චීනයේ හංජෝ නුවරදී පැවැත්වෙන සිවුවැනි ආසියානු පැරා ක්‍රීඩා උලෙළේදී මලල ක්‍රීඩා ඉසව්වන්ගෙන් රන් පදක්කම් දිනා ගැනීමට
නුවන් ඉන්දික සහ ප්‍රදීප් සෝමසිරි සමත් වූහ. මේ ක්‍රීඩකයන් දෙදෙනාම නව තරග වාර්තා බිහි කරමින් මේ ජයග්‍රහණ හිමි කර ගැනීම කැපී පෙනිණි.
මෙවර ක්‍රීඩා උලෙළේදී ශ්‍රී ලංකාවට පළමු රන් පදක්කම හිමි කර දීමට
පිරිමි මීටර් 100 T44 අවසන් තරගයට එක් වූ නුවන් සමත් වූයේ තත්පර 11.63කින් තරගය නිමා කරමිනි. එහිදී බිඳ වැටුණේ 2018 ක්‍රීඩා උලෙළේදී තායිලන්තයේ කොච්චරං ඩෙන්පූම් පිහිටුවා තිබූ තත්පර 11.87ක වාර්තාවයි. මේ ඉසව්වේ රිදී පදක්කම මැලේසියාවේ බර්නාඩ් එඩීට (11.86) සහ ලෝකඩ පදක්කම සවුදි අරාබියේ නූර් මොහොමඩ්ට (12.07) හිමි විය. එම ඉසව්වට එක් වූ ශ්‍රී ලංකාවේ අමිල ප්‍රසන්නට හිමි වූයේ 6 වැනි ස්ථානයයි.
පිරිමි මීටර් 1500 T46 අවසන් තරගයට එක් වූ ප්‍රදීප් සෝමසිරි වසර 9ක් පැරණි තරගාවලි වාර්තාව මකා දමමින් රන් පදක්කම දිනා ගත්තේය. ඔහු මිනිත්තු 4:05.14ක කාලයක් ගත කළ අතර, එහි පැරණි වාර්තාවට හිමිකම් කී උස්බෙකිස්තානයේ මුරුදුල්ලොව් මරුෆ්ජොන් 2014 ක්‍රීඩා උලෙළේදී මිනිත්තු 4:10.60කින් පැරණි වාර්තාව පිහිටුවා තිබිණි. මේ ඉසව්වේ රිදී සහ ලෝකඩ පදක්කම් ඉන්දීය ක්‍රීඩකයන් වූ ප්‍රමෝද් (මි. 4:09.25) සහ භයිරා රාකේෂ් (මි. 4:11.09) සතු වූහ.
මීටර් 100 ඉසව්වට එක් වූ අමිල ප්‍රසන්න ඊයේ මීටර් 400 T64 අවසන් තරගයට ද එක් වූ අතර, එහිදී තත්පර 57.88ක කාලයක් වාර්තා කළ ඔහුට හිමි වූයේ ක්‍රීඩකයන් 6 දෙනකු අතුරින් 5 වැනි ස්ථානයයි.
මේ අතර, කාන්තා යගුළිය විසි කිරීමේ බී කාණ්ඩයේ F57 අවසන් තරගයට එක් වූ තිසාරා ජයසිංහ මීටර් 6.45ක් සමඟින් සිය හොඳම දක්ෂතාව වාර්තා කිරීමට සමත් වුවද ඇයට හිමි වූයේ සිවුවැනි ස්ථානයයි.
පිරිමි යගුළිය විසි කිරීමේ F40 කාණ්ඩයේ අවසාන තරගයට එක් වූ දේශාන් සිල්වාට 6 වැනි ස්ථානයෙන් සෑහීමට සිදු විය. ඔහු සටහන් කළ දක්ෂතාව මීටර් 8.28කි.
