නිසි ප්‍රමිතියෙන් තොර බාල ඖෂධ සහ එන්නත් භාවිතය නිසා සිදු වූ මරණ සහ රෝගීන්ට සංකුලතා ඇති වීම සම්බන්ධයෙන් විනිවිදභාවයෙන් යුතු ස්වාධීන පරීක්ෂණයක් පැවැත්වීමට සෞඛ්‍ය සේවා අධ්‍යක්ෂ ජනරාල්වරයාගේ සභාපතිත්වයෙන් යුතු විශේෂඥ පංච පුද්ගල කමිටුවක් පත් කරන ලෙස ඉල්ලා සමඟි ජන බලවේගයේ පාර්ලිමේන්තු මන්ත්‍රීවරුන් වන හර්ෂණ රාජකරුණා සහ වෛද්‍ය කාවින්ද ජයවර්ධන විසින් මූලික අයිතිවාසිකම් පෙත්සමක් ශ්‍රේෂ්ඨාධිකරණයට ඊයේ (31) ගොනු කරනු ලැබීය.
ජාතික ඖෂධ නියාමන අධිකාරිය, එහි සාමාජිකයන්, සෞඛ්‍ය සේවා අධ්‍යක්ෂ ජෙනරාල්වරයා, සෞඛ්‍ය ඇමැතිවරයා ඇතුළු 19 දෙනෙක් මෙහි වගඋත්තරකරුවන් ලෙස නම් කරනු ලැබ සිටිති.
පෙත්සම්කරුවන් පෙන්නා දෙන්නේ මෙරට ඖෂධ ආනයනය කිරීම ලියාපදිංචිය, ලියාපදිංචිය අවලංගු කිරීම, ඖෂධ ගබඩා කිරීම, ඖෂධ බෙදාහැරීම, මිල නියම කිරීම, ඖෂධවල තත්ත්වය පරික්ෂා කිරීම, ඖෂධ සහ උපකරණ සම්බන්ධයෙන් දැන්වීම් පළ කිරීම සහ උපකරණ නියාමනය ඇතුළු කරුණුවල වගකීම ජාතික ඖෂධ නියාමන අධිකාරිය සතු වන බවයි. එකී ඖෂධ සහ එන්නත් භාවිතය නිසා මරණ කීපයක් සිදු වූ අතර, රෝගීන්ට සංකුලතා ඇති වූ බවට සිද්ධීන් දිවයිනේ ප්‍රදේශ ගණනාවකින් වාර්තා වූ බවද පෙත්සම මඟින් පෙන්වා දී ඇත.
රෝගීන් සඳහා භාවිත කරනු ලබන ප්‍රොපොෆොල් නම් නිර්වින්දන ඖෂධය භාවිත කිරීමෙන් එක් මරණයක් සිදු වූයේ යැයි වාර්තා වූ අතර, ඒ එන්නත භාවිත කළ රෝගීන්ට සංකුලතා ඇති වූ අවස්ථා කිහිපයක් පසුගිය කාලයේ වාර්තා වූ බව පෙත්සම්කරුවෝ පෙන්වා දෙති. එසේම කොඳු ඇට පෙළෙහි සැත්කම් සඳහා භාවිත කරනු ලබන නිර්වින්දන ඖෂධයකින්ද විවිධ සංකුලතා ඇති වූ බවට චෝදනා එල්ල වූ බවත්, අක්ෂි රෝගීන් සඳහා භාවිත කළ ඖෂධයක් හේතුවෙන් රෝගීන් ගණනාවකගේ ඇස් පෙනීම අහිමි වී ගිය බවටද සිද්ධීන් වාර්තා වූ බවත් පෙත්සමේ සඳහන් වේ. මේ ඖෂධ සහ එන්නත් බහුතරය ඖෂධ නියාමන අධිකාරියේ නියමිත ක්‍රියා පටිපාටියෙන් පරිබාහිරව ආනයනය කර ඇති බවද ඇතැම් ඖෂධ ලියාපදිංචි නොකළ ඒවා බවට අනාවරණය වී ඇති බවද පෙත්සම්කරුවන් පෙන්වා දී ඇත. මෙලෙස බාල ඖෂධ ආනයනය සහ භාවිත කිරීමට මෙරට ආණ්ඩුක්‍රම ව්‍යවස්ථාවේ 11 සහ 12 (1) යන වගන්ති මඟින් සහතික කර ඇති මෙරට ජනතාවගේ මූලික අයිතිවාසිකම් උල්ලංඝනය කර ඇති බවට ප්‍රකාශ කරන දෙස පෙත්සම මඟින් ඉල්ලා තිබේ.
අදාළ ඖෂධ සහ එන්නත් භාවිතය හේතුවෙන් සිදු වූ මරණ සහ රෝගීන්ට ඇති වූ සංකුලතා සම්බන්ධයෙන් විධිමත් පරීක්ෂණයක් පැවැත්වීමට සෞඛ්‍ය සේවා අධ්‍යක්ෂ ජනරාල්වරයාගේ සභාපතිත්වයෙන් සහ විශේෂඥයන්ගෙන් සමන්විත පංච පුද්ගල කමිටුවක් පත් කරන ලෙස නියෝග කරන්නැයි පෙත්සම්කරුවෝ අධිකරණය ඉල්ලා සිටිති. ඒ කමිටුවේ විමර්ශන වාර්තාව අධිකරණයට ඉදිරිපත් කරන ලෙසද පෙත්සම්කරුවෝ පෙත්සම මගින් ඉල්ලා ඇත. නීතිඥ තිබූ කුරුප්පුආරච්චි මහත්මිය මඟින් මේ පෙත්සම ගොනු කර ඇත.
