බදු වැඩි කිරීමට එරෙහිව කෙන්යාවේ විපක්ෂයේ විරෝධතා ප්‍රචණ්ඩකාරී මුහුණුවරකට හැරීම නිසා නයිරෝබි අගනුවර සහ මොම්බසා නුවර පාසල් වසා දැමීමට රජය පියවර ගෙන ඇතැයි විදෙස් මාධ්‍ය වාර්තා කළේය.
පසුගිය මාසයේදී කෙන්යාවේ ජනාධිපති විලියම් රූටෝගේ රජය බදු වැඩි කිරීම් හඳුන්වා දීමෙන් පසු ජීවන වියදම ඉහළ යෑමට එරෙහිව එරට විපක්ෂය විරෝධතා රැලි ගණනාවක් සංවිධාන කර තිබූ අතර, පොලිසිය මැදිහත් වීම නිසා ඉන් වැඩි ප්‍රමාණයක් පසුව ප්‍රචණ්ඩකාරී ස්වරූපයකට හැරී තිබිණි.
විරෝධතාකරුවන්ට කඳුළු ගෑස් ප්‍රහාර විශාල වශයෙන් එල්ල වීමෙන් පසු පොලිස් නිලධාරීන්ට පහර දීම් සිදුවී ඇති අතර, ඊට ප්‍රතිචාර දක්වමින් පොලිසිය කළ වෙඩි තැබීම්වලින් විරෝධතාකරුවන් දස දෙනකු ජීවිතක්ෂයට පත් වී ඇතැයි වාර්තා වේ. පොලිසිය බලය අධික ලෙස භාවිත කිරීම සම්බන්ධව මානව හිමිකම් සංවිධාන රජය දැඩි විවේචනයට ලක් කර ඇත. නයිරෝබි නුවර විරෝධතාකරුවන්ට එල්ල කළ කඳුළු ගෑස් ප්‍රහාරයක් ඒ ආසන්නයේ පාසලකට වැදීමෙන් සිසුන් 50 දෙනකු රෝහල්ගත කිරීමට ද සිදු වී තිබේ. විරෝධතා ජාතික ආරක්ෂාවට තර්ජනයක් බව කියමින් රට පුරා කැරලි මර්දන නිලධාරීන් යෙදවීමට කෙන්යාවේ පොලිස් ප්‍රධානියා පියවර ගැනීමත් සමඟ තත්ත්වය වඩාත් බරපතළ වී ඇතැයි ද වාර්තා වේ.
