මේ දිනවල ස්විස්ටර්ලන්තයේ දී ලෝක ආර්ථික සමුළුව මුළු දෙයි. එහිදී ඇන්තෝනියෝ ගුත්රෝස් මහතා දැක් වූ අදහසකින් මේ තීරුව ආරම්භ කරන්නට කැමැත්තෙමු. ගුත්රෝස් මහතාගේ ප්‍රකාශයෙහි හරය ගතහොත්; ඔහු කියා සිටින්නේ එකිනෙක රාජ්‍යයන් දියුණුවීම සඳහා තනි - තනි උත්සාහයන් ගැනීම යල්පැනගිය ක්‍රමයකි. සංවර්ධනය සඳහා අන්තර්ජාතික සහයෝගය අවශ්‍ය වෙයි. පළමුව අසල්වැසි රටවල් සමඟ ද, දෙවනුව කලාපීය රටවල් සමඟ ද, තෙවනුව ජාත්‍යන්තරය සමඟ ද සහයෝගයෙන් ක්‍රියාකළ යුතුය. හුදෙකලා සංවර්ධන උපායමාර්ගවලට අද වනවිට ඉල්ලුමක් නැත. ශ්‍රී ලංකාව මේ සම්බන්ධයෙන් සැලැකිය යුතු ප්‍රගතියක් ලබා ඇත. අපේ ජනාධිපතිවරයා මේ දිනවල සිංගප්පූරුවේ නිල සංචාරයක නිරත වෙයි.
ඉහත සමුළුවේදී ජාත්‍යන්තර මූල්‍ය අරමුදලේ ප්‍රධානී ක්‍රිස්ටීන් ලගාවේන් මහතා දැක් වූ අදහසක් ද මෙහිලා දැක්වීම වැදගත් ය. ඔහුට අනුව ලෝකයේ වාර්ෂික ආර්ථික වෘද්ධිය 3.1%කි. මෙය තවදුරටත් වර්ධනය කරගත යුතුව පැවැතිය ද එකිනෙක රාජ්‍යයන් අතර පවත්නා දේශපාලනික ගැටලු හේතුවෙන් ආර්ථික වෘද්ධිය පහළ බැස තිබේ. අමෙරිකාව හා චීනය අතර පවත්නා වෙළෙඳ යුද්ධය, සරණාගතයන්ගේ ගැටලු, විවිධ රටවල් සඳහා පනවා ඇති ආර්ථික සම්බාධක ලෝක ආර්ථික වෘද්ධීය කෙරෙහි බලපා තිබේ. මේවා නිරාකරණයට පත්කොට සාමූහික ආර්ථික ප්‍රයත්නයක් ක්‍රියාත්මක කරන්නේ නම්; ලෝක ආර්ථික වෘද්ධිය මීට වඩා ඉහළ යනු ඇත.
ලෝක මට්ටමින් පැවැත්වෙන ආර්ථික සමුළු, පාරිසරික සමුළු ආදියෙන් මතුවන වැදගත්ම අදහස වන්නේ සෑම රාජ්‍යයක් ම ලෝකයේ සෙසු රටවල් හා කලාප සමඟ සහයෝගයෙන් වැඩ කිරීම ඉතා කාලෝචිත බව ය. වෙනිසියුලාව දීර්ඝ කාලයක සිට කලාපීය රටවල් සමඟ හෝ ලෝකයේ බලවත් රටවල් සමඟ හෝ සහයෝගයෙන් කටයුතු කරන බවක් පෙනෙන්නට නැත. එහි ප්‍රතිඵලයක් ලෙස වෙනිසියුලාවේ ආර්ථිකය කඩා වැටී ඇත. මේ වනවිට ලෝකයේ ඉහළම උද්ධමනයක් ඇති රාජ්‍යය බවට වෙනිසියුලාව පත් වී ඇත. එරට ජනතාවට එක වේලක් ආහාර වර්ජනය කරන්නට සිදු වී ඇත. හැබෑවට ම එය වර්ජනයක් නොව දුප්පත්කම නිසා ආහාර වේලක් කපා හැරීමකි.
