ඩබල් ගේම් එළියට පනී

ඇමරිකානු රජය ගිලගෙන තිබුණේ දූෂිත දේශපාලනඥයන්ගේ ධන ලෝභයෙන් හා කෑදරකමෙනි. වගකිව යුතු රාජ්‍ය තාන්ත්‍රිකයන් වුවද නීති විරෝධි ලෙස මුදල් සෙවූ වෙයින්බර්ග් වැනි තක්කඩියන් සහ ඔවුන් අතර මහා ලොකු වෙනසක් තිබුණේ නැත. වෙයින්බර්ග්ට මතක්වුණේ කසළ බැහැර කිරීමේ කොන්ත්‍රාත්කරු ජෝර්ජ් කැට්ස් සමඟ ටික දිනකට පෙර පැවති කතාබහකි.

“නෙවාර්ක්වල නගරාධිපති කෙනත් ගිබ්සන් මගේ ගජ යාළුවෙක්. මිනිහා පහුගිය කාලේ එයාගේ නගරේ කුණු කොන්ත්‍රාත් එක මට අල්ලලා දුන්නා. ඒකට මම මිනිහාට හොඳට සැලකුවා. අපිට සලකන අයට සෙකන්ඩ් වෙන්නේ නැති විදිහට අපිත් සලකන්න ඕනේ. අබ්දුල්ට නෙවාර්ක්වල චෙක් කෑෂ්කරන සර්විස් එක පටන් ගන්න නගර සභාවෙන් පර්මිට් එක පන්නලා දෙන්නම් කියලා මිනිහා මට ස්ථීරෙන්ම පොරොන්දු වුණා. ගිබ්සන් දෙයක් කිව්වොත් කිව්වා තමයි. වැඩේ කොහොම හරි කෙරෙනවා. හැබැයි මිනිහාට සලකන්න වෙනවා. මොකද කියන්නේ? “

“හරි, ජෝර්ජි අපි එහෙනම් වැඩේ මිනිහාට භාරදෙමු. මිනිහා කරලා දෙන්න හදන්නේ කියලවත් කරගන්න බැරි වැඩක්. මම මේ දැන්ම ඩොලර් පනස්දහක් දෙන්නම්. ඒක ඇති වෙයි කියලද ඔහේ හිතන්නේ ? “ වෙයින්බර්ග්ගේ උනන්දුව පිටාර ගලන්නට පටන්ගෙන තිබිණි.

“ මෙහෙමයි මෙල්, ඔයා සමහරවිට මේ වගේ දේවල් ගැන දන්නේ නැතිව ඇති. ඒත් නිව් ජර්සිවල වැඩ සිද්ධ වෙන්නේ ටිකක් වෙනස් විදිහට. ඒ කියන්නේ ගාණ දෙන්නේ වැඩේ කෙරුණයින් පස්සේ. වැඩේ කෙරෙන එක ගැන ඔයා කොහොමටවත් සැකයක් තියාගන්න එපා. ගිබ්සන් පොරොන්දුවක් දුන්නොත් බෙල්ල කඩාගෙන හරි කරලයි පස්ස බලන්නේ. එහෙම නම් නම් වැඩේ තීන්දුයි. දැන්ම වැඩේට බහින්න කියලා මම ගිබ්සන්ට කියන්නම්.“

මේ අලුත්ම ආරංචිය තම පුදුමයත්, උනන්දුවත් තීව්‍ර කළ බව වෙයින්බර්ග්ට අමතක නැත. ඒ ඇමරිකානු ජනපති ජිමී කාටර් දෙවන වරටත් ජනපති ධූරයට තරඟ වදින්නට සූදානම්ව සිටි කාලයකි. ඔහුගේ ජනපතිවරයා ප්‍රචාරක ව්‍යාපාරයේ ප්‍රමුඛත්වය ගෙන ක්‍රියාකළ නායකයකු වූයේ නගරාධිපති ගිබ්සන්ය. ගිබ්සන් අක් වෙරළ ස්විස් බැංකු ගිණුමක බදු ගෙවීම පැහැර හැරීමක් සම්බන්ධ අපවාදයක්ද ඒ වන විට කරළියට පැමිණි තිබිණි. ගිබ්සන්ට එරෙහිව ඊට ෆෙඩරල් විමර්ශනයක් ඇරඹී තිබුණු බවද වෙයින්බර්ග්ට මතකය.

