යුද හමුදා කපිතාන්වරයකු ලෙස නිල ඇඳුමෙන් සැරැසී මහරගම රන් ආභරණ අලෙවිසලකින් රුපියල් ලක්ෂ 12කට අධික වටිනාකමක් සහිත අත් පළඳනාවක් වංචනික ලෙස ලබාගත් යුද හමුදාවේ සේවය හැර ගිය බව කියන සැරයන්වරයකු යැයි කියා ගන්නා පුද්ගලයකු පිටකෝට්ටේදී අත්අඩංගුවට ගත් බව මහරගම පොලිසිය සඳහන් කරයි.
සැකකරු එම අත්පලඳනාව නුගේගොඩ ප්‍රදේශයේ වෙළඳසලකට රුපියල් ලක්ෂ නවයකට විකුණූ බව ප්‍රශ්න කිරිමේ දී අනාවරණය වී යැයි පොලිසිය කියයි.
කුලී පදනම මත ලබාගත් මෝටර් රථයකින් මහරගම රන් අභරණ වෙළෙඳසල වෙත පැමිණ තිබූ සැකකාර පුද්ගලයා එහි මද වේලාවක් රැඳී සිටිමින් පවුම් හයක පමණ බරින් යුත් අත් පළඳනාවක් මිලදී ගෙන තිබූ අතර ඒ සඳහා මුදල් ඔන්ලයින් හරහා ගෙවන බවට දැනුම්දී සැකකරු සිය අත රැඳි ජංගම දුරකථනය හරහා රන් අභරණ වෙළෙඳසල වෙත මුදල් බැර කරන අයුරු හඟවා තිබූ බව පොලිසිය කියයි.
ඔහු ඒ බව සනාථ කිරීම සඳහා සිය ජංගම දුරකථනයෙන් සටහන් කෙටි පණිවිඩයද වෙළඳසලේ කළමනාකරුට පෙන්වා එයින් පිටවී ඇතැයිද පොලිසිය කියයි. සවස් භාගය වන තුරු තුරුත් එකී මුදල් බැංකුව වෙත බැරවී නොතිබූ බැවින් අදාල ස්වර්ණාභරණ වෙළඳසලේ කළමනාකරු මහරගම පොලිසිය වෙත ඊයේ (10) කරන ලද පැමිණිල්ලක් අනුව වහා ක්‍රියාත්මක වූ මහරගම පොලිසියේ අපරාධ අංශයේ ස්ථානාධිපති උප පොලිස් පරීක්ෂක අසංක පතිරණ මහතා ඇතුළු නිලධාරීන් විමර්ශන ආරම්භ කර ඇත. පැමිණිල්ල ලැබී පැය විසි හතරක් ගත වීමට මත්තෙන් සැකකරු අත්අඩංගුවට ගැනීමට සමත් විය.
සැකකරු පිටකෝට්ටෙ ප්‍රදේශයේදී ඔහුගේ තාවකාලික ලැගුම්හලේදී අත්අඩංගුවට ගෙන සිදුකරන ලද ප්‍රශ්න කිරීමේදී එම අත් පළඳනාව රුපියල් ලක්ෂ 9 විකුණා ඔහුගේ බිරියට ලක්ෂ 4 ක පමණ රන් ආභරණ මිලදී ගෙන තිබු අතර ඉතිරි මුදල්වලින් කොටසක් පුද්ගලයකුට ගෙවීමට තිබූ ණය මුදලක් ගෙවා දැමූ බවත් එම මුදල් වලින් සුඛෝපභෝගී මෝටර් රථයක් කුලී පදනම මත ලබාගත් බවත් සැකකරුගේ ප්‍රකාශයකින් අනාවරණ වූ බවත් පොලිසිය කියයි.
ඒ අනුව සැකකරු එලෙස මිලදී ගත් රන් ආභරණ සහ කුලී පදනම මත ලබාගත් සුඛෝපභෝගී මෝටර් රථය සහ එකී මුදල්වලින් ඉතිරිව තිබූ රුපියල් 60,000 ක මුදලක් පොලිස් භාරයට ගත් බවත් උසස් පොලිස් නිලධාරියෙක් පැවසීය. සැකකරු නුගේගොඩ මහේස්ත්‍රාත් අධිකරණය වෙත ඉදිරිපත් කිරීමට නියමිතය.
මහරගම පොලිසියේ ස්ථානාධිපති ප්‍රධාන පොලිස් පරීක්ෂක ජි.සි. රාජපක්ෂ මහතාගේ උපදෙස් මත අපරාධ අංශයේ ස්ථානාධිපති උප පොලිස් පරීක්ෂක අසංක පතිරණ මහතාගේ මෙහෙයවීමෙන් පොලිස් සැරයන් (43672) සුරංජිත් (50007) කමල් සිරි කාන්තා පොලිස් සැරයන් (5497) දීපානි පොලිස් කොස්තාපල්වරුන් වන (73917) සමන් (92521) සමරසිංහ (92530) මධුශංක (100223) ජයසුන්දර (102922) කවිඳු මහත්ම මහත්මීහු පරීක්ෂණ පවත්වති.
සැකකරු කපිතාන් නිල ඇඳුමෙන් සැරසී
අත් පළඳනාව මිලදී ගැනීම සඳහා
වෙළෙඳසලට පැමිණ සිටි අයුරු
