ලබන වසරේ සැප්තැම්බර් මාසය වන විට වරාය පිවිසුම් ගුවන් මාර්ගයේ ඉදිකිරීම් කටයුතු අවසන් කිරීමට කටයුතු කරන බව ප්‍රවාහන, මහාමාර්ග හා ජනමාධ්‍ය ඇමැති ආචාර්ය බන්දුල ගුණවර්ධන මහතා පැවසීය. ඒ මහතා මේ බව පැවසුවේ මේ වන විට ව්‍යාපෘතියේ ඉදිකිරීම්වල ප්‍රගතිය සොයා බැලීමට එම පරිශ්‍රයේ නීරීක්ෂණ චාරිකාවකට එක් වෙමිනි.
ආසියානු සංවර්ධන බැංකු ආධාර යටතේ ක්‍රියාත්මක කොළඹ වරාය පිවිසුම් ගුවන් මාර්ග ව්‍යාපෘතිය කි.මී. 5.27ක දිගින් යුතු වේ. මංතීරු 4කින් සමන්විත එහි පළල මී. 25කි. ඉඟුරුකඩේ මංසන්ධියේ සිට ගාලුමුවදොර දක්වා දිවෙන මේ මාර්ගය සම්පූර්ණයෙන්ම කුලුනු මත ඉදි කෙරෙන පාලම් 22ක් මඟින් සම්බන්ධ කෙරෙනු ඇති. ඒ සඳහා ඇස්තමේන්තු කර ඇති ආයෝජනය අමෙරිකානු ඩොලර් මිලියන 360.2කි. ඒ වෙනුවෙන් ආසියානු සංවර්ධන බැංකුව ඩොලර් මිලියන 300ක සහනදායි ණය මුදලක් පිරිනමන අතර, ශ්‍රී ලංකා රජය විසින් ඉතිරි ඩොලර් මිලියන 60.2ක මුදල යෙදවීමට නියමිතයි. චීන සිවිල් ඉංජිනේරු ඉදිකිරීම් සමාගම විසින් එහි ඉදිකිරීම් කටයුතු සිදු කරනු ලැබේ.
එහිදී අදහස් දැක්වූ අමාත්‍යවරයා:
“ශ්‍රී ලංකාවේ ආර්ථික වශයෙන් අතිශය සංවේදි ස්ථානයක් වන කොළඹ වරාය පරිශ්‍රය මෙරට අධිවේගි මාර්ග ජාලය සම්බන්ධ කෙරෙන වරාය පිවිසුම් ගුවන් මාර්ග ව්‍යාපෘතිය මේ වන විට ශ්‍රී ලංකාව තුළ සිදු කරන දැවැන්තම ඉදිකිරීම් ව්යාපෘතියක්. කොවිඩ් වසංගත තත්ත්වය හා ඉන් අනතුරුව මුහුණ දෙන ආර්ථික අභියෝග හමුවේ වුවද මේ ව්‍යාපෘතියේ ඉදිකිරීම් නතර නොකර අඛණ්ඩව සිදු කරගෙන යෑම පිළිබඳව ඉදිකිරීම් භාර සමාගම ඇතුළු සියලු පාර්ශ්ව වෙත අපගේ ස්තුතිය පිරිනමනවා. කෙසේ නමුත් ඇති වී තිබෙන නව තත්ත්වයන් යටතේ විදේශ විනිමය අගයන්හි වෙනස්කම්වලට සාපේක්ෂව මිල ගණන්වල සිදු වී ඇති වෙනස්කම් පිළිබඳව කැබිනට් මණ්ඩලය දැනුවත් කරමින් කැබිනට් පත්‍රිකාවක් මේ වන විටත් ඉදිරිපත් කර තිබෙනවා. ඒ අනුව රටටත්, ඉදිකිරීම් සමාගම් ඇතුළු අනෙකුත් පාර්ශවයන්ටත් අසාධාරණයක් හෝ අගතියක් නොවන පරිදි කටයුතු කිරීමට අප බලාපොරොත්තු වනවා.
“ආර්ථික මර්මස්ථානයක් වශයෙන් සැලකෙන වරාය පරිශ්‍රයේ ඉදිකිරීම්වලට කිසිදු අවහිරයක් නොවන පරිදි විශාල අභියෝග රැසක් මැද සිදු කරන ලද මේ ව්‍යාපෘතිය මේ විට 70%ක් පමණ ඉදිකිරීම් අවසන් කර තිබෙනවා. දැනට අවසන් අදියරේ පවතින ඉතිරි ඉදිකිරීම් කටයුතුද කඩිනමින් අවසන් කර එළඹෙන වසරේ සැප්තැම්බර් මාසය පමණ වන විට මේ ව්‍යාපෘතියේ ප්‍රතිඵල භුක්ති විඳීමේ අවස්ථාව අපේ රටේ ජනතාවට හිමි කර දීමට හැකියාව ලැබෙනු ඇති බවට මා විශ්වාසය පළ කරනවා. ඒ අනුව සංවර්ධිත ශ්‍රී ලංකාවක් උදෙසා වරාය නගර පිවිසුම් ගුවන් මාර්ග ව්‍යාපෘතිය ඉතා ඵලදායි ව්යාපෘතියක් වනු ඇති බව මගේ විශ්වාසයයි.“
චීන සිවිල් ඉදිකිරීම් ඉංජිනේරු සමාගමේ උප සභාපති වැං සියෑංදොන් ඇතුළු ඒ සමාගමේ නියෝජිතයෝ, මාර්ග සංවර්ධන අධිකාරියේ සභාපති චමින්ද අතලුවගේ, ව්‍යාපෘති අධ්‍යක්ෂ කේ. ඩබ්. කණ්ඩම්බි ඇතුළු නිලධාරීහු පිරිසක් මේ නිරීක්ෂණ චාරිකාවට එක්ව සිටියහ.
ඡායාරූප – සුලෝචන ගමගේ
ජයසිරි මුණසිංහ
