ශ්‍රී ලංකාවේ සංචාරක කර්මාන්තය ප්‍රවර්ධනය කිරීමේ මෙහෙවර තවදුරටත් ඉදිරියට ගෙන යමින් ‘The Colours of Jaffna’ නමින් සුවිශේෂී ප්‍රවර්ධන වැඩසටහනක් ආරම්භ කිරීමට ශ්‍රී ලංකාවේ ජාතික ගුවන් සේවය මෙන්ම ජාත්‍යන්තර one world සන්ධානයේ සාමාජිකයකු වන ශ්‍රීලන්කන් ගුවන් සේවය පියවර ගෙන තිබේ. ශ්‍රී ලංකාවේ උතුරු පළාතට ආවේණික වූ සූප ශාස්ත්‍ර හා ගෘහ නිර්මාණ ලක්ෂණ ඇතුළුව සංස්කෘතික හා සමාජයීය සුවිශේෂීත්වය ලොවට පෙන්වා දෙමින් ඒ ලක්ෂණ සියැසින් දැකබලා ගැනීමට පැමිණෙන ලෙසට සංචාරකයන්ට ආරාධනා කිරීම මේ වැඩසටහනේ අරමුණයි.
යාපනය නගරය සංස්කෘතික ආශ්චර්යයන්ගෙන් වර්ණවත් කරමින් දින 20ත් 25ත් අතර කාලයක් පුරා පැවැත්වෙන ජාතික උත්සවයක් වන ඓතිහාසික නල්ලූර් කන්දසාමි කෝවිලේ වාර්ෂික උත්සවය මේ වනවිට ආරම්භ වී ඇති අතර එය මූලික කර ගනිමින් මේ ප්‍රවර්ධන වැඩසටහන ක්‍රියාවට නංවා තිබේ.
මෙහි පළමු අදියර වශයෙන්, යාපනය ප්‍රදේශයට ආවේණික වූ සුවිශේෂී ලක්ෂණ විදහා පෙන්වන වීඩියෝවක් එළි දක්වන ලද අතර, ඉදිරියේ දී යාපනයේ සංචාරක ආකර්ෂණය දිනාගත් ස්ථාන පිළිබඳව දැනුම හා අවබෝධය පුළුල් කිරීමට තවත් වැඩසටහන් මාලාවක් සහ ප්‍රශ්න විචාරාත්මක වැඩසටහනක් ක්‍රියාවට නැංවෙයි.
මේ ප්‍රධාන ප්‍රවර්ධන වැඩසටහනට සමගාමීව, ශ්‍රීලන්කන් ගුවන් සේවයේ සංචාරක සේවා අංශය වන SriLankan Holidays විසින් Jetwing Hotels සමඟ එක්වී, යාපනය ප්‍රදේශයේ සුවිශේෂී බව වඩාත් පහසුවෙන් අත්විඳීමට හැකි වන ආකාරයේ හෝටල් පැකේජ් කීපයක් ද හඳුන්වා දී තිබේ. ඉදිරියේ දී යාපනයේ සුවිශේෂීත්වය තම රසික රසිකාවියන්ට පෙන්වාදීම සඳහා නිර්මාණකරුවන් සහ සමාජ මාධ්‍ය තරු රැසක් ද ශ්‍රීලන්කන් ගුවන් සේවය සමඟ අත්වැල් බැඳගනීමට නියමිතය.
ශ්‍රීලන්කන් ගුවන් සේවය වැඩිම ගුවන් ගමන්වාර සංඛ්‍යාවක් ක්‍රියාත්මක කරන රට වන ඉන්දියාව ඇතුළුව, ශ්‍රීලන්කන් ජාලයට අයත් සියලුම රටවල ‘The Colours of Jaffna’ ප්‍රවර්ධන වැඩසටහන ක්‍රියාත්මක කෙරේ. මේ වනවිට ශ්‍රීලන්කන් ගුවන් සේවය ඉන්දියාවේ නගර 9ක් වෙත සතියකට ගුවන් ගමන් වාර 80කට අධික සංඛ්‍යාවක් ක්‍රියාත්මක කරයි.
මීට අමතරව ශ්‍රී ලංකාවේ මේ වනවිට පැවැත්වෙන ආසියානු කුසලාන ක්‍රිකට් තරගාවලිය ඉලක්ක කර ගනිමින් ශ්‍රීලන්කන් ගුවන් සේවය තවත් ප්‍රවර්ධන වැඩසටහන් පෙළක් ක්‍රියාවට නංවා තිබේ.
මේ උත්සව සියල්ල, ශ්‍රී ලංකාව වෙත පැමිණෙන සංචාරකයන්ට විවිධත්වයෙන් අනූන, කිසිදා අමතක නොවන අත්දැකීම් පෙළක් හිමි කර ගැනීමට අවස්ථාව උදාකර දෙන බවද ශ්‍රීලන්කන් ගුවන් සමාගම පවසයි.
