318
මහියංගණය රෝහලට යාබද ඉඩමේ අතහැර දමා ගොස් තිබූ කුඩා බිලිඳියක පෙරේදා (16) දින හමුවූ බව මහියංගණය පොලිසිය පැවසීය. එම රෝහලට යාබද ඉඩමේ හිමිකරුට තම ගෙවත්තේ කුඩා දරුවකු හඬන හඬක් ඇසී සොයා බැලීමේදී රෙදි කඩකින් ඔතා වත්තේ දමාගොස් සිටි මෙම බිලිඳිය හමුවී ඇති අතර ඔහු විසින් කඩිනමින් මෙම බිලිඳිය රෝහලට ඇතුළත් කර ඒ පිළිබඳව පොලිසිය දැනුවත් කළ බව පොලිසිය පැවසීය.
දිනක් හෝ දෙකක් පමණ වයසැති මෙම කුඩා බිලිඳිය මේ වන විට මහියංගණය රෝහලේ ළදරු ඒකකයේ සුවෙන් පසුවන බවත් පොලිසිය කීය.
ඒ අනුව බදුල්ල කොට්ඨාසය භාර ජ්‍යෙෂ්ඨ පොලිස් අධිකාරි සුජිත් වෙදමුල්ල මහතාගේ උපදෙස් මත මෙම දරුවාගේ මවුපියන් සොයා මේ වන විටත් පුළුල් විමර්ශනයක් ආරම්භ කර ඇති බව මහියංගණය වැඩ බලන පොලිස් ස්ථානාධිපති ප්‍රධාන පොලිස් පරීක්ෂක දෙහිගම මහතා පැවැසීය.
