රජයේ කෘෂිකර්ම පර්යේෂණ හා නිෂ්පාදන සහකාරවරුන්ගේ සුබසාධක සංගමයට ආධාර පිණිස මතුගම ගොවිජන සේවා මධ්‍යස්ථානයේ නිලධාරීන් විසින් කුලියට ගොයම් කැපීමේ වැඩසටහනක් ක්‍රියාත්මක කර ඇත.
මේ වන විට රට පුරා පවතින ආර්ථික අපහසුතා නිසා රජයේ කෘෂිකර්ම පර්යේෂණ හා නිෂ්පාදන සහකාරවරුන්ගේ සුභ සාධක සංගමයට තම අරමුදල් රැස්කර ගැනීමේ අපහසුතා ඇතිවීම නිසා එයට පිළියමක් ලෙස වී වගා කළ කුඹුරු හිමියන්ගේ වී අස්වනු නෙළීම මඟින් ලැබෙන මුදල් තම සුබසාධක සංගමයේ අරමුදලට බැර කිරීම මෙම වැඩසටහනේ අරමුණ වී ඇත.
මතුගම ගොවිජන සේවා මධ්‍යස්ථානයේ ගොවිජන සංවර්ධන නිලධාරී ගයනි වීරක්කොඩි මහත්මියගේ ප්‍රධානත්වයෙන් එම කාර්යාලයේ නිලධාරීන් මතුගම ප්‍රාදේශීය ලේකම් කාර්යාලයේ නිලධාරීන්ගේ සහාය ඇතුව 794 හොරවල වසමේ කුඹුරු යායේදී පසුගියදා මෙම ගොයම් කැපීම සිදු කළ අතර, කෘෂිකර්ම පර්යේෂණ හා නිෂ්පාදන සහකාර සනත් ප්‍රියන්ත මහතා විසින් මෙම වැඩසටහන සංවිධානය කර තිබුණි.
