– අපේ පවුලේ අය එකතු වෙලා ජාතික රෝහලට පරිත්‍යාග කළ වෙන්ටිලේටරයක හුස්ම ගනිමින් හිටියේ
– දැන් ඒ යන්ත්‍රයෙන් තව අවුරුදු 10-15ක් යන කල් හුස්ම හොයන මිනිස්සු ජීවත් වේවි
– මේ දක්වා ඒ ගැන නොකියා හිටියේ පින් කරලා අඬබෙර ගහන්න අවශ්‍ය නැති නිසා සහ අප්පච්චි එහෙම වැඩවලට අකැමැති නිසා
ජැක්සන්ගේ අසමසම කලා කුසලතාව දරාගත නොහී අසත්පුරුෂයන් පට්ටපල් බොරු හතක් ඔහුට එරෙහිව ජනගත කළා
– සම්මානිත මහාචාර්ය සුනිල් ආරියරත්න
දින 458ක කාලයක් තම පියා හුස්ම ගත්තේ පවුලේ ඥාතීන් විසින් කොළඹ ජාතික රෝහලට පරිත්‍යාග කළ වෙන්ටිලේටර් යන්ත්‍රයකින් බව අභාවප්‍රාප්ත ප්‍රවීණ රංගධර ජැක්සන් ඇන්තනී මහතාගේ කනිටු පුත් සජිත අනුත්තර ඇන්තනී මහතා ප්‍රකාශ කළේය. ඒ යන්ත්‍රය කොළඹ ජාතික රෝහලට පරිත්‍යාග කිරීමටද පියවර ගෙන තිබෙන බවද හෙතෙම සදහන් පැවසීය. ඔහු මේ බව සඳහන් කළේ ජැක්සන් ඇන්තනී මහතාගේ අවමඟුල් සභාව අමතමිනි.
අභාවප්‍රාප්ත මහාරංගධර ජැක්සන් ඇන්තනී කලාකරුවාගේ අවසන් කටයුතු රාගම ශුද්ධ වූ පේදුරුපාවුලු දේවස්ථානයේදී ඊයේ (12) පස්වරුවේ සිදු කෙරුණු අතර, දහස් සංඛ්‍යාත පිරිසකගේ සෝ සුසුම් මැද ජැක්සන් ඇන්තනී මහතා අවසන් ගමන් ගියේය.
එහිදී වැඩිදුරටත් අදහස් පළ කළ සජිත ඇන්තනී මහතා:
“මගේ අප්පච්චි කිවුවේ වීරයෙක්ට කොහෙන්ද සාක්ෂිකාරයෙක් කියලා. වීරයෙක් කොයිතරම් වික්‍රම කළත් කොයිතරම් වීරකම් කළත් සාක්ෂිකාරයෙක් නැතුව වීරයෙක් බිහි වෙන්නේ නැහැ. සුනිල් සර්, රන්ජන් අයියා කථා කරන කොට, මෙච්චර මහ සෙනඟ ගඟක් අප්පච්චිට ගරු බුහුමන් කරද්දීම මොනතරම් අප්පච්චි වෙනුවෙන් සාක්ෂි දෙන්න ඉන්නවාද කියලා. ඒ තමයි සුදුසුම කාලය මෙයයි කියලා. මොකද අප්පච්චි තමා වෙනුවෙන් සාක්ෂි දෙන්න ගියේ නැහැ. සමාජ මාධ්‍යවල බොරු මවාපෑම්වලින් අප්පච්චිට සෑහෙන්න දේවල් කිව්වා. ඒ ගොඩක් වෙලාවට මම අප්පච්චි එක්ක රණ්ඩු කළා. ඇයි අප්පච්චි මේ දේවල්වලට මුකුත් කියන් නැත්තේ කියලා. එතකොට අප්පච්චි කිවුවේ වීරයෙක්ට සාක්කිකාරයෙක් ඕනෙ. හැබැයි වීරයා තමා වෙනුවෙන් සාක්ෂි දෙන්න යන්නේ නැහැ කියලා.
