අන්තර්ජාතික වශයෙන් පිළිගැනීමකට ලක්වූ පරීක්ෂණ කළ ශ්‍රී ලංකාවට පාස්කු ඉරිදා එල්ල වූ ත්‍රස්ත ප්‍රහාරය සම්බන්ධයෙන් ජාත්‍යන්තර මට්ටමේ පරීක්ෂණයක් අවශ්‍ය නොවන බව ස්විට්සර්ලන්තයේ හිටපු ශ්‍රී ලංකා තානාපති, නීතීඥ සරත් කෝන්ගහගේ මහතා ප්‍රකාශ කරයි.
මෑත කාලයේ ශ්‍රී ලංකාවේ පරීක්ෂණ කළ උගත් පාඩම් හා ප්‍රතිසංධානය පිළිබඳ ජනාධිපති කොමිසම, උදලාගම කොමිසම සහ පරණගම කොමිසම ආදියේ වාර්තා ජාත්‍යන්තරව පිළිගත් බව පෙන්වා දෙන ඒ මහතා ඩයස්පෝරාවේ ආධාර මත බ්‍රිතාන්‍ය චැනල් 4 නාලිකාව මේ සිදුකරන්නේ ශ්‍රී ලාංකිකයන් සහ ශ්‍රී ලංකාව අනතුරේ දැමීමක් බවද අද වනවිට ඩයස්පෝරාව යුදෙව් මානසිකත්වයට පැමිණ තිබෙන බවද පෙන්වා දෙයි.
ඒ මහතා මේ බව සඳහන් කළේ ශ්‍රී ලංකා පදනම් ආයතනයේ දී ඊයේ (12) පෙරවරුවේ පැවැති විශේෂ මාධ්‍ය හමුවට එක්වෙමිනි.
එහිදී වැඩිදුරටත් අදහස් දක්වමින් සරත් කෝන්ගහගේ මහතා පෙන්වා දුන්නේ,
“ජගත් මානව හිමිකම් කවුන්සලයේ සැසිවාරයක් පැමිණෙන විට සෑම අවස්ථාවකම ශ්‍රී ලංකාවට විවිධ චෝදනා එල්ල වෙනවා. මෙවර චැනල් 4 නාලිකාවත් එවැනිම චෝදනාවක් එල්ලකර තිබෙනවා. පාස්කු ඉරිදා එල්ල කළ ප්‍රහාරය සම්බන්ධයෙන් මගෙනුත් ප්‍රකාශයක් ගෙන තිබෙනවා. ඔවුන් මගේ නිවෙසට පැමිණ අදාළ සම්මුඛ සාකච්ඡාව කළා. නමුත් මට පැවසුවේ ලන්ඩන් අයි.ටී.එන් කියලයි. ඒ නිසා මමත් සම්මුඛ සාකච්ඡාවක් දුන්නා. නමුත් පසුව ඔවුන් එය බ්‍රිතාන්‍යයේ චැනල් 4 නාලිකාවෙන් ප්‍රචාරය කර තිබෙනවා. පසුව තමයි මම එවැන්නක් දන්නේ. මුලින් මම මේ සම්බන්ධයෙන් දැන සිටියා නම් එම නාලිකාවට කිසිඳු සම්මුඛ සාකච්ඡාවක් දෙන්නේ නැහැ. එක්තරා පෞද්ගලික නාලිකාවක සේවය කරන මගේ හිතවතෙක් තමයි මෙලෙස පැමිණියේ. පාස්කු ඉරිදා එල්ල කළ ත්‍රස්ත ප්‍රහාරය අයි.එස්.අයි.එස් ත්‍රස්තවාදීන්ගේ හෝ මුස්ලිම් අන්තවාදීන්ගේ වැඩක් බවට මම පැවසුවා. අමෙරිකාවේ ලෝක වෙළඳ මධ්‍යස්ථානයට හා තවත් ස්ථාන කිහිපයකට සැප්තැම්බර් 11 දා ත්‍රස්ත ප්‍රහාර මාලාවක් එල්ල වුණා. එය කළේ ජෝර්ජ් බුෂ් මහතා විසින් බවට මත පළවුණා. නමුත් එතන ලොකු අතපසුවීමක් සිදුව තිබෙනවා. නමුත් ඒ සිදුවීම සම්බන්ධයෙන් ජාත්‍යන්තර පරීක්ෂණයක් ඉල්ලුවේ නැහැ.
