රටකජු මුවාවෙන් සිදු කළ ගංජා වගාවක් පොලිසියට හසුවෙයි

රටකජු වගා කරන මුවාවෙන් කොස්ලන්ද අලුත්වෙල රක්ෂිතයේ හොර රහසේ වගා කර තිබූ ගංජා වගාවක් ඊයේ (28) වටලා ගංජා පැල 1192ක් ගිනිතබා විනාශ කර නඩු භාණ්ඩ වශයෙන් ගංජා පැල 10ක් අත්අඩංගුවට ගත් බව කොස්ලන්ද පොලිසිය පවසයි .

මෙම වැටලීම සිදුකරන විටත් සැකකරුවන් ගංජා වගාව අතහැර දමා පලාගොස් සිටි බවද පොලිසිය සඳහන් කරයි.

කොස්ලන්ද පොලිසියේ නිලධාරීන් ලැබුණු තොරතුරක් මත අලුත්වෙල රක්ෂිතයේ සැතපුම් 6ක් පමණ දුර පාගමනින් ගොස් මෙම වැටලීම සිදුකර ඇති අතර , ගංජා වගාවේ ගංජා පැල අඩි 1 1/2ක් පමණ උසට වැවී තිබිණැයි පොලිසිය සදහන් කළේය .

කොස්ලන්ද පොලිසිය විසින් සිද්ධිය සම්බන්ධයෙන් වැඩිදුර විමර්ශන සිදු කරයි.