හෙරොයින් කිලෝ 80කට වැඩි ප්‍රමාණයක් ළඟ තබා ගැනීම සහ ජාවාරම් කිරීම සම්බන්ධයෙන් වරද පිළිගත් ඉරාන ජාතික විත්තිකරුවන් 9 දෙනෙකුට කොළඹ මහාධිකරණය ඊයේ (12) ජීවිතාන්තය දක්වා සිර දඬුවම් නියම කළේය. කොළඹ මහාධිකරණ විනිසුරු අමල් රණරාජා මහතා විසින් මේ තීන්දුව ප්‍රකාශයට පත් කරන ලදී.
විත්තිකරුවන් විසින් චෝදනාවලට වරද පිළිගැනීම සලකා බැලූ කොළඹ මහාධිකරණ විනිසුරුවරයා ඔවුන්ට ජීවිතාන්තය දක්වා සිර දඬුවම් නියම කළේය. මේ තීන්දුව අධිකරණ භාෂා පරිවර්තක මොහොමඩ් යාසිර් මහතා විසින් විවෘත අධිකරණයේදී සිංහල භාෂාවෙන් කියවන ලද අතර එහි ඉරාන පරිවර්තනය ඉරාන තානාපති කාර්යාලය විසින් පත් කරන ලද ඉරාන පරිවර්තක විසින් විත්තිකරුට කියවන ලදී.
ශ්‍රී ලංකා ඉරාන ගිවිසුමට අනුව තම සේවාදායකයන් තම රටට මාරුකර සිරදඬුවම් නියම කරන ලෙස විත්තිකරු අධිකරණයෙන් ඉල්ලා සිටියේය. විත්තිකාර පාර්ශ්වය විසින් කරන ලද ඉල්ලීමක් සලකා බැලූ කොළඹ මහාධිකරණය ඔවුන්ට තම රටට මාරුකර සිරදඬුවමක් ගෙවන ලෙස නියෝග කළේය.
තවද, ඔවුන් හෙරොයින් ප්‍රවාහනයට යොදාගත් බෝට්ටුව ශ්‍රී ලංකා නාවික හමුදාව වෙත භාරදෙන ලෙස කොළඹ මහාධිකරණය නියෝග කළේය. හෙරොයින් කිලෝ 83.654ක් සන්තකයේ තබා ගැනීම සහ ජාවාරම් කිරීම සම්බන්ධයෙන් විත්තිකරුට එරෙහිව අධිචෝදනා 2ක් යටතේ නීතිපතිවරයා විසින් අධි චෝදනා ගොනු කර තිබුණි. 2019 මාර්තු 24 වැනි දින අකුරල ප්‍රදේශයේ මහ මුහුදේදී හෙරොයින් තොගය සමඟ සැකකරුවන් අත්අඩංගුවට ගෙන ඇත.
