ශ්‍රීලනිප 72 වන සංවත්සරය ඉරිදාට (03) යෙදී ඇත. මේ ලිපිය ඒ නිමිත්තෙනි
ශ්‍රී ලංකා නිදහස් පක්ෂය හැත්තෑ දෙවැනි සංවත්සරය සමරන්නේ අප රට විෂම වූ සමාජ, ආර්ථික, දේශපාලනික, ජාත්‍යන්තර ගැටලු රාශියක් කරපින්නා ගත් මොහොතකය. හරියටම ‘මරණ තුනක් ඇති මිනිහෙක් පැණි කෑවා’ සේය.
69 ලක්ෂයක ඡන්දයෙන් බලයට පත් වූ පාලකයාට වසර එකහමාරක් යාමටත් මත්තෙන් රට හැර පලා යාමට සිදුවිය. එසේ වූයේ රට තව තවත් අර්බුද රාශියකට පත් කරමිනි. පොහොට්ටුවේ ආණ්ඩුව බලයට පත්වීමට පෙර එම සන්ධාන පාර්ශ්වකරුවෙකු ලෙස අපට ද බොහෝ පොරොන්දු එකඟතාවයන්, ගිවිසුම් සන්ධාන ප්‍රතිපත්ති ගොඩනැඟීය. ඒ සියල්ල නොසලකා හරිමින් පවුල් පාලනයක් ගොඩනැඟූ පොහොට්ටු ආණ්ඩුව අවසානයේ දී මහජන උද්ඝෝෂණ හමුවේ බිඳවැටෙන තත්ත්වයකට පත් විය. තමා නියෝජනය කළ දිස්ත්‍රික්කය පමණක් නොව සිය ආසනයවත් දිනාගත නොහැකි වූ රටේ ප්‍රධාන දේශපාලන පක්ෂයක නායකත්වය දැරූ පුද්ගලයා ආණ්ඩුවේ විකල්ප පිලක නායකයා බවට පත්විණි. ඔහු අගමැති ධුරයේ සිට ජනාධිපති ධුරය දක්වා පැමිණ ඇත. රනිල් වික්‍රමසිංහ ජනාධිපති ලෙස පත්ව වසරක් පිරී ඇත. ජේ. ආර්. ජයවර්ධනගේ විධායක ජනාධිපති ක්‍රමය සහිත ව්‍යවස්ථා අර්බුදය නැවත වතාවක් ප්‍රකාශයට පත්ව ඇත.
නිදහස් අධ්‍යාපනය කඩාකප්පල් වෙමින් පරිපාලනය අකර්මණ්‍ය වීම නිදහස් සෞඛ්‍ය සේවාව අකර්මණ්‍ය කරමින් ඖෂධ හිඟයක් නිර්මාණය කරමින් ප්‍රමිතියෙන් තොරව ඖෂධ ගෙන්වීම තුළින් රාජ්‍ය රෝහල් පද්ධතිය කෙරෙහි ජන විශ්වාස භංගත්වය ඇතිකිරීම, පලපුරුදු පරිපූර්ණ වෛද්‍යවරුන් සහ උගතුන් බුද්ධිමතුන් රට හැර යෑම, බලශක්ති අර්බුදය, කර්මාන්ත වැසී යාම තුළින් විරැකියාව ඉහළ යාම ශ්‍රී ලාංකික ජනයාගේ ජනමනස අවුල් වීමෙන් සියදිවි නසාගනිමින් ප්‍රචණ්ඩත්වය, අපචාර වැඩිවිණි.
ජාත්‍යන්තරව ආසියානු කලාපයේ සංවර්ධනය වෙන රටවල් අතුරින් දිළිඳුතම රාජ්‍යය බවට ශ්‍රී ලංකාව පත්ව ඇති බවත්, ණය නොගෙවන අසමත් රාජ්‍යයක් බවට පත්ව ඇති බවත් ප්‍රකාශයට පත් කර ඇත. මේ වන විට දේශපාලන පක්ෂ අතර, නොගැළපීම් ගැටුම් ගැටලු ප්‍රතිවිරෝධතා මතුව ඇත්තේ ආර්ථික හා සමාජයීය අර්බුදයේ ප්‍රකාශනයක් ලෙසිනි.
