මහනුවර ඇසළ මංගල්‍යයේ ප්‍රථම රන්දෝලි පෙරහර අද (26) වීදි සංචාරය කරයි. ශ්‍රී දළදා මාලිගාව අබියසින් දකුණු දිශාභිමුඛව රාත්‍රී 7.26ට පිටත් වන පෙරහර දළදා වීදිය, ඩී.එස්. සේනානායක වීදිය, පන්සල පාර, දේව වීදිය, කොළඹ වීදිය, ඊ.එල්. සේනානායක වීදිය, හරස් වීදියේ ගමන් කර යළි ඩී.එස්. සේනානායක වීදිය ඔස්සේ ගමන් ගෙන රජ වීදියෙන් ඉහළට විත් ගෙවැදීමට නියමිතය
දෙවැනි රන්දෝලි පෙරහර හෙට (27) දළදා මාලිගාව ඉදිරිපිටින් රාත්‍රී 6.46ට පිටත්ව දළදා වීදිය, ඩී.එස්. සේනානායක වීදිය, කොළඹ වීදිය, යටිනුවර වීදිය ඔස්සේ ගමන් ගෙන රජ වීදියෙන් ඉහළට විත් ගෙවැදීමට නියමිත බව දියවඩන නිලමේ ප්‍රදීප් නිලංග දෑල මහතා පවසයි. රන්දෝලි පෙරහර අද (26) සිට පුරා දින පහක් වීදි සංචාරය කරන අතර, අවසන් රන්දෝලි මහ පෙරහර දෙකේදී සධාතුක කරඬුව වැඩම කරන මංගල හස්තිරාජයා පාවඩ මතින් උඩුවියන් සහිතව ගමන් කිරිම විශේෂත්වයකි.
අසේල කුරුළුවංශ
දළදා සමිඳුන්ට මී පැණි පූජාව අද
දඹානේ ආදිවාසි ජනතාව ශ්‍රී දළදා සමිඳුන් උදෙසා වාර්ෂිකව සිදු කරන මී පැණි පූජාව අද (26) දළදා මාලිගාවේ දී සිදු කෙරෙයි. වැදි නායක ඌරුවරිගේ වන්නියලෑ ඇත්තෝ තන් ප්‍රමුඛ ආදිවාසීන් 30 දෙනකුගෙන් පමණ සමන්විත කණ්ඩායමක් මී පැණි පූජාව සඳහා පැමිණෙනු ඇත. දඹාන ආශ්‍රිත වනයෙන් සොයාගන්නා මී පැණි දළදා වහන්සේ වෙත පූජා කිරීම දශක ගණනාවක් තිස්සේ ආදිවාසීන් විසින් සිදු කරනු ලබන්නේ ප්‍රථම රන්දෝලි පෙරහර වීදි සංචාරය කරන දිනයේදීය. මේ මී පැණි දළදා වහන්සේ විෂයයෙහි දෛනිකව සිදු කෙරෙන පූජා කටයුතුවලදී භාවිත කෙරෙන අතර, මී පැණි පූජාවෙන් පසු වැදි නායක වන්නියලෑ ඇත්තන් ඇතුළු ආදිවාසි කණ්ඩායම යළි දඹාන වෙත ගමන් ගන්නේ ප්‍රථම රන්දෝලි පෙරහර නැරඹීමෙන් අනතුරුවය.
අසේල කුරුළුවංශ
