බිත්තියේ හිලක් හදා කොස්ගම නිමි ඇඳුම් සාප්පුවකට සුද්දෙ දීලා

කොස්ගම පිහිටි නිමි ඇඳුම් ප්‍රදර්ශනාගාරයක බිත්තිය සිදුරු කර ඊට ඇතුළු වූ සොරකු එහි තිබූ නිමි ඇඳුම් රැසක් සොරා ගැනීමක් සම්බන්ධයෙන් කොස්ගම පොලිසිය විමර්ශනයක් ආරම්භ කර තිබේ. මෙම සොරකම සිදු කර ඇත්තේ පසුගිය 08 වැනිදා රාත්‍රී 7.45ට නිමි ඇඳුම් ප්‍රදර්ශනාගාරය වසා දැමීමෙන් පසු නැවත 09 වැනිදා උදෑසන 8.30ට විවෘත කරන අතරතුර කාලය තුළදී බව කොස්ගම පොලිසිය කියයි.

නිමි ඇඳුම් ප්‍රදර්ශනාගාරයේ බිත්තියක බ්ලොක් ගල් කිහිපයක් ගලවා ඒ තුළින් ඇතුළු වී දිග ඩෙනිම් කලිසම් 36ක්, කොට කලිසම් 25ක්, ටී-ෂර්ට් 26ක්, යට කලිසම් 24ක්, යට බැනියම් 05ක් ඔරලෝසු 03ක් තුවා 12ක් මෙසේ සොරාගෙන ගොස් ඇති බව නිමි ඇඳුම් සාප්පුවේ හිමිකරු පොලිසියට පැමිණිලි කරමින් පවසා තිබේ.