– රුසියාවට යැවීම තාවකාලිකව අත්හිටුවයි
– සොයා බලන්න දූත පිරිසක් රුසියාවට
රුසියාවේ ඇඟලුම් කර්මාන්තශාලාවල හා සත්ත්ව ගොවිපොළවල සේවයට ගොස් සිටින ශ්‍රී ලාංකිකයන්ට සිය සේවා ස්ථානවල ගැටලු රැසක් පවතින බවට කාර්යාංශය වෙත පැමිණිලි ලැබී ඇති අතර, ඔවුන්ගේ ගැටලු පිළිබඳ සොයා බැලීමට කම්කරු හා විදේශ රැකියා ඇමැති මනුෂ නානායක්කාර මහතාගේ උපදෙස් මත ශ්‍රී ලංකා විදේශ සේවා නියුක්ති කාර්යාංශයේ නිලධාරීහු පිරිසක් මේ දිනවල රුසියාවේ සංචාරයක නිරතව සිටිති. මෙහිදී ඇමැතිවරයාගේ උපදෙස් අනුව නව රැකියා අවස්ථා ශ්‍රී ලාංකිකයන්ට උදාකර ගැනීම සඳහා කටයුතු කිරීම ශ්‍රිීලංකා විදේශ සේවා නියුක්ති කාර්යාංශයේ නිලධාරීන්‌ගේ කාර්යයක් වනු ඇත. රුසියාවේ සේවයට ගොස් සිටින ශ්‍රි ලාංකික ශ්‍රමිකයන්ට තමන්ට හිමි වැටුපෙන් කොටසක් බදු වශයෙන් අය කිරීම හා විධිමත් අයුරින් මුදල් දිවයිනට ප්‍රේෂණය කිරීමට නොහැකි වීම ඇතුළු නොයෙකුත් ගැටලු උද්ගත වී තිබේ. මේ පිළිබඳව ඇමැති මනුෂ නානායක්කාර මහතාට කරුණු අනාවරණය වීමෙන් පසු ස්වයං මාර්ගයෙන් රුසියාවේ රැකියා සඳහා ශ්‍රමිකයන් යොමු කිරීම තාවකාලිකව අත්හිටුවීමට පියවර ගෙන ඇත. වැඩිදුරටත් අදාළ ගැටලු පිළිබඳව කරුණු සොයා බැලීමට හා ශ්‍රමිකයන් බඳවා ගැනීම සිදු කරන ආයතනවල කළමනාකරුවන් හමු වී සාකච්ඡා කිරීමෙන් අනතුරුව අදාළ ගැටලු සඳහා විසඳුම් ලබාදීම මේ නියෝජිත පිරිසගේ සංචාරයේ අරමුණයි. රුසියාවේ සංචාරයේ නිරත දූත පිරිසට විදේශ සේවා නියුක්ති කාර්යාංශයේ අතිරේක සාමාන්‍යාධිකාරී (ජාත්‍යන්තර කටයුතු) එම්. ආර්. සී. බී. ඒකනායක, නියෝජ්‍ය සාමාන්‍යාධිකාරීවරුන් වන පී.පී. වීරසේකර, ප්‍රියංකා රත්නසිංහාරච්චි මහත්ම මහත්මීහු එක්ව සිටිති.