බමුණු කුලයේ පරිහානිය
1948 ඩොමිනියන් තත්ත්වයේ නිදහසක් ඉංග්‍රීසීන්ගෙන් ලබාගත් අතර, අපේම කළු සුද්දගේ පාලනය යටතේ ද ක්‍රියාත්මක කළේ ඉංග්‍රීසීන් විසින් ලියා සකස් කර දුන් යටත් විජිත ගුවන්, යුද, නාවික කඳවුරු පමණක් නොව ඔවුන් සකස් කළ ව්‍යවස්ථාවක් යටතේය. එකී යදම් බිඳ දමමින් පොදු ජන යුගයක ආරම්භය 56 බණ්ඩාරනායක යුගයෙන් ආරම්භ විය. යටත් විජිත මනසකින් හා ආකෘතියකින්, ජීවන ක්‍රමයක් සහිත වූ පාලක පෙළැන්තිය වෙනුවට සඟ, වෙද, ගුරු, ගොවි, කම්කරු, පංච මහා බලවේගය පෙරටු කරගත් ශ්‍රී ලංකා නිදහස් පක්ෂය විකල්ප මාවත ලංකාවට හඳුන්වා දුන්නේය.
1956 මෙම ඓතිහාසික ජයග්‍රහණය සමඟින් ලෝකයේ ප්‍රගතිශීලී වාමවාදී දේශපාලන බලවේග සමඟින් ඒකරාශි වෙමින් සමාජවාදී ලෝකය සමඟින් විවෘත සංවාදයකට එකතු විය. ශ්‍රී ලංකාව ඓතිහාසික නොබැඳි පිළිවෙත ස්ථාපනය කරමින් අධිරාජ්‍යවාදී විරෝධ වෙමින් නව යටත් විජිතවාදය එරෙහිව ශ්‍රී ලංකාව නව ආකෘතියක් යටතේ දේශපාලන, සමාජ, ආර්ථික සංවර්ධනයට මුලපිරීය. දෙස් විදෙස් ව්‍යාපාරිකයන්ට සතු බැංකු හා වෙනත් ව්‍යාපාර රාජ්‍ය සතු කරමින් එකී වරප්‍රසාද හා අයිතිවාසිකම් තුළින් සාමාන්‍ය ජනතාවට ලබාගැනීමටත්, ලබා දීමටත් කටයුතු කිරීමය. එසේම ගොවි ජනතාවට භූමියේ අයිතිය සාක්ෂාත් කළේ 1956 අඳගොවි පනත සම්මත කිරීමෙනි. මහා ගත්කරු මාටින් වික්‍රමසිංහ මෙය හඳුන්වා දුන්නේ බමුණු කුලයේ බිඳ වැටීමක් ලෙසය.
කච්චතිව් නැවතත් අපට
අපේ අසල්වැසි රාජ්‍යයන් සමඟ ඉතා මිත්‍රශීලීව කටයුතු කිරීමෙන් ජාත්‍යන්තර පැසසුමට ශ්‍රී ලංකාව පත් වූයේ චීනය ඉන්දියාව අතර ඇති වූ ගැටුම නිරාකරණය කිරීම ය. සාමදූතිකාව ලෙස කටයුතු කළේ ලොව ප්‍රථම අගමැතිනිය ලෙස ගිනක් පොතට එකතු වූ සිරිමාවෝ ඩයස් බණ්ඩාරනායක මැතිනියයි. අසල්වැසි පාලකයා සමඟ හොඳ මිත්‍රත්වය නිසාම කච්චතිව් දුපත ශ්‍රී ලංකාවට ලබා ගැනීමට හැකි විය.
1962 බණ්ඩාරනායක මැතිනියගේ ආණ්ඩුව කුමන්ත්‍රණයකින් පෙරලා දැමිණි. 1965 පක්ෂ අභ්‍යන්තර කුමන්ත්‍රණයක් ඇති කරමින් පක්ෂ නායකයන් විවිධ වරදාන, වරප්‍රසාදවලට ලොල්ව පක්ෂයෙන් ඉවත් වීම.
1970 සිරිමාවෝ බණ්ඩාරනායක මැතිනිය වාමවාදී පක්ෂ හා ප්‍රගතිශීලී කොටස් සමඟ ආණ්ඩුව පිහිටුවා පොදුජන අයිතීන් සුරකිමින් ජනරජ ව්‍යවස්ථාව සම්මත කිරීමත් සමඟ දේශපාලන වශයෙන් යටත්විජිතභාවයේ නෂ්ටාවශේෂ අහෝසි කෙරිණි. පාර්ලිමේන්තුව ජාතික සභාව වූ අතර උත්තර මන්ත්‍රී මණ්ඩලය අහෝසි විය. වරප්‍රසාද ලත් බ්‍රිතාන්‍ය නම්බු නාම අහෝසි කෙරිණි.