අප මුලින් ද සඳහන් කළ පරිදි 2015න් පසු ශ්‍රී ලංකාව ජාත්‍යන්තරය සමඟ ඉතා හොඳ අවබෝධයකින් කටයුතු කරයි. ඒ බව ලෝක බැංකුව, ආසියානු සංවර්ධන බැංකුව, එක්සත් ජාතීන්ගේ සංවිධානය, ජාත්‍යන්තර මූල්‍ය අරමුදල වැනි ජගත් ආයතන දක්වන ප්‍රතිචාරවලින් පැහැදිලි වෙයි. සුළු කාලයක් තුළ දේශපාලන අර්බුදයක් පැවැතිය ද එය විසඳා ගැනීමට ශ්‍රී ලංකාව සමත් විය. ප්‍රජාතන්ත්‍රවාදය හා නීතියේ ආධිපත්‍යය තහවුරු වූ රාජ්‍යයක් හැටියට ශ්‍රී ලංකාව හඳුන්වනු ලැබේ. මේ අනුව ලෝකයේ බලවත් රටවල් සේම ජගත් ආයතන සුබවාදී දෘෂ්ටියකින් ශ්‍රී ලංකාව දෙස බලනු දැකිය හැකිය. ජනාධිපතිවරයා සිදු කරන සිංගප්පූරුවේ නිල සංචාරය හැඳින්විය හැක්කේ ද ඉහත සිද්ධි දාමයේ වැදගත් පියවරක් හැටියට ය.
ජනාධිපතිවරයාගේ සිංගප්පූරු චාරිකාවේ ප්‍රධාන අරමුණු දෙකක් පවතී. පළමුවන්න ආසියා ෆැසිපික් පාරිසරික සමුළුවට සහභාගී වීමයි. එම සමුළුවේ ප්‍රධාන දේශනය පැවැත්වීම සඳහා ජනාධිපති මෛත්‍රීපාල සිරිසේන මහතාට ඇරියුම් කර තිබේ. දෙවන්න සිංගප්පූරුව හා ශ්‍රී ලංකාව අතර පවත්නා ආර්ථික සහයෝගීතාව තවදුරටත් පුළුල් කිරීම ය. ලී ක්වාන් යුගයේ පටන් පැවැත එන ආර්ථික හා දේශපාලනික සහයෝගීතාවක් ශ්‍රී ලංකාවට හා සිංගප්පූරුවට තිබේ. මේ සහයෝගීතාව මත අඛණ්ඩව කටයුතු කරගෙන යෑම දෙරටේම අපේක්ෂාව වෙයි. සිංගප්පූරුව සැලකෙන්නේ ලෝකයේ දියුණුම ආර්ථිකයක් සහිත රාජ්‍යයක් හැටියට ය. අපට සිංගප්පූරුවෙන් ලබාගත හැකි ආදර්ශ බොහෝය. සිංගප්පූරුවට මූල්‍යමය වශයෙන් ශ්‍රී ලංකාවට ආධාර සැපයීමේ හැකියාවක්ද තිබේ.
