කොටුව මහේස්ත්‍රාත් උසාවියේ රෙජිස්ට්‍රාර් නෝනා වනාහි නඩුකාර උන්නාන්සේ දෙන තීන්දුව සම්බන්ධයෙන් තවත් ඇපිල් අධිකරණයක් ඒ තුළ පවත්වාගෙන යන අයෙකි. නඩුකාර උන්නාන්සේ, කාගේ හෝ පාස්පෝට් එකකට ගුවන් ගමන් තහනමක් දැමූ කල්හි, නෝනා ආගමන විගමන පාලක වෙත දන්වා යවන්නේ, එහෙම එකක් නැති බවය. තීන්දුවේ පිටපත ඇය වෙනස් කරන්නීය. මේ නිසා නඩුකාර උන්නාන්සේ දෙන තීන්දුව, ලිඛිතව එන විට, නෝනාගේ ඇපිල් උසාවියේ විස්තරය ද එයට ඇතුළු වන්නේය. මෙහෙම කතාවක් ආරංචි වූ සැණින් ඇය අත්අඩංගුවට ගනු ලැබීය.
තමන් රෙජිස්ට්‍රාර් ලෙස සේවය කළ අධිකරණයේම දැන් ඇයට විරුද්ධව නඩුවක් ඇසෙමින් තිබේ. නඩු කතා කියන්නේ වැඩිය ටච් කළ හැකි දෑ නොවේ. අසමින් පවතින නඩුවක තීන්දුව අපට දිය නොහැකිය. නඩුවක් අසන අතරේ අපේ කතා අධිකරණයට කිව හැකි මුත් ඒවා මාධ්‍යයේ පළ කිරීම ආචාරධර්ම අනුව හොඳ නැත. ඒ තරම් ගෞරවසම්පන්න අධිකරණයේ අංශ කිහිපයකට දැන් යක්ෂයා ආරූඪ වී ඇතැයි කිව හැක්කේය.
සමහර දෙවිවරු පුර පක්ෂයට දේව ස්වරූප උසුලන්නෝය. අව පක්ෂයේදී යක්ෂ මාදිලියට එන්නාහ. අධිකරණයේ ඉහළින් යුක්තිය පසිඳලන විට සියල්ලෝ ඊට සිය බුහුමන දක්වා හිස නමා තීන්දුව පිළිගන්නෝය. එසේ වෙද්දී සමහර එකාලා අධිකරණය නම් දෙවියාගේ පැත්ත මාරු කරන්නේය. සූනියම් දෙවියන් ලෙස වන්දනාව සඳහා පාත්‍ර වූ චරිතයම එක් තැනකදී ඔඩ්ඩි මස්සිනා වන්නේය.
සූනියම් දෙවි චරිතය වනාහි ගමේ පහළම උසාවිය ය. ගම් තුලානේ පොඩි පොඩි, කේස් ආ විට, මුලින්ම රණ්ඩුවකි. එතැනින් එහාට ඇත්තේ තෙවන පාර්ශ්වයක් දෙපැත්තේ කතාව අසා, තීන්දුවක් ලබා දීමය. මේ සඳහා සමථ මණ්ඩල ආදියේ රැස් වෙන ආකාරයක් ඒ කාලයේ තිබ්බේ නැත. ගමේ පහළම අධිකරණ ස්තරය වූයේ වැඩිහිටි සහ ගරු බුහුමන සහිත පිරිස් රැස්ව, ප්‍රශ්නය සමථකරණයක් සඳහා කැඳවාගෙන ඒමය. ඒවා ද කාලය ගතවෙන සහ සමහර විට පැත්තකට අදින බැවින් ක්ෂණික ආකාරයෙන් දඬුවම් දෙන ඔඩ්ඩි මස්සිනා වෙත අවනඩුව පත් වන්නේය.
සූනියම් දෙවියන්, ඔඩ්ඩි මස්සිනා බවට පත් වන්නේ ‘එක්ස්ප්‍රස් වේ’ නිසාය. ප්‍රමාද වන යුක්තිය කියන්නේ, ආසන්න වශයෙන් අයුක්තියට සමාන තත්ත්වයකි. තමනට වරද කළ එකාට ඉක්මනින් පලදීමක් අවශ්‍ය හෙයින් සූනියම් ලකුණ දරන ඔඩ්ඩි මස්සිනා වැඩේට ගෙන්වා ගැනීම ගැමියාගේ අරමුණය. ඔඩ්ඩි දේශයේ, ඔඩ්ඩි නම් රජුට දාව, යදම්බරී බිසවුන් වහන්සේගේ කුසයෙන් මෙලොවට පහළ වූ හෙයින් සූනියම් දේවත්වයේ, ඉක්මන් ප්‍රතිචාරය සඳහා ඔඩ්ඩි මස්සිනා නම ඉපදෙන්නට ඇති බව ජන විශ්වාසය වේ.
