වයස අවුරුදු 60දී විශ්‍රාම ගැන්වූ රාජ්‍ය සේවයේ නියුතු හෙද නිලධාරීන් නැවත සේවයේ පිහිටුවන ලෙස රාජ්‍ය පරිපාලන ඇමැතිවරයා ඇතුළු බලධාරීන්ට නියෝග කරමින් අභියාචනාධිකරණය ඊයේ (24) රිට් ආඥාවක් නිකුත් කරන ලදි.
රාජ්‍ය සේවයේ නියුතු ශ්‍රේණි හතරක හෙද නිලධාරීන් වයස අවුරුදු හැටේදී (60) අනිවාර්ය විශ්‍රාම ගැන්වීමට රජය විසින් ගෙන තිබූ තීරණය බල රහිත කරන සර්ටියොරාරි රිට් ආඥාවක් ද අභියාචනාධිකරණය නිකුත් කළේය.
රාජ්‍ය සේවයේ නියුතු පළමුවන ශ්‍රේණිය, අධි ශ්‍රේණිය, විශේෂ ශ්‍රේණිය සහ විධායක ශ්‍රේණිය යන ශ්‍රේණිවල සේවයේ නියුතු හෙද නිලධාරීන් විශ්‍රාම ගැන්වීමේ වයස අවුරුදු 63 තෙක් දීර්ඝ කිරීමට ද විනිසුරු මඬුල්ල විසින් තීරණය කරන ලදි.
එසේම හෙද නිලධාරීන් වයස අවුරුදු 60දී විශ්‍රාම ගැන්වීමට අදාළව, අදාළ බලධාරීන් විසින් නිකුත් කර ඇති ලිපි ලේඛන බල රහිත කරමින් ආඥාවක් ද නිකුත් කෙරිණි.
වයස අවුරුදු 60දී රාජ්‍ය සේවකයන් අනිවාර්ය විශ්‍රාම ගැන්වීමට කැබිනට් මණ්ඩලය විසින් ගනු ලැබූ තීරණය එම හෙද නිලධාරීන් සම්බන්ධයෙන් ක්‍රියාත්මක කිරීම වළක්වමින් ප්‍රොහිබිෂන් රිට් ආඥාවක් නිකුත් කළේය.රාජ්‍ය සේවයේ නියුතු පළමුවන ශ්‍රේණිය, අධි ශ්‍රේණිය, විශේෂ ශ්‍රේණිය සහ විධායක ශ්‍රේණියට අයත් හෙද නිලධාරීන්ට බලපාන පරිදි මෙම නියෝගය නිකුත් කෙරිණ.
අවුරුදු 60දී අනිවාර්ය විශ්‍රාම ගැන්වීමට කැබිනට් මණ්ඩල තීරණය බල රහිත කරන ලෙස ඉල්ලා රාජ්‍ය සේවා එක්සත් හෙද සංගමය, මුරුත්තෙට්ටුවේ ආනන්ද හිමියන් ජාතික රෝහලේ හෙද නිලධාරිනී පුෂ්පා රම්‍යලතා ද සොයිසා ඇතුළු පිරිසක් විසින් ගොනු කර තිබූ පෙත්සම් දෙකක් විභාග කර අවසන් කර එහි තීන්දුව ප්‍රකාශ කරමින් අභියාචනාධිකරණය මෙම රිට් ආඥා නිකුත් කළේය. අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ලක් විසින් මෙම තීන්දුව ප්‍රකාශ කරන ලදි. රාජ්‍ය සේවකයන් වයස අවුරුදු 60දී විශ්‍රාම ගැන්වීමට රජය විසින් ගනු ලැබූ තීරණය අනුව හෙද නිලධාරීන් විශ්‍රාම ගැන්වීම නිසා සෞඛ්‍ය ක්‍ෂේත්‍රයේ ජ්‍යෙෂ්ඨ හෙද නිලධාරීන්ගේ විශාල හිඟයක් ඇති වූ බව පෙත්සම් විභාගයේදී ඉදිරිපත් වූ කරුණු අනුව අධිකරණයට පෙනී යන බව අදාළ තීන්දුවේ සඳහන් වේ.
ඒ අනුව 2023.03.31 දින සිට ගතවූ මාස හයක කාලය තුළ හෙද නිලධාරීන් දහසකගේ පමණ පුරප්පාඩු ඇති වී තිබෙන බව විනිසුරු මඬුල්ලේ අවධානයට යොමු වූ බව එහි සඳහන් වෙයි.
පුහුණු ජ්‍යෙෂ්ඨ හෙද නිලධාරීන් විශ්‍රාම ගැන්වීම සහ විදේශගත වීම නිසා මෙම පුරප්පාඩු ඇති වී තිබෙන අතර පුහුණු සහ ජ්‍යෙෂ්ඨ හෙද නිලධාරීන්ගේ හිඟය නිසා රජයේ රෝහල්වල අසීරු තත්ත්වයක් උද්ගත වී ඇති බව අධිකරණයේ අවධානයට යොමු වූ බව නඩු තීන්දුවෙහි සඳහන් වේ. එය සෞඛ්‍ය ක්‍ෂේත්‍රයේ බරපතළ අර්බුදයක් ඇතිවීමට හේතු විය හැකි බව විනිසුරු මඬුල්ල විසින් පෙන්වා දෙන ලදි. අතිරේක සොලිසිටර් ජෙනරාල් විකුම් ද ආබෲ මහතා ඇතුළු පිරිසක් නීතිපතිවරයා ඇතුළු වගඋත්තරකරුවන් වෙනුවෙන් පෙනී සිටියහ.
