මහනුවර ශ්‍රී දළදා මාළිගාවට වම් පසින් පිහිටි පැරණි රජ මාළිගාව ඉදිරිපිට දිය අගල ආසන්නයේ ඉදි කෙරෙමින් පවතින පැති බැම්මට ඉහළින් වූ පස්වලින් පිරුණු කොටසක් අධික වර්ෂාවත් සමඟ පෙරේදා (11) රාත්‍රියේ කඩා වැටීමෙන් රජ මාළිගාවට යම් අවදානමක් මතුව තිබේ.
මහනුවර විෂ්ණු දේවාලය ඉදිරිපිට දේව සංහිඳ ආසන්නයෙන් දිය අගලේ පැති බැම්මේ කොටසක් මෙයට වසරකට පමණ ඉහතදී කඩා වැටිණි. එහි ඉදි කිරීම් පුරාවිද්‍යා දෙපාර්තමේන්තුවේ අධීක්ෂණය යටතේ වාරිමාර්ග දෙපාර්තමේන්තුව මඟින් සිදු කරනු ලබයි. එම ඉදි කිරීම් සිදු කරන අතරතුරද පැති බැම්මේ මීටර් පහක පමණ කොටසක් මෙයට මාස හයකට පමණ ඉහතදී ද කඩා වැටිණි. මෙවර කඩා වැටී ඇත්තේ ඓතිහාසික රජ මාළිගාව ඉදිරිපස කොටසකි. මේ හේතුවෙන් රජ මාළිගාව යම් අවදානම් තත්ත්වයකට පත්ව තිබෙන බැවින් අදාළ ස්ථානය යථා තත්ත්වයට පත් කිරීම සඳහා කඩිනමින් කටයුතු කිරීමේ අවශ්‍යතාව පුරාවිද්‍යා දෙපාර්තමේන්තුව මඟින් වාරිමාර්ග දෙපාර්තමේන්තුවට දන්වා ඇත.