ඉන් දින කිහිපයකට පසුව ජෝන් ගුඩ්, වෙයින්බර්ග් සොයාගෙන ආවේ පෞද්ගලිකව වැදගත් කාරණාවක් පිළිබඳව සාකච්ඡා කිරීමටය. ගුඩ්ගේ බැරෑරුම් පෙනුම දුටු වෙයින්බර්ග්ට සිතුණේ කාරණය කිසිසේත්ම සතුටුදායක විය නොහැකි අතිශයින්ම සංවේදි මාතෘකාවක් ගැන විය යුතු බවයි. ගුඩ් කතාව ඇරඹුවේ වෙයින්බර්ග්ට දුරදිග බලා, හොඳින් කල්පනා කොට තීරණයක් දෙන ලෙසට කළ අවවාද කිරීමෙන් පසුවය.

“ අපි වීඩියෝ කරලා, රෙකෝඩ් කරන හැම මළඉළව්වක්ම වොෂින්ටන්වල නීති දෙපාර්මේන්තුවෙන් නෙවාර්ක්වල නීතිපති කාර්යාලයට යවනවා කියලා ඔයා දන්නවානේ මෙල්, අපේ පෞද්ගලික මතය මොකක් වුණත්, එයාලා කියන්නේ ඒක තමයි නීතිය කියලා. ඉතින් ඔය ටේප්වල රෙකෝඩ් වෙලා තියෙන ජරමර වැඩි තොගේක ක්‍රෙඩිට් එක තියන්නේ නිව් ජර්සිවල ලොකු මහතැන්ලට. සෙනේටර් විලියම්ස්, ගිබ්සන්, වගේ උදවිය කියන්නේ නිව් ජර්සිවල ඉන්න ලොකුම පොලිටික්කො.

ඉතින් නෙවාර්ක්වල රොබට් ඩෙල් ටෆෝ යි එයාගේ කට්ටියයි කියනවා ඔයාට එහේ ඇවිල්ලා කෙළින්ම එයාලත් එක්ක වැඩ කරන්නලු. ඔයා මොකද කියන්නේ මෙල් ? මෙතනදී ඔයා මොන තීරණේ ගත්තත් ඒක අපි දෙන්නගේ සම්බන්ධෙට බලපෑමක් වෙන්න ඉඩ තියන්නේ නැහැ කියලා මම පොරොන්දු වෙනවා. “ ගුඩ්ගේ හඬ බෙහෙවින් හැඟුම්බරය.

“එතකොට ගුඩ් ඔයා දිගටම මගේ බොස් විදිහට ඉන්නවාද ?“ වෙයින්බර්ග් ඇසුවේ ස්ථිර හඬකිනි.

“මෙහෙමයි මෙල්. ඔයා ඩෙල් ටෆෝ යටතේ නම් වැඩ කරන්නේ මට බැහැ තවත් එයාගේ වැඩවලට ඇඟිලි ගහන්න. මට වෙන්නේ පැත්තක ඉඳන් බලාගෙන ඉන්න.“

“එතකොට පූචියෝයි, එයාගේ සගයා ජෝන් ජේකබ්ස්ටයි මොකද වෙන්නේ ? එයාලත් මේකෙන් ඈත් වෙනවද ?“

“එයාල වුණත් ඉතින් මගේ තත්වෙම තමයි. ඩෙල් ටෆෝ කියන්නේ අපිට ළංවෙන්න පුළුවන් කෙනෙක් නෙවෙයි, “ ගුඩ් අවංකවම පැවසුවේය.