“ඉතිං බොහොමත්ම ස්තූතියි සුනිල් සර්, රන්ජන් අයියා. දෙන්නාම අද දවසේ කරපු කතා දෙකට. ඒ වගේම මම ස්තූතිවන්ත වෙනවා ශ්‍රී ලංකා ප්‍රජාතන්ත්‍රවාදි සමාජවාදි ජනරජයේ අතිගරු ජනාධිපති රනිල් වික්‍රමසිංහ මහතාටත්, හිටපු ජනාධිපති මහින්ද රාජපක්ෂ මහතාටත්, අනුරාධපුර තලාව පොලීසිය, අනුරාධපුර මහ රෝහලේ වෛද්‍යවරු සහ කාර්ය මණ්ඩලයටත්, කොළඹ මහ රෝහලේ වෛද්‍යවරු සහ කාර්ය මණ්ඩලයටත්, අප්පච්චිගේ භාරකරු විදිහට අත්සන් කරපු කෙනෙක් ඉන්නවා ඒ ප්‍රියන්ත කියලා පුද්ගලයෙක් ඔහුටත් මේ වෙලාවේ ස්තූතිවන්ත වෙනවා. ඒ වගේම අප්පච්චි රෝහලේ දින 458 නේවාසිකව බෙහෙත් ලබාගත්තා. ඒ වගේම මම බෙහෙවින්ම ස්තූතිවන්ත වෙන්න ඕනේ මගේ අප්පච්චිට හුස්ම ගන්න වෙන්ටිලේටර් මැෂින් එකක් මිලදී ගන්න උදවු කරපු මගේ අප්පච්චිගේම ඥාති පිරිසට.
“මට ඒ වෙලාවෙම කල්පනා වුණේ මගේ අප්පච්චි හුස්ම ගන්න දෙන මැෂින් එක දිහා බලන් ඉද්දි මට හිතුණෙ ඒ මැෂින් එකක් මිල දී ගෙන රෝහලට පරිත්‍යාග කරන්න ඕනේ කියලා. ඒ මැෂින් එක වටිනාකමින් වැඩි මුදලක් වෙන නිසා කොළඹ රෝහලේම තියෙන්නේ මැෂින් දෙකක්. මේ දේවල්වලින් අපි අසරණවෙලා ඉන්න වෙලාවේ අපිම කොහොම හරි මේ මැෂින් එකක් මිල දී ගන්න ඕනෙ කියලා. අපි කොහොමහරි මැෂින් එකක් මිල දී ගත්තා. මේ අවස්ථාවේ විශේෂයෙන්ම කියන්න ඕනෙ අපේ අප්පච්චි හුස්ම ගත්තේ අපි විසින්ම රෝහලට පරිත්‍යාග කළ මැෂින් එකකින්. මේ වෙනකොට ඒ මැෂින් එකෙන් තව රෝගීයෙකුට සම්බන්ධ කරලා හුස්ම දෙනවා ඇති. තව අවුරුදු 15 කට ආසන්න කාලයක් මේ මැෂින් එකෙන් රෝගීන් දහස් ගණනකට හුස්ම දෙන්න පුළුවන්. ඉතිං මේ සඳහා උදවු කරපු සියලු දෙනාට නැවතත් බෙහෙවින්ම ස්තූතිවන්ත වෙනවා.”
ශ්‍රී ජයවර්ධනපුර විශ්වවිද්‍යාලයේ සම්මානිත මහාචාර්ය සුනිල් ආරියරත්න මහතා:
“ජැක්සන් ඇන්තනි මරාගැනීමේ නොතිත් ආශාවෙන් පෙළුණු සමාජ මාධ්‍යවල ටික දෙනකුට අද ඉඳන් ප්‍රීතිමත් දවසක්. මීට කලින් හත් අට වතාවක් අමු අමුවේ මරාදමන්න තැත් කළ ජැක්සන් ඇන්තනි අද ඇත්තටම මැරිලා. ජැක්සන් ලෙඩ ඇඳට වැටුණු අවුරුද්දකුත් මාස දෙක තුන තුළ ඔහු මොන තරම් බිහුසුණු විදියට ජැක්සන්ගේ ප්‍රතිරූපය කුඩු පට්ටම් කළාද? ගලවපන් මැෂින් එක, දීපන් ඇඳ, නැත්නම් නුඹගේ චරිතය විනාශ කරනවා යැයි තර්ජනය කරන්න තරම් ඔවුන් සාහසික වුණා. ජැක්සන්ගේ දේහය කරවල කඩයක විකුණා දමන්නැයි ඔවුන් ම්ලේච්ඡ විදියට ප්‍රකාශ නිකුත් කළා. කුමාරි ඇතුළු පවුලේ සාමාජික සාමාජිකාවන් මේ කුරිරු ප්‍රහාරවලට මුහුණ දුන්නේ කොහොමද කියා මට නම් හිතා ගන්නවත් බැහැ.
