අලුත් පනත ගෙන එන්නේ රටේ උන්නතියටයි | දිනමිණ

අලුත් පනත ගෙන එන්නේ රටේ උන්නතියටයි

රක්ෂණ ශ්‍රියන්ත

වත්මන් ත්‍රස්ත්‍රවාදය වැළැක්වීමේ පනතින් ත්‍රස්තවාදයට සම්බන්ධවූවන්ට මරණ දණ්ඩනය නියම කිරීමට නොහැකි වූවද යෝජිත ත්‍රස්තවාදය වැළැක්වීමේ පනතින් ත්‍රස්තවාදයට සම්බන්ධවූවන්ට මරණ දණ්ඩනය නියම කිරීමට හැකි බව ඇමැති ලක්ෂ්මන් කිරිඇල්ල මහතා පෙන්වා දෙයි.

ඒ මහතා මෙසේ අදහස් දැක්වූයේ ඊයේ (13) කොළඹ ලෝක වෙළෙඳ මධ්‍යස්ථානයේ පිහිටි එම අමාත්‍යංශයේ පැවැති විශේෂ මාධ්‍ය සාකච්ඡාවකට එක්වෙමිනි.

එහිදී වැඩිදුරටත් අදහස් දක්වමින් රාජ්‍ය ව්‍යවසාය කන්ද උඩරට උරුමය සහ මහනුවර සංවර්ධන ඇමැති ලක්ෂ්මන් කිරිඇල්ල මහතා පවසා සිටියේ, යෝජිත පනත සම්මත වූ පසු හමුදාවට වූවද සෝදිසි කිරීමෙන් පසු පුද්ලයන් අත්අඩංගුවට ගැනීමෙන් අනතුරුව පොලීසියට භාරදීමටත්, ශ්‍රී ලංකාවට විරුද්ධව නොව අනෙකුත් රටකට වූවද විරුද්ධව ත්‍රස්ත්‍රවාදී ව්‍යාපාරයකට සම්බන්ධ පුද්ගලයකුට අපේ රටේ නීතිමය ක්‍රියාමාර්ග ගැනීමට හැකි ආකාරයට මේ පනත සංශෝධනය වෙන බවද ඇමැතිවරයා පෙන්වා දුන්නේය.

මින් ඉදිරියට ගෝලීය ත්‍රස්ත්‍රවාදයට සම්බන්ධ සියලු දෙනාට අපේ රටේ පුරවැසියකු නොවුන ද පදංචිකාරයකු වූවද අපේ රටේ නීතිමය ක්‍රියාමාර්ග ගැනීමට හැකි ආකාරයට මේ පනත සංශෝධනය වීමෙන් ඒ නෛතික බලය අපට ලැබෙන බවද ඇමැතිවරයා කියා සිටියේය. මෙම සංශෝධන ගෙන එන්නේ රටේ උන්නතිය උදෙසා බව කියා සිටි ඇමැතිවරයා අද ලොව පුරා නැගෙන එකම හඬ වන්නේ ත්‍රස්ත්‍රවාදයට දැඩි දඬුවම් ලබාදිය යුතු යන්නබවද කීය.

තමා විපක්ෂයෙන් අසා සිටින්නේ කලින් මේ පනතට කැමැති වූවද දැන් මේ පනතට අකමැතිවන හේතුව කුමක්ද යන්න බවත්, ත්‍රස්ත්‍රවාදීන්ට දඬුවම් ලබාදීමට විපක්ෂය අකමැති ද යන්න බවත් යැයි කීය.

ත්‍රස්ත්‍රවාදීන්ට දැඩි දඬුවම් ලබාදීමේ අරමුණින් යුතුව යෝජිත නව පනත ගෙන එන බව වැඩිදුරටත් ඇමැතිවරයා පෙන්වා දුන්නේය.


නව අදහස දක්වන්න