සිය වාහනයට වෙඩි තබනු ලැබුවේ පවතින ක්‍රමය විසින් බව අනුරාධපුර දිස්ත්‍රික් පාර්ලිමේන්තු මන්ත්‍රී උද්දික ප්‍රේමරත්න මහතා පාර්ලිමේන්තුවේදී ඊයේ (19) ප්‍රකාශ කළේය.
දිගු කාලයක් පුරාවට රටේ පවතින දේශපාලන ක්‍රමය වැරදි බවත් ශ්‍රී ලංකාව මේ තත්ත්වයට ඇද වැටී ඇත්තේ ඒ නිසා බවද මන්ත්‍රීවරයා පැවසීය. එමෙන්ම මෙම සිදුවීමෙන් පසුව තමන් සම්බන්ධයෙන් සොයා බැලූ සියලු දෙනාට සිය ස්තූතිය පිරිනමන බවද මන්ත්‍රීවරයා පැවසීය. පාර්ලිමේන්තු මන්ත්‍රී උද්දික ප්‍රේමරත්න මහතා මේ බව සඳහන් කළේ පාර්ලිමේන්තුවේදී ඊයේ (19) විශේෂ ප්‍රකාශයක් සිදු කරමිනි. එහිදි වැඩිදුරටත් අදහස් දැක්වූ උද්දික ප්‍රේමරත්න මහතා මෙසේද පැවසීය.
මගේ වාහනයට 17 වැනිදා රාත්‍රියේ වෙඩි ප්‍රහාරයක් සිදු වුණා. සිද්ධිය ගැන පොලිසිය, අපරාධ පරීක්ෂණ දෙපාර්තමේන්තුව දැන් පරීක්ෂණයක් කරගෙන යනවා. මේ සිද්ධියෙන් පසු මා ගැන සොයා බලපු සියලු දෙනාට ස්තූතිවන්ත වෙනවා.
මේක කළේ කවුද කියන එකට වඩා මට කියන්න තියෙන්නේ මේකයි. මම හිතෙන්නේ මේ පවතින ක්‍රමය විසින් තමයි මේ ප්‍රහාරය කරනු ලැබුවේ. කවුරුත් දන්නවා මේ ක්‍රමය වැරදියි කියලා. අපි කරගෙන යන දේශපාලන ක්‍රමය වැරදියි. ඒ නිසා තමයි මේ රට මේ තත්ත්වයට පත්වෙලා තියෙන්නෙ දෙපැත්තෙම වැරදි තියෙනවා. මේකේ නිවැරදි තැන හොයාගන්න ඕන. වෙනස් වෙන්න ඕන තැන අපි හොයාගන්න ඕන. හොයාගෙන දෙපාර්ශ්වයම ඒ වෙනුවෙන් වැඩ කරන්න ඕන. ඒ වෙනස ගේනකම් මේ රට හදන්න බැහැ. ඒ දේශපාලන පරිවර්තනය මේ රට ඉල්ලනවා. ඒ වෙනස ආදේශ කරන්න කියලා තමයි අපි ඉල්ලන්නේ. ඒ වෙනස වෙනුවෙන් අපි තරුණයන් විදිහට වැඩ කරනවා.