කොටුවේ උසාවියේදී සිදුව ඇත්තේ, ලබා දෙන නියෝග, ඇතුළෙන්ම අනෙක් අතට හරවා දැමීමය. සමහර පිරිස් තීන්දු දෙන්නේ එළියට ආ පසුය. තම නි‍ෙවසේ තිබූ රත්රන් බඩු වගයක් අතුරුදන්ව ඇති බවට සිදු කළ පැමිණිල්ලක් අනුව පොලිසිය විසින් පවරන ලද නඩුවක් සඳහා කතක් උසාවියට ආවාය. නඩුව ඉවර වී ගෙදරට යන්න ආ ඇයගේ බෙල්ල පසාරු කරගෙන යන පරිදි අධිකරණය අසලදීම එකෙක් පිහි පහරක් ඇනගෙන ගියේය. බෙල්ලට පිහි පහර එල්ල කරන ලද්දේ, කඳ සහ බෙල්ල දෙකක් වන පරිද්දෙන් වුවත්, තවම ඇය ජීවතුන් අතරය. මේ සිද්ධිය වන්නේ, පෙරේදා හෝමාගමදීය.
ගලගෙදර දිසා අධිකරණයේ නඩුවක් විභාග වෙමින් තිබිය දී අධිකරණ සිරමැදිරියෙන් පැනවිත් එක් අයෙක් නීතිඥවරියකගේ ගෙල සිර කළේය. හෙරොයින් මත නිසා තමන්ට ඇය බදා ගැනීමට ආශාවක් ඇති වූයේ යැයි සැකකරු අධිකරණය හමුවේ කියා සිටි හෙයින්, මුන්ට මතේ තද වුණ විට බදාගැනීම සඳහා කොට්ට මෙට්ට ආදිය ද දැන් උසාවියේ පැත්තක අතුරා තිබිය යුතුය.
මේ ප්‍රස්තුත තුනම නරක තත්ත්වයකි. අපරාධ පරීක්ෂණ මූලස්ථානයේ රඳවා සිටින කටා සහ සළිඳු තවත් ගේමක් ගසති. උන්ගෙන් යමක්කමක් සාක්කුවේ දාගත්, ඇතුළේ පිරිසටද දැන් තදියම්ව ඇත්තේය. එහෙම බලනකොට මුන් දෙන්නාව ආයුධ පෙන්වන්නට රැගෙන යෑමට ද බැරිය. රැගෙන ගොස් ඒකා, පොලිස් ආයුධ උදුරා ගන්නට හදන විට, වෙඩි කන්නේය. වෙඩි කෑ පසු, ඌගෙන් කෑ අය ගැන ආරංචියක් නැතිව යන්නේය. දෙපැත්තම බැලන්ස් කර ගත යුතුය.
මේ ජාතියේ ප්‍රශ්න ගණනාවක් යුක්තිය පසිඳලීමේ ක්‍රියාවලියේ ඇත්තේය. අධිකරණය ඇතුළේ ඇති නඩු බඩු ගබඩාව හොරු කඩාගෙන යන්නේ ළඟ ළඟය. නඩුවකට ආ අයෙක් එහි තිබූ වයර් රෝලක් අරගෙන යන අතරේ පොලිසියට හසු විය. මේවාට කියන්නේ පහන් කන්ද මුල අඳුරුයි කියාය.
වටේටම යුක්තිය පසිඳලන්නේ නමුදු, දේවාලය ඇතුළේ ද කිලුටු බහුලය. මේ හසුව ඇත්තේ එකක් දෙකක් වැනි සුළු ප්‍රමාණයකි.
සූනියම් දෙවියෝ ප්‍රශ්න විසඳීම සඳහා කාරුණිකය. කල් ගන්නේය. යාතිකා සඳහා දවස් ගණන් වෑයම් කළ යුත්තේය. අනුකම්පාව මත තීන්දු දෙන හෙයින් දඬුවම් සඳහා ලිහිලක් ද ඇත. මේ අනුව විසඳාගත හැකි නඩු ද ඇත. එහෙත් සමහර කේස් සඳහා ළඟ ළඟ, තදබල දඬුවම් සහ තීන්දු අවශ්‍යය. ඒ සඳහා සූනියම් දෙවියෝම පැකේජය මොඩර්න් කර තිබේ. ඔඩ්ඩි මස්සිනා කියන්නේ එහෙම වැඩ සඳහා ආකෘතියකි. අධිකරණය තුළ සහ ඒ ආසන්නයේ ඇති ගෞරවය කෙලෙසී යනවා කියන්නේ උඩ දක්වාම ඕවා ඔඩු දුවන බවය. ඔඩ්ඩි මස්සිනා කෙනෙක් අවශ්‍යව ඇත්තේ ඒ ගමන නතර කිරීමටය.