ජනාධිපති මෛත්‍රීපාල සිරිසේන මහතාට ආසියා ෆැසිපික් පාරිසරික සමුළුවේ ප්‍රධාන දේශනයක් පැවැත්වීමට ආරාධනා කිරීම ශ්‍රී ලංකාව ලැබූ ජයග්‍රහණයක් සේ සැලැකිය හැකිය. එලෙස ම එය අපට කරන ලද ගෞරවයක් ද වන්නේ ය. ලෝකයේ පවත්නා ප්‍රධාන අර්බුදයක් ලෙස පාරිසරික විනාශය හැඳින්විය හැකිය. මිහිතලය උණුසුම් වීම, ධ්‍රැව ප්‍රදේශවල ග්ලැසියර් දියවී සාගරයට එකතු වීම, ස්වාභාවික විපත් ඉහළ යෑම, ජෛව විවිධත්වයට බාධා එල්ලවීම වැනි පාරිසරික ගැටලු සම්බන්ධයෙන් ලෝකයේ දැඩි අවධානය යොමු වී ඇත. ජනාධිපති මෛත්‍රීපාල සිරිසේන මහතා පරිසරය පිළිබඳ බලවත් උනන්දුවක් දක්වන නායකයකු බැවින් ඔහුගේ දේශනය කෙරෙහි ලෝක අවධානය යොමු වී ඇත.
ජනාධිපතිවරයා සිංගප්පූරුවේදී පෙරේදා කළ සාකච්ඡාවලදී හෙළිදරව් වී ඇත්තේ ශ්‍රී ලංකාවේ මත්ද්‍රව්‍ය නිවාරණ වැඩසටහනට පූර්ණ සහයෝගය ලබාදීමට සිංගප්පූරුව එකඟ වී ඇති බවය. සිංගප්පූරුව මේ සඳහා භාවිත කරන නූතන තාක්ෂණය හා නවීන ක්‍රමවේද ශ්‍රී ලංකාවට හඳුන්වාදීමට නියමිතය. ඊට අදාළ විමර්ශන කටයුතු සිදු කිරීම සඳහා සිංගප්පූරුවේ නිලධාරී කණ්ඩායමක් කොළඹට පැමිණීමටද නියමිතය. මත් ද්‍රව්‍ය ජාවාරම මේ කලාපයේ ප්‍රධාන ගැටලුවකි. ශ්‍රී ලංකාව ඊට ගොදුරු වී ඇත්තේ කලාපය තුළ මත්ද්‍රව්‍ය හුවමාරු කෙරෙන මධ්‍යස්ථානයක් හැටියටය. මෙය වළක්වා ගතහොත් සමාජමය වශයෙන් සිදුවන විනාශ ගණනාවක් නවත්වා ගත හැකිය.
ජනාධිපතිවරයා සිංගප්පූරු රජය සමඟ ආර්ථික ගිවිසුම් කිහිපයකට අස්සන් තැබීමට නියමිත බවද දැක්වේ. එය ඉතා වැදගත්ය. සේවා ආර්ථිකය අතින් ලෝකයේ ඉහළම ආදායමක් ලබන රටක් හැටියට සිංගප්පූරුව හැඳින්විය හැකිය. ශ්‍රී ලංකාවට නිෂ්පාදන ආර්ථිකයක් මෙන් ම සේවා ආර්ථිකයක්ද පවතී. එහෙත් අපේ සේවා ආර්ථිකය ප්‍රමාණවත් දියුණුවක් ලබා නැත. ලෝක ආර්ථිකයේ නව ප්‍රවණතා අනුව නිෂ්පාදන ආර්ථිකයකින් පමණක් ශ්‍රී ලංකාව වැනි රාජ්‍යයකට දියුණුවීම අපහසුය. රැකියා සැපයීම අපහසුය. ඉහළ ආදායම් ලැබීමද අපහසුය. එබැවින් අප සේවා ආර්ථිකයක් කෙරෙහිද යොමුවිය යුතුය යන්න ආර්ථික විශේෂඥයන්ගේ මතය වෙයි. ඒ සඳහා සහයෝගය ලබා ගත හැකි හොඳම රටක් ලෙස සිංගප්පූරුව හැඳින්විය හැකිය.
ශීඝ්‍ර ආර්ථික වර්ධනයක් අපේක්ෂා කරන රටවල් ලෝක ආර්ථිකයේ නව ප්‍රවණතා හඳුනාගෙන; විවිධ රටවල් සමඟ සහයෝගයෙන් ක්‍රියාකළ යුතුය.
නව අදහස දක්වන්න