රැකියා උත්පාදන නිෂ්පාදන ආර්ථිකයක්
1972 සියලුම පෞද්ගලික පාසල් ජනසතු කරමින් ජාතික විෂය නිර්දේශයක් යටතේ දිවයින පුරා සියලුම පාසල්වල ඉගැන්වීමේ කටයුතු ඇරැඹි අතර ස්වභාෂාවෙන් ඉගැනීමේ අයිතිය ලබාදීම, ස්වදේශීය කර්මාන්ත ආරම්භ කිරීම, ටයර්, වානේ, යකඩ ලෝහ භාණ්ඩ, කඩදාසි, පිඟන්, ගඩොල්, උළු, රෙදිපිළි සඳහා කර්මාන්ත ශාලා පිහිටවමින් නිෂ්පාදන ආර්ථිකය නඟාසිටුවීම. එමගින් විශාල රැකියා උත්පාදනයක් සිදුකෙරිණි. මෝටර් රථ, ස්කූටර් නිෂ්පාදනය හෙලිකොප්ටර් පෞද්ගලික අංශය යටතේ නිෂ්පාදනය, තුළින් මෙරට ආර්ථිකය නඟා සිටවීය. එපමණක් ද නොව ණය නැති අයවැයක් ඉදිරිපත් කරමින් ජනතා සුබසාධනයට මුල්තැන දුන්නේ ශ්‍රී ලංකා නිදහස් පක්ෂ ආණ්ඩුව පමණි.
1962 බණ්ඩාරනායක මැතිනියගේ ආණ්ඩුව කුමන්ත්‍රණයකින් පෙරළා දැමීම. 1965දී පක්ෂයේ අභ්‍යන්තර කුමන්ත්‍රණයක් ඇති කොට පක්ෂ නායකයින් කණ්ඩායමක් වරදාන වරප්‍රසාද නිසා පක්ෂයෙන් ඉවත් කරවීම, 1970 ආණ්ඩුවේ වමේ පක්ෂ හා ප්‍රගතිශීලී මන්ත්‍රීවරුන් ඉවත් කර ගැනීම.
1959 අප පක්ෂ නිර්මාතෘවරයා ඝාතනය කිරීමේ සිට වර්තමානය දක්වා පක්ෂයේ අභ්‍යන්තර කුමන්ත්‍රණ පාවාදීම් වෙනත් ගැටලු අප අධ්‍යයනය කළ යුතුය. ඒ මන්දයත් පක්ෂයේ ඉදිරි මඟ සාක්ෂාත් කිරීම සඳහාය. ශ්‍රී ලංකා නාමය ලෝකය හමුවේ රැඳවීමෙහිලා පුරෝගාමිත්වය දැරුවේ ශ්‍රී ලංකා නිදහස් පක්ෂයයි. පෙර ශ්‍රී ලංකාව ලිප්ටන්ගේ තේ වත්ත නමින් හැඳින් වූ අතර පසුකලෙක ලෝකයා හැඳින්වූයේ ලෝකයේ ප්‍රථම අග්‍රාමාත්‍යවරිය බිහි වූ රට නමිනි. ශ්‍රී ලංකා නිදහස් පක්ෂය වාමවාදී, දේශප්‍රේමී, ජාතිකවාදී ව්‍යාපාර සමඟ එකතු විය. 1956 සිටම වර්තමානය දක්වාම ශ්‍රී ලංකා නිදහස් පක්ෂය මෙරට අධිරාජ්‍ය විරෝධී ජාතිකවාදී බලවේග සමඟින් ගමන් කිරීම සිදු කළේය.
දේශීය අමුද්‍රව්‍ය යොදා විදේශවලට යැවූ අබලි ද්‍රව්‍ය වෙනුවට කර්මාන්ත යුගය ගොඩනැඟීමක් දේශීය ස්වයංපෝෂිත, කෘෂිකාර්මික ව්‍යාපාර ආරම්භ කිරීමත් මේ රටේ ජාතික ආර්ථික වැඩසටහනේ සුවිශේෂී ස්ථානයකි. මෙම අතිවිශිෂ්ට ජයග්‍රහණයන් ඛේදවාචකයට පත් වන්නේ කවදාද? 1977 ජේ.ආර්. ජයවර්ධන යුගය, ප්‍රේමදාස යුගය අපි නැවත අවලෝකනය කරන්නේ ශ්‍රී ලාංකික ඉතිහාසයේ ඉතාම වේදනාකාරී විලෝපන ඛේදවාචකයේ යුගයක් වශයෙනි.
