දඹුල්ල ජවය තරුණ සංවිධානය දින තුනක් පුරා පවත්වන්නට වූ නාට්‍ය සංදර්ශන මාලාව සහ භාණ්ඩ සල්පිල් වෙන්දේසියේදී කිඹුලා බනිස් ගෙඩියක් රුපියල් 34,600ක මුදලකට ලබා ගැනීමට ජර්මන් ජාතික සංචාරකයන් පිරිසක් ඉකුත් 12 වැනිදා රාත්‍රියේ දඹුල්ල පොහොරන්වැව ප්‍රදේශයේදී සමත් වී තිබේ.
වෙන්දේසිය සඳහාම ප්‍රදේශයේ තරුණ කණ්ඩායමක් විසින් බේකරියකට ලබාදී කිඹුලෙකුගේ හැඩය ඇති විශේෂ බනිස් ගෙඩියක් වෙන්දේසිය සඳහා ඉදිරිපත් කොට තිබිණි. ඒ අනුව ශ්‍රී ලාංකික ප්‍රදේශවාසීන් තරුණ පිරිසක් සහ මෙම නාට්‍ය සන්දර්ශනය නැරඹීම සඳහා පැමිණ සිටි ජර්මන් ජාතික පිරිසක් අතර පැය කිහිපයක වෙන්දේසි සටනකින් පසුව විදෙස් ජාතික කණ්ඩායම මෙම කිඹුලා බනිස් ගෙඩිය ඔවුන් සතු කරගෙන තිබේ.
මිලදී ලබා ගත් බනිස් ගෙඩිය මෙම විදේශීය සංචාරකයන් විසින් ප්‍රදේශයේ කුඩා දරුවෙකුට ලබාදීම සිදුකළ බව සංවිධායකයෝ පවසති.
මෙවැනි වෙන්දේසියකදී කිඹුලා බනිස් ගෙඩියක් රුපියල් 22,200ක මුදලකට මීට වසර කීපයකට ඉහතදී ගලෙන්බිදුනවැව පඬිකාරමඩුව ප්‍රදේශයේ පැවැති සංදර්ශනයකදී අලෙවි වී ඇත. මෙහිදී ගීත ගායනා ගීත මුද්‍රා නාට්‍ය සංදර්ශන ආදී විනෝදකාමී අවස්ථා රැසක් පැවති අතර, විදෙස් සංචාරකයෝ ද විනෝද වීම සඳහා පැමිණ සිටි ඇත. විරිදු ශිල්පී චමින්ද කුමාර ගල්ගමුව විසින් රු.34600ක වාර්තාගත මුදලකට මෙම වෙන්දේසිය සිදුකර තිබේ.