“පොට්ට කාසියක වටිනාකමක් නැති ඇමතියෙක් ලෙඩ ඇඳට වැටුණහම ගෙනියන්නේ සිංගප්පූවේ මවුන්ට් එලිසබත් රෝහලට, ගෙවන්නේ අපේ සල්ලි, අපේ බදු මුදල්. අර ජැක්සන්ගේ ඇඳ ඉල්ලපු එවුන් එතනදී අන්ධයි, නිහඬයි ගොළුයි. ඔවුන්ට තිබුණු එකම ප්‍රශ්නය ආණ්ඩුවේ ඉස්පිරිතාලයේ දැඩි සත්කාර ඒකකයේ ඇඳ සහ වෙන්ටිලේටරය. අනතුරෙන් පසුව යාන්තම් සිහි කල්පනාව ලැබුණු අවස්ථාවේ සිය ප්‍රතිකාර සඳහා ආණ්ඩුවේ ඉස්පිරිතාලය තෝරාගත්තේ ජැක්සන්මයි. ඒ තමන්ගේත් තම දූදරුවන්ගේත් වත්කම ඔහු හොඳින්ම දන්නා නිසයි.
ජැක්සන් අනතුරට ලක් අවස්ථාවේ සමාජ මාධ්‍යය කතා කළේ අනතුරට ලක් වූ අලියාට ප්‍රතිකාර නොකර ජැක්සන්ට පමණක් ප්‍රතිකාර කරන්නේ මන්ද කියලයි. ඔවුන්ට අපට කියන්න තියන්නේ 2011 සංගණනයකට අනුව ලංකාවේ වන අලි ගහනය 5,000කට අධිකයි. ඒත් ජැක්සන්ලගේ ගහනය එකයි. මම මේ ආමන්ත්‍රණ කරන්නේ අවමංල්‍යය සභාවක් බව මට අමතක වෙලා නැහැ. ඒත් මගෙ කතාව අවමංගල්‍යය සභාවකට උචිත නැහැ. මම පාවිච්චි කරන වචන අවමංගල්‍ය සභාවකට ගැළපෙන්නෙ නැහැ. ඒත් මගේ කතාව කළ යුතුම තැන මෙතන. ජැක්සන්ගේ දේහය මේ පේදුරු පාවුලු දේවස්ථානයේ වළදමන්න කලින් ඔහුගේ දේහයේ දැවෙන අසත්‍යයේ අපවිත්‍ර ආලේපය සෝදා පවිත්‍ර කරන්න මේ කතාව කළ යුතුමයි. ඒකට සමා වෙන්න.
“ජැක්සන්ගේ ජනප්‍රියත්වය, අසමසම කලා කුසලතාව ඉවසා දරාගත නොහී අසත්පුරුෂයන් පට්ට බොරු හතක් ඔහුට එරෙහිව ජනගත කළා. පළමු බොරුව. මහින්ද රාජපක්ෂ බුදුන්ගේ නෑයෙකැයි ජැක්සන් කීවේය. අවුරුදු 65ක් වූ සිය ජීවිත කාලය තුළ කවමදාකවත් ජැක්සන් එබදු ප්‍රකාශයක් කර නැහැ. මේ බොරුව ගෙතූ අසත්පුරුෂයන් සමහර විට වලිගය පාගා ගෙන තිබෙන්නේ 2011 මැයි 29 වැනිදා ගෝඨාභය, මහින්ද දෙදෙනාගේ ප්‍රධානත්වයෙන් ජාතික රූපවාහිනියේ පැවැත්වූ රණවිරු රියල් ස්ටාර්හිදී ජැක්සන් කළ ප්‍රකාශයක් නිසයි. එදා ඔහු දීර්ඝ ඉතිහාසයක් විනාඩි කිහිපයකට සම්පිණ්ඩනය කරමින් කීවේ මහින්ද ගැමුණු රජතුමාගේ ඥාතියකු බවයි. මා දන්නා තරමින් ඒ ප්‍රකාශය සාවද්‍ය යැයි අදටත් කිසිදු ඉතිහාසඥයෙක් ප්‍රකාශ කර නැහැ. දෙවැනි බොරුව. ජැක්සන්ගේ ප්‍රකාශය නිසා රාජපක්ෂලා ඡන්දය දිනාගත්තා, රට බංකොලොත් කළා. ජැක්සන්ට අලි අනතුර සිදු වූයේද ඒ පාපී ප්‍රකාශය නිසාය කියාය. මහින්ද විජයග්‍රහණය කළේ 2010දී. ජැක්සන් ගැමුණුගේ ඥාතිත්වය ගැන ප්‍රකාශ කළේ 2011දී. 