රට බංකොලොත්භාවයට ලක් වීමට හේතුව සොයා බැලීමට, කථානායකවරයා පත් කළ විශේෂ කමිටුවෙන් විපක්ෂය ඉවත් වී වෙනම කමිටුවක් පත්කර ගැනීමට තීරණය කළ බව පාර්ලිමේන්තු මන්ත්‍රී සමඟි ජන බලවේගයේ ජාතික සංවිධායක තිස්ස අත්තනායක මහතා සඳහන් කරයි.
විපක්ෂය මඟින් ඒ සඳහා පත් කරන කමිටුව පිළිබඳ ජනතාව ඉදිරියේ දැනුම්වත් කරන බවත් ඒ සඳහා දේශීය හෝ විදේශීය ඕනෑම පුද්ගලයකුට ලිඛිතව හෝ වාචිකව කරුණු ඉදිරිපත් කිරීමට හැකි ක්‍රමවේදයක් සකස් කරන බව ද මන්ත්‍රීවරයා කියා සිටියේය.
විපක්ෂ නායක කාර්යාලයේ පෙරේදා (11) පැවති මාධ්‍ය හමුවට එක්වෙමින් මන්ත්‍රීවරයා මේ බව සඳහන් කළේය.
සමඟි ජන බලවේගයේ ජාතික සංවිධායක පාර්ලිමේන්තු මන්ත්‍රී තිස්ස අත්තනායක මහතා වැඩිදුරටත් අදහස් දක්වමින් මෙසේ පැවසීය.
සමඟි ජන බලවේගය සහ විපක්ෂයේ මන්ත්‍රීවරු ගණනාවක් පසුගිය කාලසීමාව තුළ රට බංකොලොත් වීම, ආර්ථික වශයෙන් කඩා වැටීම පිළිබඳව සොයා බැලීමට විශේෂ තේරීම් කාරක සභාවක් පත් කරන්න කර තිබූ ඉල්ලීම අනුව පාර්ලිමේන්තු කාරක සභාවක් පත් කිරීම සඳහා කථානායකවරයා නිවේදනයක් නිකුත් කර තිබුණු බව ද කියා සිටියේය.
විශේෂ තේරීම් කාරක සභාවක් පත් කරන්න කර තිබූ ඉල්ලීම කළේ සමඟි ජන බලවේගය ඇතුළු විපක්ෂයේ මන්ත්‍රීවරු කණ්ඩායම. නමුත් ඒ වෙනුවට කථානායකවරයා ලබාදී තිබුණු ප්‍රතිචාර පිළිබඳව දැඩි කනස්සල්ලෙන් පසුවන බව ද මන්ත්‍රීවරයා සඳහන් කළේය.
රක්ෂණ ශ්‍රියන්ත
