ආචාර්ය රවී බමුණුසිංහ සහ පෑන් ඒෂියා බැංකුවේ සහකාර සාමාන්‍යාධිකාරී නිමල් රත්නායක වැඩමුළුවට සහභාගී වූ පිරිස සමඟ.
පෑන් ඒෂියා බැංකුව සිය කාර්ය මණ්ඩලය බල ගැන්වීම වෙනුවෙන් අඛණ්ඩව පුහුණු වැඩසටහන් ආරම්භ කරන බැංකුවක් ලෙස හඳුන්වා දිය හැකිය. සුළු හා මධ්‍ය පරිමාණ ව්‍යවසායක (SMEs) අංශය වෙත බැංකුකරණ පහසුකම් ලබා දීම කෙරෙහි නිරන්තර අවධානය යොමු කරන පෑන් ඒෂියා බැංකුව, සුළු හා මධ්‍ය පරිමාණ ව්‍යවසායකයින්ගේ අවශ්‍යතා සපුරාලමින්, වර්තමාන ආර්ථික අර්බුදය තුළින් පැනනගින අභියෝග ජය ගැනීම සඳහා ඔවුන්ට උපකාර කිරීමේ අරමුණින් සිය කාර්ය මණ්ඩලය පුහුණු කිරීමට ද නිරන්තරයෙන් කටයුතු කරයි. මෙම ක්‍රියාවලිය අඛණ්ඩව ඉදිරියට ගෙන යමින්, පෑන් ඒෂියා බැංකුව විසින් සිය කාර්ය මණ්ඩලය සවිබල ගැන්වීම වෙනුවෙන්, මෙරට කීර්තිමත් පුහුණුකරුවකු, පර්යේෂකයකු සහ සුළු හා මධ්‍ය පරිමාණ ව්‍යවසාය ක්ෂේත්‍රය පිළිබඳ උපදේශකවරයකු වන ආචාර්ය රවී බමුණුසිංහ මහතාගේ සම්පත් දායකත්වය යටතේ සුළු හා මධ්‍ය පරිමාණ ව්‍යවසාය සංවර්ධන වැඩසටහනක් පවත්වන ලදි. මෙහිදී විශේෂයෙන් වත්මන් ආර්ථික තත්ත්වය හා අභියෝග සහ අනාගත අපේක්ෂාවන් සාක්ෂාත් කර ගැනීම සඳහා අවශ්‍ය කුසලතා පිළිබඳව විශේෂයෙන් අවධානය යොමු කෙරිණි.
ශ්‍රී ජයවර්ධනපුර විශ්වවිද්‍යාලයේ සහ ජයවර්ධනපුර කළමනාකරණ පශ්චාත් උපාධි ආයතනයේ දේශකවරයකු වන ආචාර්ය රවී බමුණුසිංහ මහතා (Ph.D) ව්‍යාපාර පර්යේෂණ සහ උපදේශන ක්ෂේත්‍රයේ දශක තුනක පළපුරුද්ද සහිත විද්වතකු වන අතර, උපාය මාර්ගික මඟ පෙන්වීම සහ සාර්ථක ලෙස සන්නාම ගොඩනැංවීම යන ක්ෂේත්‍ර ආශ්‍රිතව දේශීය, ජාත්‍යන්තර සහ බහුජාතික සමාගම්වලට සේවා සපයන ව්‍යාපාර පර්යේෂණ ආයතන දෙකක් ආරම්භ කිරීම සඳහා ඒ මහතා මූලිකත්වය ගෙන ක්‍රියා කර ඇත.