2015 මහින්දගේ ඡන්ද සටනේදී ආධාරකරුවන් ගැමුණු කුමරුගේ ඥාතියාට ඡන්දය දෙන්න යැයි පෝස්ටර් ගැහුවේ නැහැ. ඔහුගේ සටනේ ප්‍රධාන කතිකයකු වූ ජැක්සන් ඒ ගැන මතක් කළේ නැහැ. ජැක්සන් මහින්දව හැඳින්වූයේ ජනමූල නායකයා කියලයි. 2015 ඡන්ද සටනින් ජනමූල නායකයා පැරදුණා. මහත් සේ කලකිරීමට පත් ජැක්සන් දේශපාලන වේදිකාවෙන් ඉවත් වුණා. 2015න් පසු ඔහු කිසිදු දේශපාලන වේදිකාවක කථා කර නැහැ. ඒ නිහඬතාවට දැන් අවුරුදු අටක්.
“ජැක්සන් ප්‍රඥාවත් රුවත් එක සේ දායාද කර ගත් නිර්මාණකරුවකු ලෙසයි මම දකින්නෙ. සකල කලාවන් තුළ සිය ප්‍රතිභාප්‍රභා පළ කළ ජැක්සන් ඇන්තනි වගේ කලා කලාකරුවකු කල්ප කාලයකට බිහි වන්නේ නැහැ. මේ රටට ජැක්සන් බර වැඩී.”
හිටපු රාජ්‍ය ඇමැති රන්ජන් රාමනායක මහතා:
“ඉපදීම දුකක් කියා කියනවා. ජැක්සන් ඉපදීම නම් මට දුකක් නැහැ.මම කියන්නේ අනේ ජැක්සන් ආයෙත් ඉපදෙන්න කියලයි. ඔබ හරි වටිනවා. ජැක්සන්ට හැමෝම ඊෂ්‍යයා කළා. ඒ දක්ෂතාවට හැමෝම ඊෂ්‍යයා කළා. ඒත් අපි ඔබට ආදරෙයි. ඔබ මැරුණේ නැහැ. ඔබව මරන්න මේ ලංකාවේ මිනිසුන් ශක්තිමත් මදි. ඔබ පුරාවෘත්තයක්. ඒත් ජැක්සන් කියන කෙනා නැතිව ඔහුගේ චරිතය කරන්න කිසිවකුට බැහැ. අපි නැවත හමුවෙමු.”
ජැක්සන් ඇන්තනී මහතාගේ අභාවය නිමිත්තෙන් ජනාධිපති රනිල් වික්‍රමසිංහ මහතා නිකුත් කළ ශෝක පණිවිඩය ජනමාධ්‍ය රාජ්‍ය ඇමැති ශාන්ත බණ්ඩාර මහතා විසින් මෙහිදී අවමංගල සභාව වෙත ඉදිරිපත් කෙරුණු අතර, අගමැති දිනේෂ් ගුණවර්ධන, හිටපු ජනාධිපතිවරුන් වන මහින්ද රාජපක්ෂ, මෛත්‍රීපාල සිරිසේන, ගෝඨාභය රාජපක්ෂ, විපක්ෂ නායක සජිත් ප්‍රේමදාස, ජනතා විමුක්ති පෙරමුණේ නායක අනුර කුමාර දිසානායක මහත්වරුන්ද ශෝක පණිවිඩ නිකුත් කර තිබිණි.
අවමංගල උලෙළට පාර්ලිමේන්තු මන්ත්‍රී සංජීව එදිරිමාන්න, හිටපු පාර්ලිමේන්තු මන්ත්‍රී තිලංග සුමතිපාල මහත්වරුන්, කලාකරුවන්, දේශපාලඥයන්, ඥාතීන්, හිතවතුන් ඇතුළු විශාල පිරිසක් එක්ව සිටියහ.