ශ්‍රී ලංකාව කියන්නේ ජාත්‍යන්තරයට පිළිගත හැකි පරීක්ෂණ කළ රටක්. උගත් පාඩම් හා ප්‍රතිසංධානය පිළිබඳ ජනාධිපති කොමිසම, උදලාගම, පරණගම කොමිසන් ශ්‍රී ලංකාවේ සිදුකර තිබෙනවා. ඒ වාර්තා සියල්ල ජාත්‍යන්තර වශයෙන් පිළිගැනීමට ලක්ව තිබෙනවා. පාස්කු ඉරිදා එල්ල වූ ත්‍රස්ත ප්‍රහාරය සම්බන්ධයෙන් අපි ක්‍රියාත්මක කරන්න ඕන ජාත්‍යන්තරයට පිළිගත හැකි පරීක්ෂණයක්. මම ස්විට්සර්ලන්තයේ ශ්‍රී ලංකා තානාපතිවරයා වශයෙන් කටයුතු කරන සමයේ එරට ස්ථාන කිහිපයක “Killing field” නම් වාර්තා චිත්‍රපටය ප්‍රදර්ශනය කර තිබෙනවා. මම ඒවාට විරුද්ධව එදා තනිව සටන් කළා. අද අපේ රටේ දේශපාලනඥයන් සියලු දෙනාම නඩුකාරයන්, නීතීඥයන් බවට පත්ව තිබෙනවා. රවුෆ් හකීම් මන්ත්‍රීවරයා සඳහන් කරනවා සහරාන් කියන පුද්ගලයා දන්නේ නැහැ කියලා. ඔහුගේ මැතිවරණ වේදිකාවල එකට හිඳගෙන ලබාගත් ඡායාරූප ගැන සියලු දෙනාම දැක තිබෙනවා. අපි හැම අවස්ථාවකම සාධාරණ වෙන්න ඕන. මේ රටේ සිදුවන විවිධ දේ පිටුපස ඉන්නේ දෙමල ඩයස්පෝරාවයි. නවසිලන්තයේ ක්‍රයිස්චර්ච්හි දී සිදුකළ ත්‍රස්ත ප්‍රහාරය සම්බන්ධයෙන් අපි දන්නවා. එම ප්‍රහාරය පාස්කු ඉරිදා ප්‍රහාරය ඉක්මන් කළා කියන්න පුළුවන්.
චැනල් 4 නාලිකාවේ වාර්තා වැඩසටහන තුළ සහරාන්ලා නැහැ. එතන ඉන්නේ ගෝඨාභය රාජපක්ෂ මහතා ඇතුළු පිරිසක් පමණයි. සහරාන්ලා මේසා විශාල ප්‍රහාරයක් එල්ලකර තිබෙන්නේ ගෝඨාභය රාජපක්ෂ මහතා ගේන්නයි කියා ඇතැමුන් පවසනවා. කාදිනල් හිමිපාණන් ද මෙවැනිම කාර්යයක් ඉටුකර තිබෙනවා. නමුත් චැනල් 4 නාලිකාව විසින් මේ සියල්ල විකෘති කිරීමක් කර තිබෙනවා.
එම නාලිකාවට අවශ්‍ය දර්ශන ලබාදී තිබෙන්නේ ශ්‍රී ලංකාවේ රූපවාහිනී නාලිකාවකින් කියා කියන්න පුළුවන්. පසුගිය 2011 වසරේ දී ජගත් මානව හිමිකම් කවුන්සලයට පැමිණි යෝජනාව පරාජය කළා. අපි විසින් ඉදිරිපත් කළ යෝජනාව ජයග්‍රහණය කළා. එදා සිට ඩයස්පෝරාව චැනල් 4 නාලිකාවට ආධාර කරනවා. එම ඩයස්පෝරාව යුදෙව් මානසිකත්වයට පැමිණ තිබෙනවා. අපි සිංහල, දෙමල ආදී වශයෙන් බෙදී කටයුතු නොකර මේ අවස්ථාවේ ඉවසීමෙන් කටයුතු කළයුතු වෙනවා. ඉන්දියාව සහ ශ්‍රී ලංකාව අතර යුදෙව් රාජ්‍යයක් බිහිකිරීමේ දැවැන්ත ව්‍යාපාරයක් ඩයස්පෝරාව විසින් කරගෙන යනවා. යුදෙව් මානසිකත්වය සහිත මන්ත්‍රීවරුන් පිරිසක් ද ශ්‍රී ලංකා පාර්ලිමේන්තුවේ ඉන්නවා.
