පාර්ලිමේන්තු මන්ත්‍රී දයාසිරි ජයසේකර
පාරම්පරික දේශීය වෛද්‍යවරුන්ගේ හැකියාව හා දක්ෂතාව සොයා බැලීම සම්බන්ධයෙන් පාර්ලිමේන්තුවේ සම්මත කිරීමට යෝජිත නව පනතට තමාගේ විරෝධතාව ප්‍රකාශ කරන බව පාර්ලිමේන්තු මන්ත්‍රී දයාසිරි ජයසේකර මහතා පැවසීය. නව පනත මඟින් මෙරට සිටින පාරම්පරික දේශීය වෛද්‍යවරුන්ට අසාධාරණයක් සිදු වන බවත්, ඔවුන්ගේ හැකියා සොයා බැලීම වෙනුවෙන් පාරම්පරික වෛද්‍යවරුන්ගෙන් සමන්විත වෙනම වෛද්‍ය සභාවක් ස්ථාපිත කළ යුතුව ඇති බවත් හෙතෙම අවධාරණය කළේය. කෙසේ හෝ පාරම්පරික දේශීය වෙදකමට අත තැබීමට තමා සම්පූර්ණයෙන් විරුද්ධ බවද මන්ත්‍රීවරයා ප්‍රකාශ කර සිටියේය.
ඒ මහතා එසේ පැවසුවේ ශ්‍රී ලංකා නිදහස් පක්ෂ මූලස්ථානයේ ඊයේ (12) පැවති මාධ්‍ය හමුවකට එක් වෙමිනි. ආයුර්වේද ලියාපදිංචිය වෙනුවෙන් ස්ථාපිත කර ඇති 1961 දේශීය ආයුර්වේද පනතේ කරුණු 6ක් සංශෝධනය වෙනුවෙන් පාර්ලිමේන්තුවට ඉදිරිපත් කර ඇති නව පනතට විරුද්ධව මෙරට පාරම්පරික දේශීය වෛද්‍යවරුන් රැසක් සමඟ මේ මාධ්‍ය හමුව සංවිධානය කර තිබිණි.
වරලත් ඉංජිනේරු සහ පාරම්පරික වෛද්‍ය හර්ෂ කුමාර සූරියආරච්චි, ශ්‍රී ලංකා ස්වදේශීය වෛද්‍ය සභාවේ ලේකම් සමින්ද හේරත්,
පාරම්පරික වෛද්‍ය නිමල් වර්ණකුලසූරිය මහත්වරුද මෙහිදී අදාළ පනත මඟින් පාරම්පරික වෛද්‍යවරුන්ට අගතියක් වන බව අවධාරණය කරමින් අදහස් දැක්වූහ. ශ්‍රී ලංකා ස්වදේශීය වෛද්‍ය සභාවේ සභාපති මයුර සමරසිංහ සහ පාරම්පරික දේශීය වෛද්‍යවරු රැසක්ද මේ අවස්ථාවට එක්ව සිටියහ.
උදුලා පීරිස්