වෙයින්බර්ග්ගේ මොළය වේගයෙන් වැඩ කරන්නට පටන් ගත්තේය. කොයිතරම් දක්ෂයකු වුවත් වෙයින්බර්ග්ට ඩෙල් ටෆෝ හෝ ඔහුගේ සගයා එඩවර්ඩ් ප්ලාසා ගැන හෝ දැනුමක් තිබුණේ නැත. ඔහු ඔවුන් හඳුනන්නේද නැත. නමුත් නිව් ජර්සි නුවර ගැනත්, එය අරක්ගෙන සිටින දූෂිත ඩිමොක්‍රටික් දේශපාලනඥයන් ගැනත් අමුතුවෙන් දැනගැනීමට දෙයක් ඔහුට තිබුණේද නැත. ඇබ්ස්කැම් මෙහෙයුමට සම්බන්ධවූ දා සිට වෙයින්බර්ග් ඉගෙනගත් දෙයක් තිබේ නම් ඒ නිව් ජර්සිවල හැදෙන ගහක් ගලක් වුව කිසිසේත්ම විශ්වාස කළ නොහැකි තක්කඩියෙක් බවය. ඩෙල් ටෆෝ ගැන දැන සිටි තවත් කාරණයක් නිසාද වෙයින්බර්ග්ගේ හිත කීරී ගැසී තිබිණි. ඒ නිව් ජර්සිවල ඇමරිකානු නීතිපති ලෙස තමන් මෙතෙක් ඉසිලූ ධුරයට සෙනේටර් විලියම්ස් විසින් ඩෙල් ටෆෝව යෝජනා කර තිබීමය. හොරු වටේට සිටින්නේත් හොරුමය. හොරු අල්ලන්නට ගොස් හොරුන්ගේම අල්ලේ නැටවෙන තත්වයට වැටෙන්නට තරම් වෙයින්බර්ග් මෝඩයකු නොවීය. පිළිතුරක් අපේක්ෂාවෙන් ඉවසීමෙන් තමා දෙස බලා හිඳින එෆ්.බී.අයි. නිලධාරියා දෙස එක එල්ලේ බැලූ වෙයින්බර්ග් දුන්නේ හෘද සාක්ෂියට එකඟ පිළිතුරකි.

“ගුඩ්, ඔයා පොඩ්ඩක්වත් හිත නරක් කරගන්න එපා. මම මේක පටන්ගත්තේ ඔයාලත් එක්ක. මේක ඉවර කරනවා නම්, ඉවර කරන්නෙත් ඔයාලත් එක්කමයි. වොෂින්ටන්වල ඉන්න ගොන් හරක්ට කියන්න නෙවාර්ක් යවන්න හැදුවොත් මම ඇබ්ස්කැම් එකෙන් අයින් වෙනවා කියලා.“

“ඔයා කැමති එහෙම නම් ඒක එහෙම සිද්ද වේවි. අපි බලමු මොකද වෙන්නේ කියලා. “ ගුඩ් පැවසුවේ සැනසුම් සුසුමක් හෙළමිනි. “එහෙනම් අපි ආයෙත් වැඩට බහිමු.“

නමුත් වෙයින්බර්ග් ඩෙල් ටෆෝ හා ප්ලාසා සමඟ වැඩ කිරීම ප්‍රතික්ෂේප කිරීමට ගත් තීරණය, ඇබ්ස්කැම් මෙහෙයුම නුදුරු අනාගතයේදීම මහා විපතකට හෙළන්නක් බව එදා ඔවුන් දෙදෙනා දැන සිටියේ නැත. එසේම එදා ගත් ඒ තීරණය ගැන වැඩිදුර හිතමින් කල් මරන්නට තරම් කාලයක් ඔවුන්ට නොලැබුණේ එරිචෙට්ටිගෙන් ලැබුණු හදිසි ඇමතුමක් නිසාය. එරිචෙට්ටි සිටියේ බෙහෙවින් බියපත්ව, මහා කලබලයකින් බව ඔහුගේ කටහඬින් හඳුනාගැනීමට අපහසු වූයේ නැත. සෙනෙටර් විලියම්ස් හා ඔහුගේ ඩිමොක්‍රටික් පක්ෂ සභාපති හමුවී ගෙවී තිබුණේ යන්තම් සතියක් පමණි. හැකි ඉක්මණින් තමාව කෙනඩි ගුවන් තොටුපළේදි මුණගැසෙන ලෙස එරිචෙට්ටි, වෙයින්බර්ග්ට දන්වා සිටියේ කුමක් හෝ අසුබ යමක් සිදුව ඇති බැව් නොකියා කියමිනි.

