මරණය ඉදිරියේ ගී ගැයූ විප්ලවකාරී ගායකයා ලෙස ඉතිහාසයට එක්වූ චිලී දේශයේ ප්‍රකට සංගීතඥ වික්ටර් හාරාගේ ඝාතනය සම්බන්ධයෙන් වසර 50කට පසු විශ්‍රාමික හමුදා නායකයන් ඇතුළු සෙබළුන් 7 දෙනකුට වසර 25ක් දක්වා කාලසීමාවක සිරදඬුවම් නියම කර ඇතැයි විදෙස් මාධ්‍ය වාර්තා කළේය. ඝාතනයට ලක් වෙද්දී වික්ටර් හාරා 40 හැවිරිදි වියෙහි පසු විය.
මේ ජනතා හිතවාදී ගායකයා වද හිංසාවට ලක් කර ඝාතනය කරනු ලැබුවේ 1973 වසරේදී වන අතර, ඒ වන විට අමෙරිකාවේ සීඅයිඒ සංවිධානයේ කුමන්ත්‍රණයකින් චිලී දේශයේ නායකත්වයට පත් වූ ඔගස්ටෝ පිනෝෂේගේ රජයේ හමුදා කණ්ඩායමක් ඊට මුල් විය.
මේ වන විට හමුදා සේවයෙන් විශ්‍රාම ලබා අවුරුදු 73 සහ අවුරුදු 85 අතර වයස් සීමාවේ පසුවන එම ඝාතකයන් 7 දෙනා අපරාධ සම්බන්ධ චිලී ශ්‍රේෂ්ඨාධිකරණයේ නියෝගය මත සිය දඬුවම් කාලයට මුහුණ දීමට බන්ධනාගාරයට වාර්තා කළ යුතුව ඇතැයි විදෙස් මාධ්‍ය වැඩිදුරටත් සඳහන් කළේය.
