දෙපාර්ශ්වයක් අතර ඇති වූ ආරවුලකින් පියෙකු හා ඔහුගේ පුතුන් දෙදෙනා කැපුම් තුවාල සහිතව පොල්පිතිගම මූලික රෝහලට ඇතුළත් කර වැඩිදුර ප්‍රතිකාර සඳහා කුරුණෑගල ශික්ෂණ රෝහලට ඉකුත් 03 වැනිදා මාරු කර යවා තිබේ. තුවාල ලැබූවන් අතර එළඹෙන 17 වැනිදා ජයට මඟුල් සමරා විවාහ ගිවිස ගැනීමට සුදානම්ව සිටි මනාල පුත්‍රයෙකු සිටින බවත්, කැපුම් තුවාල ලත් අය අතරින් වැඩියෙන්ම මුහුණට හා අතට තුවාල සිදුවී ඇත්තේ
එකී අනාගත මනාලයාට බවත් පොලිසිය පවසයි.
පොල්පිතිගම පොලිස් වසම අවට ගම්මානයකට පිටතින් පැමිණ සිටින කාන්තාවක විවාහ වී සිටින්නේ මෙම කැපුම් තුවාල ලත් අයෙකු සමඟය. එම විවාහක දියණියගේ පියා විසින් තම දියණියගේ සැමියාටත්, ඔහුගේ බාල සහෝදරයාටත්, පියාටත් තියුණු ආයුධයකින් කොටා තුවාල සිදු කොට අපරාධය සිදු කළ තැනැත්තා විසින්ම ඒ බව පොලිසිය දැනුම්වත් කර ඇත. ඔහු මේ වනවිට පොලිසිය මඟින් අත්අඩංගුවට ගෙන තිබේ.
මෙම විවාහක කාන්තාව ඇහැටුවැව පොලිස් වසමේ පදිංචිකාරිනියකි. ඇය මෙම ගම්මානයේ අයෙකු සමඟ විවාහවීම නිසා ඇයගේ මව හා පියා ඔවුන් සතු මුල් ඉඩකඩම් විකුණා මෙම ප්‍රදේශයට වාසයට පැමිණ සිටින අයවලුන් වෙති. ඇයගේ මව දැනට විදෙස්ගතව සිටින අතර පියා දියණිය හා බෑණා කැටුව මෙහි වාසය කරන අතරේ ඉකුත් 03 වැනිදා උදේ ඇති වූ ආරවුලින් ඇයගේ සැමියා, මාමණ්ඩිය හා බාල මස්සිනා තුවාල ලබා රෝහලේත්, පියා අත්අඩංගුවේත් පසුවන අතරවාරයේ ඇය මෙම සිද්ධිය හේතුවෙන් අසරණ වී සිටින බවත් ප්‍රදේශවාසින් පෙන්වා දෙති.
තුවාල ලැබූ අයගේ තත්ත්වය බරපතළ නොවන බව රෝහල් සේවකයෙක් පැවසීය.