එරිචෙට්ටි සිටියේ හිස ගිනිගෙනය. කාලගුණය සීතල වුවද නගරාධිපතිගේ කන් දෙපැත්තෙන් දහඩිය වැගිරෙමින් තිබුණි. යම් හේතුවක් නිසා ඔහු තැතිගෙන සිටින බැව් බැලූ බැල්මටම වෙයින්බර්ග්ට පෙනුණත් ඊට හේතුව හිතාගැනීමට හේ සමත් වූයේ නැත. මේ තරම් බය වෙන්නට සිදුවිය හැකි බරපතළ දේ කුමක්ද ? එරිචෙට්ටිගේ කතාව ඇසු විට වෙයින්බර්ග් කෙතරම් තැති ගත්තාද යත්, මුවේ තිබු යෝධ සුරුට්ටුව ගිලෙන්නට නොදී නවත්වා ගත්තේ අසීරුවෙනි. නගරාධිපතිට එම බරපතළ ආරංචිය ලැබී තිබුණේ ගුචියෝන්ගේ ඇට්ලන්ටා නුවර කැසිනෝ අවන්හලේ කළමනාකරු වූ ටෝනි ටෝර්කැසියෝගෙනි. ඒ ඊට පෙරදාය.

“ මෙල් අපි කපෝතියි! ඊයේ ටෝනියව හම්බවෙන්න තවත් පාතාල කෙරුම්කාරයෙක් ඇවිත්. මිනිහා ඇවිත් තියෙන්නේ එදා යසීර්ගේ නැවේ පාටි එක වෙලේ දැකලා. මිනිහා ටෝනිට කියලා තියෙනවා එයා මියාමි එෆ්.බී.අයි. එකේ ඔත්තුකාරයෙක් විදිහටයි වැඩකරන්නේ, එදා මිනිහාව බෝට්ටු පාටියට ගෙනල්ලා දාලා තියෙන්නේ ඒකට ආපු කට්ටිය අතරේ ගැවසිලා හීන් සීරුවේ ඔත්තු බලන්නය කියලා. ඒ මුලු පාටියම එෆ්. බී.අයි. එකේ ඩබල් ගේමක් කියලත් මිනිහා කියලා තියෙනවා. ඒකේ මොළකාරයා ඇන්තනි ඇමරොසෝ කියලා ඒජන්ට් කෙනෙක්ලු. ටෝනිත් බය බිරාන්ත වෙලා. ඒත් මිනිහා ගට්ස් අරගෙන මෙල් වෙයින්බර්ග් කියන්නෙත් එෆ්.බී.අයි. කාරයෙක්ද අහලා. එයා ඒ ගැන එදා පාටි එක වේලේ ඇන්තනිගෙන්ම ඇහුවා කියලා එතකොට පාතාලයා කියලා. එතකොට මිනිහාට කේන්ති ගිහිල්ලා උගේ ඇඟට කඩා පැනලා, “නැහැ, ඒකාත් (වෙයින්බර්ග්) තවත් හොරෙක්ම තමයි.“ කියලා.“

“ටෝනිව දෙයියොම බලාගන්න ඕනේ. එයා හිටියේ නැත්නම් මං ඉවරෙටම ඉවරයි.“

වෙයින්බර්ග් සිතින් මුමුණාගත්තේ තැනට සුදුසු නුවණ මෙහෙයවා ඇමරොසෝ තමාගේ ජාමේ බේරාදීම ගැන හිතින් පින් දෙමිනි. ඒ හැරෙන්නට හිත සනසා ගත හැකි කිසිවක් තිබුණේ නැත. මැදිව සිටි ගිනි ගොඩෙන් ගොඩ ඒමට නම් මුලින්ම එරිචෙට්ටිගේ හිත හැදිය යුතුය. වෙලාවේ හැටියට වෙයින්බර්ග් කටට ආ බොරුවක් කියා දැම්මේය.

