ඇෆ්ගනිස්තානයේ දැරිවියන්ට නැවත පාසල් සහ විශ්වවිද්‍යාල අධ්‍යාපනයේ දොරටු විවෘත කරදීමේ අරමුණ ඇතිව එරට විශ්වවිද්‍යාල මහාචාර්යවරු, කාන්තා අයිතිවාසිකම් ක්‍රියාකාරීන් සහ ආගමික පූජකවරු එක්ව ‘ඇෆ්ගනිස්තාන ගැහැනු ළමයින්ගේ අධ්‍යාපනය‘ නමින් ව්‍යාපාරයක් ක්‍රියාත්මක කර ඇතැයි විදෙස් මාධ්‍ය වාර්තා කළේය. මීට වසර කිහිපයකට පෙර එරට බලය අත්කරගත් තලේබාන් සංවිධානය 6 වැනි ශ්‍රේණියේ සිට සියලු ඇෆ්ගන් දැරිවියන්ගේ අධ්‍යාපනය තහනම් කළ අතර. ඔවුන්ගේ පාසල් සහ විශ්වවිද්‍යාල වසා දැමීමට පියවර ගෙන තිබුණේ එය ඉස්ලාමයට පටහැනි බව කියමිනි.
ඇෆ්ගනිස්තානයේ ටෝලෝ නිවුස් පුවත් සේවය සඳහන් කරන්නේ පසුගිය කාලය ඇතුළත එරට සිසුවියන් සඳහා පාසල් හා විශ්වවිද්‍යාල නැවත විවෘත කරන ලෙස කළ ඉල්ලීම් කිසිවකට තලේබාන් රජය පියවරක් නොගැනීම හේතුවෙන් මේ ව්‍යාපාරය ආරම්භ කළ බවය. එමෙන්ම සිය ඉල්ලීම ඉටුවනතුරු ව්‍යාපාරය අඛණ්ඩව පවතිනු ඇතැයි ද එරට විශ්වවිද්‍යාල මහාචාර්යවරු, කාන්තා අයිතිවාසිකම් ක්‍රියාකාරීන් සහ ආගමික පූජකවරු රජයට අනතුරු අඟවා ඇතැයි විදෙස් මාධ්‍ය වැඩිදුරටත් වාර්තා කළේය.
‘මේ ව්‍යාපාරයේ ඉලක්කය වන්නේ හයවැනි ශ්‍රේණියට ඉහළ සිසුන්ගේ සහ රාජ්‍ය හා පෞද්ගලික විශ්වවිද්‍යාලවල ශිෂ්‍ය ශිෂ්‍යාවන්ගේ අයිතිවාසිකම් සහතික කිරීම” යැයි විශ්වවිද්‍යාල කථිකාචාර්යකු විදෙස් මාධ්‍යයට ප්‍රකාශ කර ඇති අතර, දැරිවියන්ගේ අනාගතය අවිනිශ්චිත තත්ත්වයකට ඇද වැටීම වැළැක්වීම සඳහා පියවර ගත යුතුව ඇතැයි ද අවධාරණය කර තිබේ. හයවැනි ශ්‍රේණියෙන් ඉහළ බාලිකා පාසල් දින 650කට වැඩි කාලයක් වසා දමා ඇති අතර, ඒ පිළිබඳ ජාතික වශයෙන් මෙන්ම ජාත්‍යන්තර වශයෙන් ද එල්ල වී ඇති බලපෑම් කිසිවකට තලේබාන් රජය අවනත නොවන බව ද වාර්තා වේ.