අද බොහෝ දෙනෙකුට අමතක වී ඇති 1978 ආණ්ඩුක්‍රම ව්‍යවස්ථාව සමඟ ඇතිවුණු ඛේදවාචකයන් මූලික වශයෙන් මෙසේ පෙළගැසීය. පක්ෂයේ නායිකාව ඇතුළු නායකයින් රැසක් බලහත්කාරයෙන් පාර්ලිමේන්තුවෙන් පිටමං කර ඔවුන්ගේ ප්‍රජා අයිතිවාසිකම් අහිමි කිරීම. 1980 මහ වැඩවර්ජනයෙන් ලක්ෂයකට ආසන්න ශ්‍රමිකයින් රැයකින් දොට්ට දමා දිනක වැටුප රු. 2.50 කින් වැඩිවීම ප්රතික්ෂේප කර පිළිකුල් කර යටපත් කර දැමීම. 1983 කළුජූලිය සමඟ දෙමළ ජනතාව දහස් ගණන් මරා අවතැන් කොට පලායෑමට සලස්වා සරණාගතයන් ලෙස ලොවපුරා ඩයස්පෝරාවක් නිර්මාණය කිරීමට පදනම සකස් කළේය. කළුජූලියට සමගාමීව ඇති කළ මර්දනය සමඟ සම සමාජ, කොමියුනිස්ට් හා ජනතා විමුක්ති පෙරමුණ තහනම් කොට දේශපාලන පාතාල ලෝකයට රට යොමුකළේ මේ යුගයේය.
පළිගැනීම් සහ ගිනි තැබීම්
අප පක්ෂයේ නායක නායිකාවන් රැසක් බන්ධනාගාරගත කරන ලදි. අපේ අරමුණු සියල්ල 70 78 ආරම්භ කළ සියලු බර කර්මාන්ත ව්‍යාපාර සියල්ල කුණු කොල්ලයට විකුණා ගජ මිතුරන්ට විකුණා දමා දහස් ගණන් රැකියාවලින් පන්නා දැමීය. දේශපාලන පක්ෂ සමඟ පුවත්පත් තහනම් කළේ මේ අවධියේය. සාම සාධක හමුදාව නමින් ඉන්දියානු හමුදාව මෙරටට කැඳවන ලදි. රටේ ආර්ථිකය සමඟ උතුර දකුණ සියල්ල රට පුරාම කැරලිකාර තත්ත්වයක් හා ප්‍රචණ්ඩකාරී තත්ත්වයක් ආරම්භ කළේය. කොල්ලකාරී ජනමත විචාරණයක් 1983 ආරම්භ කර උතුර ගිනි ලෑවේය. සංවර්ධන සභා ඡන්දයට දකුණින් මැරයින් ලවා කොල්ලකෑම සිදුකළේ සහ යාපනය පුස්තකාලය ගිනි තැබීම සිදුකළේ මෙම අවස්ථාවේදීය. මාධ්‍යවේදීන් අතිවිශාල ප්‍රමාණයක් ඝාතනය කොට අභිරහස් ලෙස මරාදැමීම ආරම්භ වන්නේ ජේ.ආර්. ජයවර්ධන යුගයේ දීය. මහචාර්ය එදිරිවීර සරච්චන්ද්‍රයන්ට පහරදී සාහිත්‍ය කලා මංකොල්ලය හෙවත් “සාහිත්‍ය කන්න ද යැයි” රාජ්‍ය නායකයා කියන තත්ත්වයට රට අර්බුදයට පත්කළේ මේ අවස්ථාවේදීය. 88-99 ප්‍රේමදාස යුගයේ දී 60000කට වැඩි තරුණ පරම්පරාවක් ඝාතනය කළ යුගය බොහෝ දෙනාට අමතක විය. රිචඩ් සොයිසා ඇතුළු මාධ්‍යවේදීන් 30ට ආසන්න පිරිසක් ඝාතනය කළේ ප්‍රේමදාස යුගයේදීය. ශිෂ්‍යයින් හා භික්ෂූන් වහන්සේලා අමු අමුවේ මරා ටයර් සෑ යුගය සියලු දෙනාට අමතක වී තිබේ. භීෂණය, දූෂණය, මර්දනය විපක්ෂය මර්දනය කිරීමට ක්‍රියාත්මක වූයේ එහෙමය.
මහාචාර්ය රෝහණ ලක්ෂ්මන් පියදාස
ජ්‍යෙෂ්ඨ උප සභාපති
ශ්‍රී ලංකා නිදහස් පක්ෂය