“ඔය පාතාලකාරයෝ කියන්නේ සත පහකට විශ්වාස කරන්න බැරි ජාතියක්. මිනිහා ටෝනිගේ (ටොර්කැසියෝ) හිත දිනාගන්න මොකක් හරි කෙබරයක් ඇදබාන්න ඇති. අහුවෙන්න එපා කියලා මිනිහාට අනතුරු අඟවලා තියන්න. මම අපේ ටෝනිව (ඇමරොසෝ) දන්නේ අවුරුදු ගාණක ඉඳලා. මිනිහා කොහොමටත් ආණ්ඩුවේ කෙනෙක් නෙවෙයි කියලා මට දිවුරන්න පුළුවන්. ටෝනිට කියන්න එයාගේ ඔත්තුකාරයා මොකක් හරි යටි කූට්ටු මගඩිකට තමයි ලෑස්තිවෙන්නේ කියලා. ඇරත් මිනිහාත් පාතාලෙම එකෙක්නේ.“

එරිචෙට්ටි සිටියේ කොයි ක්‍රමයෙන් හෝ තමාගේ සිත සනසා ගැනීමේ බලාපොරොත්තුවකින් නිසා වෙයින්බර්ග්ගේ විශ්වාසනීය පැහැදිළි කිරීම ඉවතලන්නට තරම් හයියක් ඔහුට තිබුණේ නැත. හැරත් ඔහු වෙයින්බර්ග් දැනහඳුනා ගත් දින සිට තිබුණු පැහැදීම කඩතොලු කරන කිසිවක් මෙතෙක් සිදුව තිබුණේ නැති නිසා, මෙම සිද්ධිය ගණන්ගැනීමට හේතුවක් තිබුණේද නැත. කවදාවත් දැක නැති පාතාලකාරයකුට වඩා හැම අතින්ම දන්නා කියන වෙයින්බර්ග් විශ්වාස කිරීමට බිය විය යුත්තේ ඇයි ?

“ඔයා ඔහොම කිව්වම තමයි මගේ ඇඟට ලේ ඩිංගක් ඉනුවේ. ටෝනි කතා කරපු වෙලේ ඉඳලා මම හිටියේ මැරිලා වගේ ඔය යකාගෙන් ඈත්ම වෙලා ඉන්න කියලා. මම ටෝනිට කියන්නම්. මිනිහා මොන ගේමකටද එන්න හදන්නේ කියලා කවුද දන්නේ ?“ එරිචෙට්ටි වෙයින්බර්ග්ට සමුදුන්නේ ප්‍රබෝධයෙනි.

වෙයින්බර්ග්ගේ තැනට සුදුසු නුවණ නිසා ඇබ්ස්කැම් මෙහෙයුම දෙවන වරටත් යාන්තම් ගොඩගියේ එලෙසය. වෙයින්බර්ග් කෙතරම් සූරයකු වීද යත්, අපරාධ කලාව ගැන පාතාලයෙන් උපාධි ලැබූ දේශපාලනික තක්කඩියකු වූ එරිචෙට්ටි පවා සිටියේ ඔහුට වසඟවය. වෙයින්බර්ග් පිළිබඳ එරිචෙට්ටිට තිබූ විශ්වාසය කොතරම්ද කියනවා නම් තවත් මාස අටක් පුරා හේ ඇබ්ස්කැම් කණ්ඩායමට සම්බන්ධව වැඩ කළේ තමා එෆ්.බී.අයි. ආයතනයේ උගුලකට හසුව ඇති බවට නොයෙක් ආකාරයෙන් ලැබුණු අනතුරු ඇඟවීම් පවා නොතකමිනි.

රොබට් ඩබ්. ග්‍රීන් විසින් රචනා කළ මෙල්වින්

වෙයින්බර්ග්ගේ
චරිතාපදානය
‘ස්ටිං මෑන්‘ කෘතියේ

පරිවර්තනය
රුක්ලන්ති පෙරේරා

හෙට - සෙ‍ෙනටර් විලියමස් ලණුව ගිලියි