ශ්‍රී ලංකාවේ වයස්ගතම පියා දකුණු පළාතේ ගාල්ල දිස්ත්‍රික්කයේ නාගොඩ ප්‍රාදේශීය ලේකම් කොට්ඨාසයේ කැප්පෙට්ටියගොඩ උතුර ග්‍රාම නිලධාරි වසමේ පදිංචි මාගල කොට්ටච්චි නන්දියස් මහතා බව ජාතික වැඩිහිටි මහා ලේකම් කාර්යාලය නිල වශයෙන් සනාථ කර තිබේ.
පැරණි ජාතික හැඳුනුුම්පතට අනුව නන්දියස් මහතා 1914 ජූනි මස 3 වැනිදා උපත ලබා ඇත. ඒ අනුව ඔහු දැන් අවුරුදු 109ක් වයසැති ජ්‍යෙෂ්ඨ පුරවැසියෙකි. ඉතා නීරෝගි දිවි පෙවෙතක් ගත කරන නන්දියස් මහතා තම මුළු දිවියම කැප කර ඇත්තේ කෘෂිකර්මාන්තය වෙනුවෙනි. ඔහුගේ ජීවිකාව ගහකොළ සමඟ බද්ධ වූවකි. එහෙත් ඔහු ලි‍වීමට කියවීමට හැකියාව ඇති, පහ ශ්‍රේණිය දක්වා අධ්‍යාපනය ලැබූවෙකි.
මේ ජ්‍යෙෂ්ඨ පුරවැසියාගේ නීරෝගි දිවිපෙවෙතට හේතු වන්නේ වස විසෙන් තොර පෝෂණීය ආහාර රටාවයි. මෑතක් වන තුරුම නිවෙසේ පෝෂණ අවශ්‍යතා සඳහා අල, බතල, මඤ්ඤොක්කා පවා ඔහු වගා කර ඇත. එමෙන්ම පාන්දරින්ම වත්තපිටියේ වැඩට යන නන්දියස් මහතාට එදා සිටම කැත්ත උදැල්ල ඉතා සමීප වූ බව ඔහුගේ සමීපතමයෝ පවසති. දරුවන් හතර දෙනකුගේ පියකු වන නන්දියස් මහතා පුතුගේ පරම්පරාවෙන් සිව් මුනුපුරන් දකින්නෙකි. පුංචිම මුනුපුරාට දැන් වයස අවුරුදු පහකි. වයස්ගත වුණත් කිසිදු ලෙඩක් දුකක් නැතිව නීරෝගිව සිය ජීවිතය ගත කිරීමට ඔහුට හැකිව තිබේ. සරල දිවි පෙවෙත එයට හේතුවයි. නන්දියස් මහතා මුළු ගමම හඳුනන්නේ ලොකු අයියා ලෙසයි.
පිරිතකදී, ගංවතුර ආපදාවකදී ඕනෑම කරදරයකදී ඔහු කාගෙත් උදවුවට ගියේය. නන්දියස් මහතාගේ ආදර බිරිය කලකට පෙර මෙලොවින් සමු ගත්තාය. මෑතකදී ශ්‍රවණ තවත් තත්ත්වයේ දුර්වලතාවක් ඇති වුණත් ඔහුට තවමත් හොඳ මතක ශක්තියක් තිබේ.
පැරණි රසාංග තවමත් මුමුනන්නේ ඒ මතක ශක්තයෛන් බව දරු‍වෝ පවසති.