අපි එක් ජාතියක් වශයෙන් එක රටක් ලෙස එළියට පැමිණිය යුතු වෙනවා. පාස්කු ඉරිදා එල්ල ක්‍රළ ත්‍රස්ත ප්‍රහාරය සම්බන්ධයෙන් ජාත්‍යන්තර පරීක්ෂණයක් කළයුතු බවට බොහෝ අය කෑ ගසනවා. නමුත් ශ්‍රී ලංකාව තුළ සිදුකරන පරීක්ෂණ ඊට වඩා හොඳයි. මේ සම්බන්ධයෙන් ශ්‍රී ලංකාවට පිළිගත හැකි පරීක්ෂණයක් අවශ්‍ය වෙනවා. නමුත් මෙතන දී ඉතාම ප්‍රවේශම් වෙන්න ඕන. ගිරව් වගේ කතා කළයුතු නැහැ. ගැඹුර බලන්න ඕන. අනතුර දෙස බලන්න ඕන. රටක් සමඟ සෙල්ලම් කරන්න බැහැ. වැරැදි කර තිබෙනවා නම් සාධාරණ පරීක්ෂණයක් කරන්න ඕන. රජයේ හමුදාවන් සිදුකළ දේ පමණක් නොව එල්.ටී.ටී.ඊ ත්‍රස්තවාදීන් සිදුකළ දේ සම්බන්ධයෙන් ද සොයා බැලිය යුතු වෙනවා. ඒ වගේම 88/89 කාලයේ සිදුවූ තත්ත්වයන් සම්බන්ධයෙන් ද සොයා බැලිය යුතු වෙනවා. අපි මේ ගැටළු විසඳා ගතයුතු වෙනවා. ඒ කියන්නේ බලය පිටුපස හඹා යාමක් නොවෙයි. පාස්කු ඉරිදා ප්‍රහාරය සම්බන්ධයෙන් ජාත්‍යන්තර පරීක්ෂණයක් අවශ්‍ය වන්නේ නැහැ. මේක ශ්‍රී ලංකාව තුළ විසඳා ගන්න පුළුවන්. මේ රටේ ක්‍රියාත්මක කළ කොමිසන් වාර්තා කිහිපයක් ජාත්‍යන්තර වශයෙන් පිළිගැනීමට ලක්වුණා.
ඒ ආකාරයෙන් පාස්කු ඉරිදා ප්‍රහාරය සම්බන්ධයෙන් සිදුකරන පරීක්ෂණය ද පිළිගන්නා තැනට අපි කටයුතු කළයුතු වෙනවා. ඒ වගේම මෙවැනි වාර්තා ප්‍රසිද්ධ කළයුතු වෙනවා. ඒවා සඟවා සිටිය යුතු නැහැ. චැනල් 4 නාලිකාව කරන්නේ රාජපක්ෂවරුන්ගෙන් පළිගන්නවා කියලා ශ්‍රී ලංකාව අමාරුවේ දැමීමක්. මේ තුළ රට සහ ජනතාව අවුලට දානවා. මේ අවස්ථාව වනවිට ශ්‍රී ලංකාව ආර්ථික වශයෙන් විශාල ගැටළුවක ඉන්නේ. ඒ නිසා දේශීය වශයෙන් හෝ ජාත්‍යන්තර වශයෙන් තවදුරටත් අවුල් කිරීම සුදුසු නැහැ. මේ නිසා රටේ ජනතාවට සැකයක් ඇති නොවන විදියට කටයුතු කළයුතු වෙනවා. මුස්ලිම් ජනතාවට වැඩි වශයෙන් ප්‍රහාර එල්ල කළේ සහරාන්ලා බව කියන්න ඕන. ඒ වගේම මේ වනවිට පළාත් සභා මැතිවරණය කල්දමා තිබෙනවා. මේ සම්බන්ධයෙන් වැඩිම වගකීමක් බාරගත යුත්තේ දෙමල ජාතික සන්ධානයයි” යනුවෙන් පැවසීය.
