ශ්‍රී ජයවර්ධනපුර විශ්වවිද්‍යාලයේ මානව ශාස්ත්‍ර හා සමාජීය විද්‍යා පීඨය මඟින් සංවිධානය කරනු ලබන විද්‍යෝදය සාහිත්‍ය සම්මාන ප්‍රදානය, සැප්තැම්බර් 01 වැනිදා එනම්, අද දින සවස 3.00ට විශ්වවිද්‍යාලයීය ශ්‍රී සුමංගල සභාසදයේදී පැවැත්වේ. 
සාහිත්‍යකරණය ඇගයීමෙහිලා වර්තමානය වන විට බොහෝ ආයතන මෙන්ම විවිධ සංගම් ඔස්සේ වැඩසටහන් රාශියක් ක්‍රියාත්මකව පවතී. එබඳු සම්මාන ප්‍රදානෝත්සව අතුරින් මෙරට විශ්වවිද්‍යාලයක් මඟින් පවත්වන ජාතික මට්ටමේ ප්‍රථම සහ එකම සාහිත්‍ය සම්මාන උලෙළ ලෙස විද්‍යෝදය සාහිත්‍ය සම්මාන ප්‍රදානය හඳුන්වාදිය හැකියි.
එසේම මෙම සම්මාන ප්‍රදානය සඳහා ඒ ඒ තරග අංශ යටතේ ඉදිරිපත් කර ඇති කෘතිවල විනිශ්චය කටයුතු අප විශ්වවිද්‍යාලයීය මානව ශාස්ත්‍ර හා සමාජීය විද්‍යා පීඨයේ ආචාර්ය මණ්ඩලය විසින් සිදු කරනු ලැබීම ද මෙහිලා විශේෂ කොට දැක්විය හැකිය. මෙවැනි සුවිශේෂත්වයකින් යුක්ත විද්‍යෝදය සාහිත්‍ය සම්මාන ප්‍රදානෝත්සවය දීර්ඝ ඉතිහාසයකට උරුමකම් කියන්නකි. එවකට සිංහල හා ජනසන්නිවේදන අධ්‍යයනාංශයේ හිටපු සම්මානිත මහාචාර්ය සුනිල් ආරියරත්න මහතාගේ සංකල්පයකට අනුව ක්‍රියාත්මක වූ මෙම සම්මාන ප්‍රදානෝත්සවය, වර්තමානය වන විට මානව ශාස්ත්‍ර හා සාමාජීය විද්‍යා පීඨයේ පීඨාධිපති මහාචාර්ය ශිරාන්ත හීංකෙන්ද මහතාගේ මාර්ගෝපදේශකත්වය යටතේ පීඨ ප්‍රකාශන කමිටුව මඟින් නවමු මුහුණුවරකින් පැවැත්වීම සතුටට කරුණකි.
සත්‍ය වශයෙන්ම සාහිත්‍යකරණයෙහි නියැළෙන්නා වූ නිර්මාණකරුවන් සතුව පවතින නිර්මාණශීලී කුසලතාව අතිශයින් දුර්ලභ වූවකි. එයිනුත් උසස් ගණයේ නිර්මාණ සිදු කිරීම වඩා දුර්ලභ කර්තව්‍යයක් වශයෙන් දැක්විය හැකි ය. ඇතැම් නිර්මාණකරුවන් සිය දිවියම කැප කරනුයේ සාහිත්‍ය කාර්යයට වන අතර එකී කැපවීම් සමස්තයෙහි අවසන් ප්‍රතිඵලය වන්නේ පාඨක, විචාරක ප්‍රජාවෙහි රසවින්දනය සඳහා උසස් ගණයේ නිර්මාණයක් හිමි වීමයි. ඒ අනුව නන්විධ කැප කිරීම්, බාධක, දිරි ගැන්වීම් සමඟ ඝට්ටනය වෙමින් සාහිත්‍යයේ උන්නතිය වෙනුවෙන් කටයුතු කරන්නා වූ සාහිත්‍යධරයන් සඳහා විදග්ධ ඇගයීමක් සිදු කිරීමේ අභිලාෂයෙන් ක්‍රියාත්මක වන විද්‍යෝදය සාහිත්‍ය සම්මාන ප්‍රදානය, ප්‍රවීණ සහ ආධුනික සාහිත්‍යකරුවන් වෙත පිදෙන විධිමත් මෙන්ම ප්‍රශස්ත ගණයේ ඇගයීමක් වශයෙන් හඳුන්වා දිය හැකිය.
ආරම්භක අවධියේදී විද්‍යෝදය සාහිත්‍ය සම්මාන ප්‍රදානය යටතේ නවකතා, කෙටිකතා, ගේය කාව්‍ය, පද්‍ය කාව්‍ය සහ තීරු ලිපි යන ක්ෂේත්‍ර කිහිපයකට පමණක් සීමා වී පැවතිය ද, වර්තමානය වන විට මානව ශාස්ත්‍ර හා සාමාජීය විද්‍යා විෂයවලට අදාළව පළ වූ ශාස්ත්‍රීය කෘතියට ද සම්මාන පිරි නැමීම සිදු කරයි.
ඒ අනුව 2022 වසරේදී ප්‍රකාශයට පත් කරනු ලැබූ සිය නිර්මාණ වෙනුවෙන් යථෝක්ත තරග අංශ ඔස්සේ අද දින සම්මානයට පාත්‍ර වන සාහිත්‍යධරයන්හට සුබ පැතුම් එක්කරමින් ඔවුන්ගේ ඉදිරි නිර්මාණ කටයුතු සර්ව ප්‍රකාරයෙන් ම සාර්ථක වේවා’යි ප්‍රාර්ථනා කරමි. එමෙන්ම මෙවැනි කාල වකවානුවක නන්විධ දුෂ්කරතා හමුවේ ජාතික මට්ටමේ සාහිත්‍ය සම්මාන උලෙළක් පැවැත්වීම වෙනුවෙන් මානව ශාස්ත්‍ර හා සමාජීය විද්‍යා පීඨයේ පීඨාධිපති මහාචාර්ය ශිරාන්ත හීංකෙන්ද මහතා, පීඨ ප්‍රකාශන කමිටුවේ සභාපති, මහාචාර්ය පූජ්‍ය පනහඩුවේ යසස්සි ස්වාමීන් වහන්සේ ඇතුළු මෙම සද්කාර්යය වෙනුවෙන් ඇප කැප වී කටයුතු කළ විනිශ්චය මණ්ඩලය සහ සමස්ත අධ්‍යයන අනධ්‍යයන කාර්ය මණ්ඩලයට ශ්‍රී ජයවර්ධනපුර විශ්වවිද්‍යාලයෙහි උපකුලපති වශයෙන් ප්‍රණාමය පුද කර සිටිමි.
