‘කතුරු මිතුරු’ සිනමා ශාලා අතුරු සිදුරු නැතිව ප්‍රේක්ෂකයන්ගෙන් පුරවා ඇති සැටියකි. මේ මෑතකාලීනව සිංහල චිත්‍රපට ලද දිනුමකි. ‘සිකුරු හතේ’, ‘සුහද කොකා’ ආදායම් වාර්තා පිහිටවූ චිත්‍රපටවලින් පසුව ගිරිරාජ් කෞශල්‍ය මෙවර කතුරු මිතුරු අධ්‍යක්ෂණයෙන් කළ හපන්කම ගැන කතා කරන්නට අපි දැන් ඔහු මුණගැසෙමු.
ආයුබෝවන්ඩ, කොහොමද වාස දේස?
මං තවම බේත් හේත් ගන්නවානේ. හොඳටෝම සනීප වුණාම ඉදිරියටත් තවත් හොඳ වැඩ කරන්නයි කල්පනාව. ඒ වගේමයි, ලොකු සතුටක් හිතේ තියෙනවා. කතුරු මිතුරු පෙන්වන හුඟක් ෆිල්ම් හෝල්වල ‘හවුස් ෆුල්’ බෝඩ් දකින්න ලැබෙනවා. ඒක නිතර දකින්න නොලැබෙන දෙයක්. නිර්මාණකරුවකුට ලැබෙන අස්වැසිල්ලක්.
ආර්ථික අපහසුතා බහුල කාලයකයි ඒ දිනුම ලබා තියෙන්නේ?
ඔව්වා ඉතින් අද, ඊයේ තිබුණු දේවලුත් නෙවෙයිනේ. පාස්කු දා ප්‍රහාරය, කොරෝනා, තෙල්, ගෑස් පෝලිම් ඒ ආදී වශයෙන් හුඟක් කටුක අත්දැකීම්නේ, අපට තියෙන්නේ. ඒ අතින් මේ ගෙවෙන්නේ සුන්දර කාලයක්. විනෝදාස්වාදවලට යොමු වෙන්න පුළුවන් කමක් තියෙන, මනස සුවපත් කරගන්න පුළුවන් වකවානුවක්.
ආපිට කතුරු මිතුරු දිහාට හැරෙමු?
ඒක ප්‍රේක්ෂකයාට භාර දීලා තියෙන්නේ. ඒ අය තමයි මගේ මේ නිර්මාණයත් නරඹා, ගුණ දොස් කියන්න ඕනෑ.
සින්දු තුනකුත් එක්කයි කතුරු මිතුරු ඇවිත් තියෙන්නේ?
ඔව්. ප්‍රවීණ ගීත රචකයන්, ගායකයන් සමඟ මගේ දූ, අමන්ද්‍යා උත්පලී ගී ගැයුමත් මට තවත් අතකින් විශේෂත්වයක්. එයින් තුන් වැන්නේ පෙනී ඉන්නේ ආචාර්ය ජයලත් මනෝරත්න, මහේන්ද්‍ර පෙරේරා, රොඩ්නි විදානපතිරණ, ප්‍රියන්ත සෙනෙවිරත්න පමණයි.
දෙමළ බසින් හඬකැවීමක් කළොත්?
හොඳයි. හැබැයි, මං කියන තේරුම් ඒ විදියටම නොගියොත් ඒක ප්‍රේක්ෂකයාට නීරස වෙන්න පුළුවන්. හිනා යන එකකුත් නැහැ. එහෙම වුණොත් වැඩක් නැති වෙයි. ඒ හින්දා, ඉංග්‍රීසි, දෙමළ භාෂාවලින් උපසිරැසි යෙදීම වඩාත් ඵලදායී වෙයි.
තරගකාරී අනෙක් චිත්‍රපට අභියෝගයක්ද?
කොහොමටවත් නැහැ. මං එහෙම හිතන්නේවත් නෑ. අනෙක් චිත්‍රපටත් අපේ එක වගේ දුවන්න ඕනි. එහෙම නැතිව මේ කර්මාන්තය දියුණු වෙන්නේ කොහොමද? මං කවදාවත් අනෙක් චිත්‍රපට අභියෝගයක් විදියට දැක්කේ නැහැ. මට අනෙක් චිත්‍රපට ගැනත් සතුටක් තියෙන්නේ.
ඒත් හැමෝටම සාධාරණයක් වෙන්නේ නැහැ කියනවානේ, සිනමාවට ජාතික ප්‍රතිපත්තියක් නැතිකමින්?
මගේ කාර්යය නිර්මාණ කිරීම. රඟපෑම. මං මගේ කටයුත්ත උපරිමයෙන් කරනවා. ඒවා අලෙවි කිරීම වෙනම කාර්යයක්. නිෂ්පාදකයන්, ප්‍රදර්ශකයන්ට තදින් බලපාන කාරණයක්. ඊට වඩා ඒ ගැන මට වැඩි දෙයක් කියන්න අමාරුයි.
ආචාර්ය මනෝරත්න ගැන මතක් කළොත්?
මනෝ අයියා මේ වෙනුවෙනුත් දුන් දායකත්වය කියන්න වචන නැති තරම්. අනෙක් රංගන ශිල්පීන්ටත් ස්තුති කරන්න ඕනි. අවුරුදු 8කට විතර කලින්නේ මේ රූගත කිරීම් කළේ. ඒ කාලෙදි විජය නන්දසිරිත් අපෙන් වෙන් වුණා. ඔහු මේ චිත්‍රපටයේ කළ චරිතයට අපට සිටින තවත් අති දක්ෂයෙක් වෙන මහේන්ද්‍ර පෙරේරාව ගත්තා.
ප්‍රේක්ෂකයා ඇමතුවොත්?
පවුල් පිටින් ඇවිත් ෆිල්ම් එක බලන්න කියලානේ විනෝදාස්වාද චිත්‍රපටයක් නිර්මාණය කළ අධ්‍යක්ෂවරයකුට කියන්න තියෙන්නේ. ඒත් අමුතුවෙන් මට ඒ දේ කියන්න ප්‍රේක්ෂකයා ඉඩ තියලා නැහැ. පවුල් පිටින් ගිහින් චිත්‍රපටිය බලනවා. හවුස් ෆුල් වෙන තැනට චිත්‍රපටය ඔසවා තියලා තියෙන්නේ ඒ අයයි. මං ඒ රසිකත්වයට අප්‍රමාණ ගෞරව කරනවා.
