වන්නෙකි, නුවන් විජය ශ්‍රී. ඉකුත් දිනවලදී ධර්මපාල සුදුමලකන්දගේ ‘අද්භූත බෝනික්කා’ චිත්‍රපටයට රංගනයෙන් දායක වූ විජය ශ්‍රී මේ දිනවල සේකර අමුවත්ත බණ්ඩාරගේ ‘හතර වරං’ සහ පද්මසිරි ගමගේ ගේ ‘ස්ත්‍රී සහ වයිරා’ නාට්‍ය සමඟත් එක්ව සිටිනවා. වසූදා ටෙලි නාට්‍යයේදී ‘ලොක්කා’ විදියටත් ඔහු අප හමුවුණා. ‘ප්‍රවේශමෙන්’ ඔහුගේම නාට්‍ය නිර්මාණයක්. ‘ එකම විදියේ එකම පිරිසක් රඟන ටෙලි නාට්‍ය බිහි වෙමින් තිබීම හොඳ දෙයක් නෙවෙයි. ප්‍රේක්ෂකයකු විදියට බැලුවත් මටත් ඒ ගැන සතුටු වෙන්න බැහැ. ඒ මගේ අදහස. සමහරු තවම තනිකඩ ඇයි කියලා අහනවා. මට පෙම්වතියක් හිටියා. ඇය විදෙස්ගත වුණා. ඉන් පස්සේ අම්මාව බලාගෙන, ඒ ගුරුහරුකම්, ආදරය මැද තවම සන්තෝෂෙන් ඉන්නවා. යසස් ශ්‍රී හර්ෂදේව මගේ කල්‍යාණ මිත්‍රයෙක්. ‘ විජය ශ්‍රී පවසයි.
‘මනල්’ එනවා
ආචාර්ය විසාකේස චන්ද්‍රසේකරම්ගේ අධ්‍යක්ෂණයක් මෙන්ම නිෂ්පාදනයක් ද වන, ‘මනල්’ සිනමා පටයේ සීමිත දර්ශන වාර ගණනක් තෝරා ගත් සිනමාහල් වලදී එළැඹෙන 3දා සිට තිරගත කෙරේ. ඉකුත්දා අමෙරිකානු තේරී තස්වීර් සිනමා උලෙළේදී Best narrative film සම්මානය දිනූ එය, Rotterdam සම්මාන උලෙළේදී ටයිගර් සම්මානය, බෙන්ගලුරු සිනමා උලෙළේ දෙවැනි හොඳම චිත්‍රපටය, ස්පාඤ්ඤයේ 22වැනි ඉමැජින් ඉන්ඩියා උළෙලේ හොඳම චිත්‍රපටය ආදී වශයෙන් සම්මානනීය වූවකි. ශිවකුමාර් ලිංගේෂ්වරන්, කමලා ශ්‍රී මෝහන් ආදිහු රඟති. සහාය අධ්‍යක්ෂණයෙන් ජෙනෝෂන් ජෙයරත්නම් ද කැමරාවෙන් රිෂී සෙල්වම් ද අංග රචනයෙන් ජුලියස් ඇන්ඩෘ ද කලා අධ්‍යක්ෂණයෙන් චන්න අසංක ද සංස්කරණයෙන් සිතුම් සමරජීව ආදිහු එක්වෙති.
ජයන්ත දේවි කුසුමාසනට පණ දෙයි!
ලාංකේය රාජ වංශයේ කඳුළු බින්දුව නම පටබැඳුණු කුසුමාසන දේවිය ඇසුරෙන් සම්මානනීය චිත්‍රපට අධ්‍යක්ෂ ජයන්ත 
චන්ද්‍රසිරි අධ්‍යක්ෂණය කරන ‘දේවි කුසුමාසන’ චිත්‍රපටයේ වැඩ ඇරඹී තිබේ. ඒ, Lyca Productions Lanka නිෂ්පාදනයක් වශයෙනි. උදාරි වර්ණකුලසූරිය, හේමාල් රණසිංහ ආදිහු එහි රඟති.
තිර රචකයන්ට කොළ එළියක්!
ශ්‍රී ලංකා තිර රචකයන්ගේ සංසදයට විධායක කමිටුවක් තෝරා පත්කර ගැනීම වෙනුවෙන් පැවැත්වෙන එහි මහා සභා රැස්වීමක් අද (27) සවස 4ට ජාතික චිත්‍රපට සංස්ථාවේ ජෝ අබේවික්‍රම ශාලාවේදී පැවැත්වේ. මේ සඳහා ඕනෑම මාධ්‍යයක් සඳහා තිර රචනා කළ ඕනෑම අයකුට සහභාගි විය හැකි බවත් එහෙත් මෙහි සාමාජිකත්වය ලැබීමට නම් එක් තිර රචනයක් හෝ විකාශය හෝ තිරගත වී තිබිය යුතු බවත් එම සංගමය දන්වා සිටියි.
